سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم کے زمانہ اقدس میں ایک شخص خرید و فروخت کیا کرتا تھا جس کی زبان میں لکنت تھی۔ اس کے اہل خانہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: اے اللہ کے نبی! آپ فلاں کو تصرف کرنے سے روک دیجیے کیونکہ وہ خرید و فروخت کرتا ہے، اس کی قوت گویائی ٹھیک نہیں ہے۔ نبی اکرم صلی اللہ علیہ وسلم نے اسے بلایا اور خرید و فروخت کرنے سے منع کر دیا تو اس نے عرض کی: یا رسول اللہ صلی اللہ علیہ وسلم ! میرا خرید و فروخت کیے بغیر گزارہ نہیں ہے، تو نبی اکرم صلی اللہ علیہ وسلم نے ارشاد فرمایا: ”اگر تم نے خرید و فروخت ترک نہیں کرنی تو پھر یہ کہہ دیا کرو: یہ ہے اور یہ ہے اور کوئی دھوکہ نہیں چلے گا۔“ [صحیح ابن حبان/كتاب الحجر/حدیث: 5049]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں ایک شخص خرید و فروخت کیا کرتا تھا اور اس کی زبان میں لکنت تھی، اس کے اہل خانہ نبی اکرم صلی اللہ علیہ وسلم کی خدمت میں حاضر ہوئے اور انہوں نے عرض کی: یا رسول اللہ صلی اللہ علیہ وسلم ! آپ فلاں کو تصرف کرنے سے روک دیں کیونکہ وہ خرید و فروخت کرتا ہے اور اس کی زبان میں لکنت ہے، نبی اکرم صلی اللہ علیہ وسلم نے اسے بلایا اور اسے خرید و فروخت کرنے سے منع کر دیا، تو اس نے عرض کی: یا نبی اللہ! میرا خرید و فروخت کیے بغیر گزارہ نہیں ہے، اس پر نبی اکرم صلی اللہ علیہ وسلم نے ارشاد فرمایا: ”اگر تم خرید و فروخت کو ترک نہیں کرتے تو پھر یہ کہہ دیا کرو: «هَا وَهَا، وَلَا خِلَابَةَ» ”یہ ہے اور یہ ہے اور کوئی دھوکہ نہیں چلے گا۔““ [صحیح ابن حبان/كتاب الحجر/حدیث: 5050]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم کے سامنے ایک شخص کا ذکر کیا گیا کہ اسے خرید وفروخت میں دھوکا ہو جاتا ہے، تو نبی اکرم صلی اللہ علیہ وسلم نے اس سے فرمایا: ”جس کے ساتھ تم کوئی سودا کرو تو یہ کہہ دیا کرو: «لَا خِلَابَةَ» ”کوئی دھوکا نہیں چلے گا“۔“ تو جب وہ شخص کوئی سودا کرتا تھا تو وہ یہی کہہ دیتا تھا: ”کوئی دھوکا نہیں چلے گا۔“ [صحیح ابن حبان/كتاب الحجر/حدیث: 5051]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم کے سامنے ایک شخص کا ذکر کیا گیا جسے کاروبار میں دھوکہ ہو جاتا تھا، تو نبی اکرم صلی اللہ علیہ وسلم نے ارشاد فرمایا: ”جب تم کوئی خرید و فروخت کرو، تو یہ کہہ دو: «لَا خِلَابَةَ» ”کوئی دھوکہ نہیں چلے گا۔“”راوی کہتے ہیں: تو جب وہ شخص کوئی چیز فروخت کرتا تھا تو یہ کہہ دیتا تھا: «لَا خِلَابَةَ» ”کوئی دھوکہ نہیں چلے گا۔“ [صحیح ابن حبان/كتاب الحجر/حدیث: 5052]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”خوشحال شخص کا (ادائیگی میں) ٹال مٹول کرنا ظلم ہے اور جب کسی کو وصولی کے لیے کسی دوسرے کے سپرد کیا جائے تو اسے اس (دوسرے شخص) کے پیچھے جانا چاہیے۔“ [صحیح ابن حبان/كتاب الحجر/حدیث: 5053]