سیدنا براء رضی اللہ عنہ بیان کرتے ہیں: ہم لوگ مسجد کے ستون کے پاس موجود تھے، اگر میں اس وقت (مسجد نبوی میں) ہوتا تو میں تمہیں اس کی جگہ بتاتا۔ سیدنا براء رضی اللہ عنہ نے بتایا کہ نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا: ”آج کے دن ہم سب سے پہلے نمازِ عید ادا کریں گے، پھر ہم واپس جا کر قربانی کریں گے، جو شخص ایسا کرے گا وہ ہمارے طریقے پر عمل پیرا ہو گا اور جو شخص اس سے پہلے قربانی کر چکا ہو تو یہ صرف ایک گوشت ہے جو اس نے اپنے اہل خانہ کے لیے تیار کیا ہے، اس کا مذہبی قربانی سے کوئی تعلق نہیں ہے۔“ سیدنا براء رضی اللہ عنہ بیان کرتے ہیں: میرے ماموں سیدنا ابو بردہ بن نیار رضی اللہ عنہ پہلے ہی جانور ذبح کر چکے تھے، انہوں نے عرض کی: یا رسول اللہ صلی اللہ علیہ وسلم ! میں تو پہلے ہی ذبح کر چکا ہوں، اب میرے پاس چھ ماہ کا بچہ ہے جو ایک سال کے بچے سے بہتر ہوتا ہے، تو نبی اکرم صلی اللہ علیہ وسلم نے فرمایا: ”اسے تم اس کی جگہ کر لو، لیکن تمہارے بعد یہ کسی کے لیے جائز نہیں ہو گا۔“ [صحیح ابن حبان/كتاب الأضحية/حدیث: 5907]

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص ہمارے قبلہ کی طرف رخ کرے، ہماری طرح نماز ادا کرے اور ہماری قربانی کی طرح قربانی کرے، تو وہ نماز ادا کرنے سے پہلے قربانی نہ کرے۔“ تو میرے ماموں سیدنا ابوبردہ رضی اللہ عنہ نے عرض کی: یا رسول اللہ صلی اللہ علیہ وسلم ! میں نے تو اپنے بیٹے کی طرف سے قربانی کر لی ہے۔ نبی اکرم صلی اللہ علیہ وسلم نے فرمایا: ”یہ ایک ایسی چیز ہے جسے تم نے اپنے اہل خانہ کے لیے جلدی تیار کر لیا ہے۔“ انہوں نے عرض کی: میرے پاس ایک چھ ماہ کا بچہ ہے۔ نبی اکرم صلی اللہ علیہ وسلم نے فرمایا: ”اسے تم اس کی طرف سے قربان کر لو کیونکہ یہ بہترین قربانی ہے۔“ [صحیح ابن حبان/كتاب الأضحية/حدیث: 5908]

سیدنا جابر رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کے نمازِ عید ادا کرنے سے پہلے جانور ذبح کر لیا تو نبی اکرم صلی اللہ علیہ وسلم نے ارشاد فرمایا: ”تمہارے بعد یہ کسی کے لیے جائز نہیں ہوگا کہ وہ نماز ادا کرنے سے پہلے جانور ذبح کرے۔“ [صحیح ابن حبان/كتاب الأضحية/حدیث: 5909]

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے قربانی کے دن نماز کے بعد ہمیں خطبہ دیتے ہوئے ارشاد فرمایا: ”جس شخص نے ہمارے ساتھ نماز ادا کی اور ہمارے طریقے کے ذریعے قربانی کرنا چاہتا ہے وہ قربانی کر لے گا اور جس شخص نے نماز سے پہلے جانور ذبح کر لیا تھا تو وہ صرف گوشت ہے۔“ سیدنا ابوبردہ بن نیار رضی اللہ عنہ نے عرض کی: یا رسول اللہ صلی اللہ علیہ وسلم ! میں نے تو نماز کے لیے نکلنے سے پہلے ہی جانور قربان کر لیا تھا، میرا یہ خیال تھا کہ آج کھانے پینے کا دن ہے اس لیے میں نے جلدی کی اور اپنے اہل خانہ اور پڑوسیوں کے لیے کھانا تیار کروا لیا۔ نبی اکرم صلی اللہ علیہ وسلم نے ارشاد فرمایا: ”یہ صرف گوشت ہے۔“ انہوں نے عرض کی: میرے پاس ایک چھ ماہ کا بکری کا بچہ ہے جو گوشت کے اعتبار سے ایک سال کے جانور سے بہتر ہے، تو کیا یہ میری طرف سے جائز ہو گا؟ نبی اکرم صلی اللہ علیہ وسلم نے ارشاد فرمایا: ”جی ہاں، یہ تمہاری طرف سے جائز ہو جائے گا، لیکن تمہارے بعد کسی کی طرف سے جائز نہیں ہو گا۔“ [صحیح ابن حبان/كتاب الأضحية/حدیث: 5910]

سیدنا براء بن عازب رضی اللہ عنہ بیان کرتے ہیں: میرے ماموں نے نبی اکرم صلی اللہ علیہ وسلم کے نماز ادا کرنے سے پہلے ہی جانور ذبح کر لیا، نبی اکرم صلی اللہ علیہ وسلم نے ارشاد فرمایا: ”تمہاری بکری صرف گوشت والی بکری ہے اس کا قربانی کے ساتھ کوئی تعلق نہیں ہے“ انہوں نے عرض کی: یا رسول اللہ صلی اللہ علیہ وسلم ! میرے پاس ایک چھ ماہ کا بکری کا بچہ ہے جو ایک سال کے جانور سے بہتر ہے، نبی اکرم صلی اللہ علیہ وسلم نے ارشاد فرمایا: ”یہ تمہاری طرف سے کافی ہو گا، لیکن تمہارے بعد کسی کی طرف سے کافی نہیں ہو گا۔“ [صحیح ابن حبان/كتاب الأضحية/حدیث: 5911]

سیدنا عویمر بن اشقر انصاری رضی اللہ عنہ بیان کرتے ہیں: انہوں نے نمازِ عید کے لیے جانے سے پہلے جانور قربان کر لیا، پھر انہوں نے اس بات کا تذکرہ نبی اکرم صلی اللہ علیہ وسلم سے کیا تو نبی اکرم صلی اللہ علیہ وسلم نے انہیں حکم دیا کہ ”وہ دوسری مرتبہ قربانی کریں۔“ [صحیح ابن حبان/كتاب الأضحية/حدیث: 5912]

سیدنا جندب بن سفیان بجلی رضی اللہ عنہ بیان کرتے ہیں کہ ہم نے نبی اکرم صلی اللہ علیہ وسلم کے ہاں قربانی کی، کچھ لوگوں نے نماز سے پہلے اپنے جانور قربان کر لیے، جب نبی اکرم صلی اللہ علیہ وسلم واپس تشریف لائے اور آپ صلی اللہ علیہ وسلم نے ملاحظہ فرمایا کہ وہ لوگ نماز سے پہلے ہی جانور ذبح کر چکے تھے تو آپ صلی اللہ علیہ وسلم نے ارشاد فرمایا: ”جس شخص نے نماز سے پہلے جانور ذبح کر لیا تھا وہ اس کی جگہ دوسرا جانور ذبح کرے اور جس شخص نے ذبح نہیں کیا تھا، یہاں تک کہ ہم نے نماز ادا کر لی تو اب وہ اللہ کا نام لے کر ذبح کر لے۔“ [صحیح ابن حبان/كتاب الأضحية/حدیث: 5913]

سیدنا عبداللہ بن عمرو رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک شخص سے فرمایا: ”مجھے یہ حکم دیا گیا ہے کہ قربانی کے دن کو عید قرار دوں، اللہ تعالیٰ نے اسے اس امت کے لیے (عید قرار دیا ہے)۔“ ایک صاحب نے عرض کی: یا رسول اللہ صلی اللہ علیہ وسلم ! آپ کی کیا رائے ہے اگر مجھے قربانی کرنے کے لیے صرف مونث جانور ملتا ہے تو کیا میں اس کی قربانی کر لوں؟ نبی اکرم صلی اللہ علیہ وسلم نے ارشاد فرمایا: ”جی نہیں، تم اپنے بال کاٹ لو، ناخن کاٹ لو، زیرِ ناف بال صاف کر لو، اپنی مونچھیں چھوٹی کر لو؛ یہ تمام چیزیں اللہ تعالیٰ کی بارگاہ میں تمہاری قربانی شمار ہوں گی۔“ [صحیح ابن حبان/كتاب الأضحية/حدیث: 5914]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی خدمت میں ایک سینگوں والا مینڈھا لایا گیا جس کے پاؤں، آنکھوں اور پیٹھ کے قریب سیاہ نشان تھا، نبی اکرم صلی اللہ علیہ وسلم اس کے پاس تشریف لائے تاکہ اسے قربان کریں، نبی اکرم صلی اللہ علیہ وسلم نے ارشاد فرمایا: ”اے عائشہ! چھری پکڑاؤ۔“ پھر آپ صلی اللہ علیہ وسلم نے ارشاد فرمایا: ”اسے پتھر پر تیز کر لو۔“ میں نے ایسا ہی کیا، پھر نبی اکرم صلی اللہ علیہ وسلم نے اس چھری کو لیا، اس مینڈھے کو پکڑا، اسے لٹایا اور ذبح کرتے وقت فرمایا: «بِسْمِ اللهِ، اللهُمَّ تَقَبَّلْ مِنْ مُحَمَّدٍ، وَآلِ مُحَمَّدٍ، وَمِنْ أُمَّةِ مُحَمَّدٍ» ”اللہ تعالیٰ کے نام سے برکت حاصل کرتے ہوئے، اے اللہ! محمد، محمد کے گھر والوں اور محمد کی امت کی طرف سے (اسے قربان کر رہا ہوں)۔“ پھر نبی اکرم صلی اللہ علیہ وسلم نے اسے قربان کر دیا۔ [صحیح ابن حبان/كتاب الأضحية/حدیث: 5915]

سیدہ ام سلمہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جب کوئی شخص ذوالحجہ کا چاند دیکھ لے اور اس کا قربانی کرنے کا ارادہ ہو تو اسے اپنے بال اور ناخن نہیں کاٹنے چاہئیں۔“ (امام ابن حبان رحمہ اللہ فرماتے ہیں:) اس روایت میں امام مالک رحمہ اللہ کو وہم ہوا، انہوں نے یہ کہا کہ یہ روایت عمرو بن مسلم سے منقول ہے حالانکہ راوی کا نام عمر بن مسلم بن عمار بن اکیمہ ہے، اس کے بھائی کا نام عمرو بن مسلم ہے لیکن امام مالک رحمہ اللہ نے اس کا زمانہ نہیں پایا، عمرو بن مسلم تابعی ہیں جن کے حوالے سے زہری نے روایات نقل کی ہیں۔ [صحیح ابن حبان/كتاب الأضحية/حدیث: 5916]