سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میرے سامنے مختلف امتوں کو پیش کیا گیا، جب میں نے اپنی امت کو دیکھا، تو ان کی کثرت اور ان کی حالت مجھے بہت اچھی لگی، انہوں نے راستوں اور پہاڑوں کو بھر دیا تھا، اللہ تعالیٰ نے فرمایا: محمد! کیا تم راضی ہو؟ میں نے عرض کی: جی ہاں، اے میرے پروردگار! اللہ تعالیٰ نے فرمایا: ان کے ہمراہ ستر ہزار لوگ کسی حساب کے بغیر جنت میں داخل ہوں گے، یہ وہ لوگ ہیں جو (زمانہ جاہلیت کے طریقے کے مطابق) جھاڑ پھونک نہیں کرتے، (علاج کے طور پر) داغ نہیں لگواتے اور فال نہیں نکالتے اور وہ اپنے پروردگار پر توکل کرتے ہیں۔“ سیدنا عکاشہ رضی اللہ عنہ نے عرض کی: آپ صلی اللہ علیہ وسلم اللہ تعالیٰ سے دعا کیجئے کہ وہ مجھے بھی ان میں شامل کر لے۔ نبی اکرم صلی اللہ علیہ وسلم نے دعا کی: ”اے اللہ! تو اسے ان میں شامل کر لے۔“ پھر ایک اور صاحب نے عرض کی: آپ صلی اللہ علیہ وسلم اللہ تعالیٰ سے دعا کیجئے کہ وہ مجھے بھی ان میں شامل کر لے، تو نبی اکرم صلی اللہ علیہ وسلم نے ارشاد فرمایا: ”عکاشہ تم پر سبقت لے گیا ہے۔“ [صحیح ابن حبان/كتاب الرقى والتمائم/حدیث: 6084]

سیدنا عمران بن حصین رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کے ہاتھ میں چھلا دیکھا، تو دریافت فرمایا: ”یہ کس وجہ سے ہے؟“ اس نے بتایا کہ یہ «الْوَاهِنَةُ» ”کمزوری“ کی وجہ سے ہے۔ نبی اکرم صلی اللہ علیہ وسلم نے فرمایا: ”یہ تیری کمزوری میں صرف اضافہ ہی کرے گا، اسے تم اتار دو، کیونکہ اگر تم ایسی حالت میں مر گئے کہ تم نے یہ پہنا ہوا تو پھر تمہیں اسی کے سپرد کر دیا جائے گا۔“ [صحیح ابن حبان/كتاب الرقى والتمائم/حدیث: 6085]

سیدنا عقبہ بن عامر رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص (زمانہ جاہلیت کے رواج کے مطابق) تعویذ لٹکائے تو اللہ تعالیٰ اس کے (مقصد کو) پورا نہ کرے اور جو شخص (زمانہ جاہلیت کے رواج کے مطابق) دھاگہ لٹکائے تو اللہ تعالیٰ اس کو پورا نہ کرے۔“ [صحیح ابن حبان/كتاب الرقى والتمائم/حدیث: 6086]

سیدنا مغیرہ بن شعبہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص (علاج کے طور پر) داغ لگواتا ہے یا (زمانہ جاہلیت کے دستور کے مطابق) جھاڑ پھونک کرتا ہے وہ توکل سے لاتعلق ہو جاتا ہے۔“ [صحیح ابن حبان/كتاب الرقى والتمائم/حدیث: 6087]

سیدنا عمران بن حصین رضی اللہ عنہ بیان کرتے ہیں: وہ نبی اکرم صلی اللہ علیہ وسلم کی خدمت میں حاضر ہوئے، انہوں نے کلائی پر پیتل کا کڑا پہنا ہوا تھا، نبی اکرم صلی اللہ علیہ وسلم نے دریافت کیا: ”یہ کس وجہ سے ہے؟“ انہوں نے عرض کی: کمزوری کی وجہ سے ہے۔ نبی اکرم صلی اللہ علیہ وسلم نے فرمایا: ”کیا تمہیں یہ بات پسند ہے کہ تمہیں اس کے سپرد کر دیا جائے؟ تم اسے اتار دو۔“ [صحیح ابن حبان/كتاب الرقى والتمائم/حدیث: 6088]

سیدنا عمران بن حصین رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”گزشتہ رات میرے سامنے انبیاء کو پیش کیا گیا، تو کسی نبی کے ساتھ ایک شخص تھا، کسی نبی کے ساتھ دو شخص تھے، کسی نبی کے ساتھ کچھ لوگ تھے، یہاں تک کہ میں نے بہت سے لوگوں کو دیکھا، میں نے یہ گمان کیا کہ شاید یہ میری امت ہے۔ میں نے دریافت کیا: یہ کون لوگ ہیں؟ تو بتایا گیا: یہ سیدنا موسیٰ علیہ السلام کی قوم کے افراد ہیں۔ پھر میں نے بہت زیادہ لوگوں کو دیکھا جنہوں نے آسمان کے افق کو بھر دیا تھا، میں نے دریافت کیا: یہ کون لوگ ہیں؟ تو بتایا گیا: یہ آپ صلی اللہ علیہ وسلم کی امت ہے۔ میں اس بات پر بہت خوش ہوا، مسرور ہوا۔ پھر بتایا گیا کہ آپ صلی اللہ علیہ وسلم کی امت میں ان لوگوں کے بعد ستر ہزار لوگ جنت میں داخل ہوں گے جن سے کوئی حساب نہیں لیا جائے گا اور انہیں کوئی عذاب نہیں ہو گا۔“ پھر نبی اکرم صلی اللہ علیہ وسلم اٹھ کر تشریف لے گئے۔ حاضرین نے سوچا: یہ کون لوگ ہوں گے؟ وہ آپس میں اس بارے میں بات چیت کرتے رہے، پھر ان سب نے اس بارے میں اتفاق کیا کہ یہ وہ لوگ ہوں گے جو مسلمان گھرانے میں پیدا ہوئے اور ہمیشہ مسلمان رہے، جنہوں نے شرک کا زمانہ پایا ہی نہیں۔ پھر نبی اکرم صلی اللہ علیہ وسلم تشریف لائے، لوگوں نے آپ صلی اللہ علیہ وسلم سے ان لوگوں کے بارے میں دریافت کیا، تو آپ صلی اللہ علیہ وسلم نے فرمایا: ”یہ وہ لوگ ہوں گے جو (علاج میں) داغ نہیں لگواتے ہوں گے، اور (زمانہ جاہلیت کے رواج کے مطابق) جھاڑ پھونک نہیں کرتے ہوں گے، اور فال نہیں نکالتے ہوں گے، اور اپنے پروردگار پر توکل کرتے ہوں گے۔“ (امام ابن حبان رحمہ اللہ فرماتے ہیں:) داغ لگوانے اور جھاڑ پھونک کرنے میں ممانعت کی علت یہ ہے کہ زمانہ جاہلیت کے لوگ اس پر عمل کرتے تھے اور وہ یہ سمجھتے تھے کہ اللہ تعالیٰ کے حکم کے بغیر وہ لوگ محض ان دو چیزوں سے ٹھیک ہو جاتے ہیں، تو جب یہ علت موجود ہو گی ان دونوں چیزوں سے ممانعت باقی رہی، لیکن جب کوئی شخص ان پر عمل کرے اور ان دونوں کو ایسا سبب قرار دے جو اللہ کے فیصلے کے مطابق آدمی کی تندرستی کے لیے سبب بنتا ہے اور وہ شخص یہ نہ سمجھے کہ محض ان دونوں کاموں کی وجہ سے (فائدہ ہوتا ہے) تو ایسا کرنا جائز ہو گا۔ [صحیح ابن حبان/كتاب الرقى والتمائم/حدیث: 6089]

یزید بن جزار بیان کرتے ہیں کہ سیدنا عبداللہ رضی اللہ عنہ ایک خاتون کے پاس تشریف لے گئے جس نے اپنی گردن میں تعویذ باندھا ہوا تھا، سیدنا عبداللہ رضی اللہ عنہ نے اسے کھینچ کر کاٹ دیا، پھر انہوں نے فرمایا: عبداللہ کے گھر والے اس بات سے بے نیاز ہیں کہ وہ کسی کو اللہ کا شریک قرار دیں جب تک اس بارے میں کوئی دلیل نازل نہیں ہوتی، پھر انہوں نے یہ بات بیان کی کہ میں نے نبی صلی اللہ علیہ وسلم کو یہ ارشاد فرماتے ہوئے سنا ہے: ”بے شک جھاڑ پھونک، تعویذ اور تولہ شرک ہے۔“ لوگوں نے کہا: اے ابوعبدالرحمن! جھاڑ پھونک اور تعویذ کا تو ہمیں علم ہے، لیکن یہ لفظ «تِّوَلَة» کیا ہوتا ہے؟ انہوں نے فرمایا: یہ وہ کام ہے جو خواتین کرتی ہیں تاکہ اپنے شوہروں کی محبت حاصل کر لیں۔ [صحیح ابن حبان/كتاب الرقى والتمائم/حدیث: 6090]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے جھاڑ پھونک سے منع کیا ہے، میرے ماموں بچھو کے کاٹے کا دم کیا کرتے تھے، وہ نبی اکرم صلی اللہ علیہ وسلم کی خدمت میں حاضر ہوئے، انہوں نے آپ صلی اللہ علیہ وسلم کے سامنے اس بات کا تذکرہ کیا، تو آپ صلی اللہ علیہ وسلم نے ارشاد فرمایا: ”تم میں سے جو شخص اپنے کسی بھائی کو کوئی بھی فائدہ پہنچا سکتا ہو اسے وہ کرنا چاہیے۔“ [صحیح ابن حبان/كتاب الرقى والتمائم/حدیث: 6091]

کریب کندی بیان کرتے ہیں کہ سیدنا امام زین العابدین رضی اللہ عنہ نے میرا ہاتھ پکڑا اور ہم لوگ قریش سے تعلق رکھنے والے ایک عمر رسیدہ صاحب کے پاس چلے گئے، ان کا نام ابن ابی حثمہ تھا، وہ ستون کی طرف منہ کر کے نماز ادا کر رہے تھے، ہم ان کے پاس بیٹھ گئے، جب انہوں نے امام زین العابدین رضی اللہ عنہ کو دیکھا تو نماز ختم کر کے ان کے پاس آئے۔ امام زین العابدین رضی اللہ عنہ نے ان سے کہا: آپ دم کرنے کے بارے میں اپنی والدہ کی نقل کردہ روایت ہمیں بیان کیجئے، تو انہوں نے بتایا کہ میری والدہ نے مجھے یہ بات بتائی ہے کہ وہ زمانہ جاہلیت میں دم کیا کرتی تھیں، جب اسلام آ گیا تو انہوں نے یہ کہا: میں اس وقت تک دم نہیں کروں گی جب تک میں نبی اکرم صلی اللہ علیہ وسلم سے اس بارے میں اجازت نہیں لیتی، وہ نبی اکرم صلی اللہ علیہ وسلم کی خدمت میں حاضر ہوئیں، انہوں نے نبی اکرم صلی اللہ علیہ وسلم سے اجازت مانگی تو نبی اکرم صلی اللہ علیہ وسلم نے ان سے فرمایا: ”تم دم کرو جب کہ اس کے الفاظ میں شرک نہ ہو۔“ [صحیح ابن حبان/كتاب الرقى والتمائم/حدیث: 6092]

قیس بن طلق اپنے والد (رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم کی موجودگی میں ایک بچھو نے مجھے ڈنک مار دیا، تو نبی اکرم صلی اللہ علیہ وسلم نے مجھے دم کیا اور (اس جگہ پر) دست مبارک پھیرا۔ [صحیح ابن حبان/كتاب الرقى والتمائم/حدیث: 6093]