سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”بدشگونی کی کوئی حیثیت نہیں ہے اور ان میں سب سے بہتر چیز فال ہے“ عرض کی گئی: یا رسول اللہ ( صلی اللہ علیہ وسلم )! فال سے کیا مراد ہے؟ نبی اکرم صلی اللہ علیہ وسلم نے فرمایا: ”وہ اچھی بات جسے کوئی شخص سنتا ہے۔“ [صحیح ابن حبان/كتاب العدوى والطيرة والفأل/حدیث: 6124]

سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”بدشگونی کی کوئی حیثیت نہیں ہے اور سب سے بہترین فال وہ اچھا کلمہ ہے جسے کوئی شخص سنتا ہے۔“ [صحیح ابن حبان/كتاب العدوى والطيرة والفأل/حدیث: 6125]

سیدہ اُمِ کرز رضی اللہ عنہا بیان کرتی ہیں کہ انہوں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: «أَقِرُّوا الطَّيْرَ عَلَى مَكِنَاتِهَا» ”پرندوں کو ان کے گھونسلوں میں رہنے دو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”پرندوں کو ان کے گھونسلوں میں رہنے دو“ یہ الفاظ اس بات کے متقاضی ہیں کہ اس کے متضاد کو ترک کر دیا جائے، وہ یہ کہ پرندوں کو ان کے گھونسلوں سے نہ اڑایا جائے اور اس ممانعت کے ذریعے مراد کسی تیسری چیز سے منع کرنا ہے اور وہ یہ کہ عربوں کا یہ معمول تھا، جب وہ کوئی کام کرنے کا ارادہ کرتے تھے تو کسی پرندے کے گھونسلے کے پاس آ کر اسے اڑا دیتے تھے، اگر وہ دائیں طرف اڑ کر جاتا تھا تو آدمی وہ کام کر لیتا تھا جس کو کرنے کا اس نے ارادہ کیا تھا اور اگر وہ بائیں طرف اڑ کر جاتا تھا تو آدمی وہ کام نہیں کرتا تھا اور اسے بدشگونی سمجھتا تھا۔ نبی اکرم صلی اللہ علیہ وسلم نے ان لوگوں کو اس چیز کے اختیار کرنے سے منع کیا اور یہ الفاظ استعمال کیے: ”پرندوں کو ان کے گھونسلوں میں رہنے دو۔“ [صحیح ابن حبان/كتاب العدوى والطيرة والفأل/حدیث: 6126]

سعید بن المسیب رحمہ اللہ بیان کرتے ہیں: میں نے سیدنا سعد بن ابی وقاص رضی اللہ عنہ سے طیرہ کے بارے میں دریافت کیا تو انہوں نے بتایا: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ” «عَدْوَى»، «طِيَرَة» اور «هَام» کی کوئی حیثیت نہیں ہے، اگر طیرہ کسی چیز میں ہونی ہوتی تو عورت میں یا گھوڑے میں یا گھر میں ہوتی۔“ [صحیح ابن حبان/كتاب العدوى والطيرة والفأل/حدیث: 6127]

سیدنا جابر بن عبداللہ رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”عدوی، صفر اور غول کی کوئی حیثیت نہیں ہے۔“ [صحیح ابن حبان/كتاب العدوى والطيرة والفأل/حدیث: 6128]