سیدہ ام سلمہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”جس شخص نے قربانی کرنی ہو، جب ذوالحجہ کا چاند نظر آ جائے تو وہ شخص اپنے بال نہ کاٹے اور اپنے ناخن نہ کاٹے جب تک قربانی نہیں کر لیتا۔“ [صحیح ابن حبان/كتاب الأضحية/حدیث: 5917]

عمر بن مسلم رحمہ اللہ بیان کرتے ہیں: ہم لوگ عید الاضحیٰ سے کچھ عرصہ پہلے حمام میں موجود تھے، وہاں کچھ لوگوں نے بال صاف کرنے کی تیاری کی تو حمام میں موجود ایک شخص نے کہا: سعید بن مسیب رحمہ اللہ نے اس بات کو مکروہ قرار دیا ہے اور وہ اس سے منع کرتے ہیں۔ راوی کہتے ہیں: میری ملاقات سعید بن مسیب رحمہ اللہ سے ہوئی، میں نے ان کے سامنے اس بات کا تذکرہ کیا تو انہوں نے فرمایا: اے میرے بھتیجے! اس حدیث کو بھلا دیا گیا ہے۔ سیدہ ام سلمہ رضی اللہ عنہا نے مجھے یہ بات بتائی ہے: نبی اکرم صلی اللہ علیہ وسلم نے یہ بات ارشاد فرمائی ہے: ”جب (ذوالحجہ کا پہلا) عشرہ شروع ہو جائے اور تم میں سے کسی کے پاس قربانی کا جانور ہو جسے قربان کرنے کا اس کا ارادہ ہو تو اسے (قربانی کرنے تک) اپنے بال اور ناخن نہیں کاٹنے چاہئیں۔“ [صحیح ابن حبان/كتاب الأضحية/حدیث: 5918]

سیدنا براء بن عازب رضی اللہ عنہما کے بارے میں یہ بات منقول ہے، انہوں نے قربانی کا ذکر کرتے ہوئے یہ بات بتائی کہ نبی اکرم صلی اللہ علیہ وسلم نے اپنے دست مبارک کے ذریعے اشارہ کیا، ویسے میرا ہاتھ نبی اکرم صلی اللہ علیہ وسلم کے دست مبارک کے مقابلے میں چھوٹا ہے۔ نبی اکرم صلی اللہ علیہ وسلم نے ارشاد فرمایا: ”چار طرح کے جانوروں کی قربانی نہیں کی جا سکتی: ایسا کانا جانور جس کا کانا پن واضح ہو، ایسا بیمار جانور جس کی بیماری نمایاں ہو، ایسا لنگڑا جانور جس کا لنگڑا پن واضح ہو اور اتنا کمزور جانور جس کے جسم میں گودا ہی نہ ہو۔“ لوگوں نے سیدنا براء رضی اللہ عنہ سے دریافت کیا: ہم تو ایسے جانور کو بھی ناپسندیدہ قرار دیتے ہیں، جس کے دانتوں یا کان یا دم میں کوئی نقص ہو، تو سیدنا براء رضی اللہ عنہ نے فرمایا: تم لوگ جسے چاہو ناپسند سمجھو لیکن لوگوں کے لیے اسے حرام قرار نہ دو۔ [صحیح ابن حبان/كتاب الأضحية/حدیث: 5919]

سیدنا علی بن ابوطالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں یہ حکم دیا ہے: ”ہم (قربانی کے جانوروں کی) آنکھوں اور کانوں کا جائزہ لے لیں۔“ [صحیح ابن حبان/كتاب الأضحية/حدیث: 5920]

سیدنا براء رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”چار طرح کے جانوروں کی قربانی جائز نہیں ہے: ایسا کانا جس کا کانا پن واضح ہو، ایسا لنگڑا جس کا لنگڑا پن واضح ہو، ایسا بیمار جس کی بیماری واضح ہو اور ایسا کمزور جانور جس کے جسم میں گودا ہی نہ ہو۔“ (امام ابن حبان رحمہ اللہ فرماتے ہیں:) یہ روایت امام مالک کے حوالے سے عمرو بن حارث سے نقل کی گئی ہے اور اس میں انہوں نے غلطی کی ہے کیونکہ انہوں نے اس کی سند میں سلیمان بن عبدالرحمن کا ذکر نہیں کیا۔ [صحیح ابن حبان/كتاب الأضحية/حدیث: 5921]

عبید بن فیروز بیان کرتے ہیں: میں نے سیدنا براء بن عازب رضی اللہ عنہ سے دریافت کیا کہ نبی اکرم صلی اللہ علیہ وسلم کون سے جانوروں کی قربانی کو ناپسند سمجھتے تھے؟ تو انہوں نے بتایا کہ نبی اکرم صلی اللہ علیہ وسلم نے ارشاد فرمایا ہے: ”چار طرح کے جانوروں کی قربانی جائز نہیں ہے: ایسا کانا جس کا کانا پن واضح ہو، ایسا لنگڑا جس کا لنگڑا پن واضح ہو، ایسا بیمار جس کی بیماری واضح ہو اور ایسا جانور جس کی ٹانگ ٹوٹی ہوئی ہو اور اس کے جسم میں گودا ہی نہ ہو۔“ [صحیح ابن حبان/كتاب الأضحية/حدیث: 5922]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم ارشاد فرمایا کرتے تھے: ”کوئی بھی شخص اپنی قربانی کا گوشت تین دن سے زیادہ ہرگز نہ کھائے۔“ [صحیح ابن حبان/كتاب الأضحية/حدیث: 5923]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”کوئی شخص اپنی قربانی (کا گوشت) تین دن سے زیادہ نہ کھائے۔“ [صحیح ابن حبان/كتاب الأضحية/حدیث: 5924]

سیدنا جابر بن عبداللہ رضی اللہ عنہما بیان کرتے ہیں: پہلے نبی اکرم صلی اللہ علیہ وسلم نے تین دن کے بعد قربانی کا گوشت کھانے سے منع کیا تھا، اس کے بعد آپ صلی اللہ علیہ وسلم نے ارشاد فرمایا: ”تم (قربانی کے گوشت کو) کھاؤ بھی، زادِ راہ کے طور پر بھی استعمال کرو اور ذخیرہ بھی کرو۔“ [صحیح ابن حبان/كتاب الأضحية/حدیث: 5925]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”تین دن سے زیادہ قربانی کا گوشت استعمال کرنے“ سے منع کیا تھا، پھر آپ صلی اللہ علیہ وسلم نے رخصت دی کہ ”ہم اسے کھا بھی سکتے ہیں اور ذخیرہ بھی کر سکتے ہیں“۔ اسی دوران سیدنا ابوسعید خدری رضی اللہ عنہ کے بھائی سیدنا قتادہ بن نعمان رضی اللہ عنہ تشریف لے آئے، لوگوں نے ان کے سامنے قربانی کا گوشت پیش کیا تو انہوں نے فرمایا: ”کیا نبی اکرم صلی اللہ علیہ وسلم نے اس سے منع نہیں کیا تھا؟“ تو سیدنا ابوسعید خدری رضی اللہ عنہ نے بتایا کہ نبی اکرم صلی اللہ علیہ وسلم نے آپ کے بعد اس بارے میں نیا حکم جاری کر دیا ہے؛ پہلے نبی اکرم صلی اللہ علیہ وسلم نے ہمیں اس بات سے منع کیا تھا کہ ”ہم تین دن سے زیادہ اسے رکھیں“، پھر آپ صلی اللہ علیہ وسلم نے رخصت دی کہ ”ہم اسے کھا بھی سکتے ہیں اور ذخیرہ بھی کر سکتے ہیں“۔ (امام ابن حبان رحمہ اللہ فرماتے ہیں:) زینب نامی راوی خاتون سیدنا کعب بن عجرہ رضی اللہ عنہ کی صاحبزادی ہیں۔ [صحیح ابن حبان/كتاب الأضحية/حدیث: 5926]