سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے تین دن کے بعد قربانی کا گوشت کھانے سے منع کیا تھا۔ عبداللہ بن ابوبکر نامی راوی کہتے ہیں کہ میں نے اس روایت کا تذکرہ عمرہ بنت عبدالرحمن سے کیا تو انہوں نے بتایا کہ میں نے سیدہ عائشہ رضی اللہ عنہا کو یہ بیان کرتے ہوئے سنا ہے کہ ایک مرتبہ نبی اکرم صلی اللہ علیہ وسلم کے زمانہ اقدس میں عیدالاضحیٰ کے موقع پر دیہات کے رہنے والے کچھ لوگ آ گئے تو نبی اکرم صلی اللہ علیہ وسلم نے ارشاد فرمایا: ”تم اسے (یعنی قربانی کے گوشت کو) صرف تین دن تک ذخیرہ کر سکتے ہو، باقی رہ جانے والے کو تم صدقہ کر دو۔“ عمرہ نامی راوی خاتون بیان کرتی ہیں کہ سیدہ عائشہ رضی اللہ عنہا نے بتایا کہ اس کے بعد نبی اکرم صلی اللہ علیہ وسلم کی خدمت میں عرض کی گئی: یا رسول اللہ صلی اللہ علیہ وسلم ! پہلے لوگ اپنے قربانی کے جانوروں سے نفع حاصل کیا کرتے تھے، وہ ان کی چربی سنبھال کر رکھ لیا کرتے تھے اور ان کے (چمڑوں کے ذریعے) مشکیزے بنا لیتے تھے، تو نبی اکرم صلی اللہ علیہ وسلم نے ارشاد فرمایا: ”اب کیا ہوا ہے؟“ لوگوں نے عرض کی: یا رسول اللہ صلی اللہ علیہ وسلم ! آپ نے تین دن کے بعد قربانی کا گوشت استعمال کرنے سے منع کر دیا تھا (اس لیے لوگ اب ایسا نہیں کرتے)، نبی اکرم صلی اللہ علیہ وسلم نے ارشاد فرمایا: ”میں نے تمہیں ان (غریب لوگوں) کی آمد کی وجہ سے منع کیا تھا جو تمہارے ہاں آ گئے تھے، اب تم اسے کھاؤ بھی، صدقہ بھی کرو اور ذخیرہ بھی کرو۔“ (امام ابن حبان رحمہ اللہ فرماتے ہیں:) لفظ «الدَّافَّةُ» کا مطلب وہ جماعت ہے جو مانگنے کے لیے آئی تھی۔ [صحیح ابن حبان/كتاب الأضحية/حدیث: 5927]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے اہل مدینہ! تم تین دن سے زیادہ اپنی قربانی کا گوشت نہ کھاؤ۔“ راوی بیان کرتے ہیں کہ لوگوں نے نبی اکرم صلی اللہ علیہ وسلم کی خدمت میں یہ شکایت کی کہ ان کے بال بچے اور خدمت گزار ہیں، تو نبی اکرم صلی اللہ علیہ وسلم نے ارشاد فرمایا: ”تم اسے کھاؤ بھی، دوسروں کو بھی کھلاؤ اور سنبھال کر بھی رکھو۔“ [صحیح ابن حبان/كتاب الأضحية/حدیث: 5928]

سیدنا سلمہ بن اکوع رضی اللہ عنہ بیان کرتے ہیں: نبی اکرم صلی اللہ علیہ وسلم نے قربانی کے دن ارشاد فرمایا: ”تم میں سے جس شخص نے قربانی کر لی ہے وہ تین دن کے بعد اپنی قربانی کا گوشت اپنے گھر میں نہ رکھے“ جب اگلا سال آیا تو عید الاضحیٰ کے موقع پر لوگوں نے عرض کی: یا رسول اللہ صلی اللہ علیہ وسلم ! ہم اس مرتبہ بھی ایسا ہی کریں، جس طرح ہم نے گزشتہ سال کیا تھا؟ نبی اکرم صلی اللہ علیہ وسلم نے ارشاد فرمایا: ”جی نہیں، پہلے لوگوں کو فاقہ لاحق تھا اس لیے میں نے چاہا کہ تم لوگ اس بارے میں ان کی مدد کرو اب تم اسے کھاؤ بھی اور دوسروں کو بھی کھلاؤ اور ذخیرہ بھی کرو“۔ [صحیح ابن حبان/كتاب الأضحية/حدیث: 5929]

سیدنا جابر رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کے ہمراہ خشک کیا ہوا گوشت مدینہ منورہ تک کھایا تھا (یعنی ہم نے قربانی کا گوشت سنبھال کر زاد راہ کے طور پر رکھا تھا)۔ [صحیح ابن حبان/كتاب الأضحية/حدیث: 5930]

سیدنا جابر رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کے ساتھ قربانی کے گوشت کو زادِ راہ کے طور پر رکھا تھا اور مدینہ منورہ تک اسے (استعمال کرتے رہے تھے)۔ [صحیح ابن حبان/كتاب الأضحية/حدیث: 5931]

سیدنا ثوبان رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”قربانی کے گوشت کو سنبھال کر رکھ لو۔“ میں نے اسے سنبھال کر رکھ لیا، تو نبی اکرم صلی اللہ علیہ وسلم مدینہ منورہ پہنچنے تک اس گوشت کو استعمال کرتے رہے۔ [صحیح ابن حبان/كتاب الأضحية/حدیث: 5932]

یزید، جو سیدنا سلمہ بن اکوع رضی اللہ عنہ کے غلام ہیں، وہ بیان کرتے ہیں: ان کی بیوی اُم سلیم نے سیدہ عائشہ رضی اللہ عنہا سے قربانی کے گوشت کے بارے میں دریافت کیا تو سیدہ عائشہ رضی اللہ عنہا نے بتایا کہ سیدنا علی بن ابوطالب رضی اللہ عنہ ایک جنگ سے واپس تشریف لائے، وہ اپنی اہلیہ کے پاس تشریف لے گئے تو انہوں نے ان کے سامنے قربانی کا گوشت پیش کیا، سیدنا علی رضی اللہ عنہ نے اسے اس وقت تک کھانے سے انکار کر دیا جب تک وہ اس بارے میں نبی اکرم صلی اللہ علیہ وسلم سے دریافت نہیں کر لیتے (جب انہوں نے نبی اکرم صلی اللہ علیہ وسلم سے دریافت کیا) تو نبی اکرم صلی اللہ علیہ وسلم نے ارشاد فرمایا: ”تم اسے ایک ذوالحجہ سے لے کر اگلے ذوالحجہ تک بھی کھا سکتے ہو۔“ [صحیح ابن حبان/كتاب الأضحية/حدیث: 5933]