سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ” «لَا عَدْوَى وَلَا طِيَرَةَ، وَيُعْجِبُنِي الْفَأْلُ» ”عدوی اور طیرہ کوئی حقیقت نہیں ہے، البتہ مجھے فال پسند ہے“۔“ [صحیح ابن حبان/كتاب العدوى والطيرة والفأل/حدیث: 6114]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ” «عَدْوَىٰ» (بیماری کے متعدی ہونے) کی کوئی حیثیت نہیں ہے۔“ انہوں نے یہ بات بھی بیان کی کہ نبی اکرم صلی اللہ علیہ وسلم نے ارشاد فرمایا ہے: ”بیمار شخص تندرست کے پاس نہ آئے۔“ ابوسلمہ کہتے ہیں: سیدنا ابوہریرہ رضی اللہ عنہ ہمیں یہ دونوں روایات نبی اکرم صلی اللہ علیہ وسلم کے حوالے سے بیان کرتے تھے، اس کے بعد سیدنا ابوہریرہ رضی اللہ عنہ یہ بیان کرنے سے رک گئے کہ بیماری کے متعدی ہونے کی کوئی حیثیت نہیں ہے، البتہ وہ یہ چیز بیان کرتے رہے کہ کسی بیمار کو کسی تندرست کے پاس نہ لایا جائے۔ حارث نامی شخص، جو سیدنا ابوہریرہ رضی اللہ عنہ کے چچازاد تھے، انہوں نے کہا: اے سیدنا ابوہریرہ رضی اللہ عنہ! پہلے تو میں آپ کو یہ بیان کرتے ہوئے سنتا رہا ہوں کہ آپ اس کے ساتھ ایک اور حدیث بھی بیان کیا کرتے تھے، اب آپ نے اسے بیان نہیں کیا جسے آپ پہلے بیان کرتے تھے۔ نبی اکرم صلی اللہ علیہ وسلم نے یہ بات ارشاد فرمائی ہے: ”بیماری کے متعدی ہونے کی کوئی حیثیت نہیں ہے۔“ تو سیدنا ابوہریرہ رضی اللہ عنہ نے اس بات کو ماننے سے انکار کر دیا اور انہوں نے یہی کہا کہ کسی بیمار کو تندرست کے پاس نہ لایا جائے۔ ابوسلمہ نامی راوی کہتے ہیں: مجھے اپنی زندگی کی قسم! سیدنا ابوہریرہ رضی اللہ عنہ ہمیں یہ حدیث بیان کرتے رہے ہیں کہ نبی اکرم صلی اللہ علیہ وسلم نے ارشاد فرمایا ہے: ”بیماری کے متعدی ہونے کی کوئی حیثیت نہیں ہے۔“ اب مجھے نہیں معلوم کہ کیا سیدنا ابوہریرہ رضی اللہ عنہ اس بات کو بھول گئے تھے یا ان میں سے ایک قول نے دوسرے کو منسوخ کر دیا۔ (امام ابن حبان رحمہ اللہ فرماتے ہیں:) ان دونوں روایات میں کوئی تضاد نہیں ہے اور نہ ہی ان میں سے ایک دوسرے کو منسوخ کرتی ہے، تاہم نبی اکرم صلی اللہ علیہ وسلم کا یہ فرمان: ”بیماری کے متعدی ہونے کی کوئی حیثیت نہیں ہے“ یہ ایک ایسی سنت ہے جس پر عمومی طور پر عمل کیا جائے گا۔ نبی اکرم صلی اللہ علیہ وسلم کا یہ فرمان: ”کسی بیمار کو تندرست کے پاس نہ لایا جائے“، اس کے ذریعے آپ صلی اللہ علیہ وسلم کی مراد یہ ہے کہ اس بات کا اعتقاد نہ رکھا جائے کہ بیماری کے متعدی ہونے پر عمل کرتے ہوئے تم جان بوجھ کر اپنے بھائی کو کوئی نقصان پہنچا دو، اگرچہ بیماری کا متعدی ہونا نقصان نہیں دیتا۔ [صحیح ابن حبان/كتاب العدوى والطيرة والفأل/حدیث: 6115]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”عدوی، صفر اور ہامہ کی کوئی حیثیت نہیں ہے۔“ ایک دیہاتی نے عرض کی: یا رسول اللہ صلی اللہ علیہ وسلم ! اونٹوں کا کیا معاملہ ہے، وہ ریگستان میں یوں بھاگتے پھرتے ہیں جیسے وہ ہرن ہوتے ہیں، پھر ایک خارش زدہ اونٹ آتا ہے اور ان میں شامل ہوتا ہے، تو ان کو خارش زدہ کر دیتا ہے۔ نبی اکرم صلی اللہ علیہ وسلم نے دریافت فرمایا: ”پہلے کو کس نے خارش کا شکار کیا تھا؟“ [صحیح ابن حبان/كتاب العدوى والطيرة والفأل/حدیث: 6116]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ” «لَا طِيَرَةَ وَلَا هَامَةَ وَلَا عَدْوَىٰ وَلَا صَفَرَ» ”طیرہ، ہامہ، عدوی اور صفر کی کوئی حیثیت نہیں ہے۔““ ایک صاحب نے عرض کی: یا رسول اللہ صلی اللہ علیہ وسلم ! ہم ایک خارش زدہ بکری لیتے ہیں، اسے بکریوں کے ریوڑ میں چھوڑ دیتے ہیں، تو دوسری بکریاں بھی خارش زدہ ہو جاتی ہیں۔ نبی اکرم صلی اللہ علیہ وسلم نے ارشاد فرمایا: ”پہلی کو کس نے خارش کا شکار کیا تھا؟“ [صحیح ابن حبان/كتاب العدوى والطيرة والفأل/حدیث: 6117]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ” «لَا عَدْوَىٰ وَلَا طِيَرَةَ» ”عدوی اور طیرہ کی کوئی حیثیت نہیں ہے،“ ایک اونٹ خارش زدہ ہوتا ہے تو وہ ایک سو اونٹوں کو خارش زدہ کر دیتا ہے، لیکن پہلے کو کس نے خارش کا شکار کیا؟“ [صحیح ابن حبان/كتاب العدوى والطيرة والفأل/حدیث: 6118]

سیدنا ابوہریرہ رضی اللہ عنہ بیان کرتے ہیں کہ ایک دیہاتی نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! اونٹ کی موٹی جلد پر (راوی کو شک ہے یا شاید) پشت کی زیریں ہڈی پر خارش سے پہلے والی جلد کی خرابی لاحق ہوتی ہے (راوی کو شک ہے شاید یہ الفاظ ہیں) تو تمام اونٹ خارش زدہ ہو جاتے ہیں۔ نبی اکرم صلی اللہ علیہ وسلم نے فرمایا: ”تو پہلے کو کس نے بیماری میں مبتلا کیا؟ اس کی زندگی، اس کی مصیبت اور اس کا رزق (اللہ تعالیٰ کے دست قدرت میں ہے)۔“ (امام ابن حبان رحمہ اللہ فرماتے ہیں:) روایت کے متن میں استعمال ہونے والا لفظ ”اس کی مصیبت“ درست نہیں ہے بلکہ اصل لفظ ”اس کی موت“ ہے، تاہم روایت میں اسی طرح منقول ہے ”اس کی مصیبت“، یہ بات شیخ نے بیان کی ہے۔ [صحیح ابن حبان/كتاب العدوى والطيرة والفأل/حدیث: 6119]

سیدنا جابر بن عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک مجذوم شخص کا ہاتھ پکڑا، اسے اپنے ساتھ پیالے میں داخل کیا اور فرمایا: «كُلْ بِاسْمِ اللّٰهِ، ثِقَةً بِاللّٰهِ وَتَوَكُّلًا عَلَيْهِ» ”تم اللہ کا نام لے کر اللہ تعالیٰ پر یقین رکھتے ہوئے اور اس پر توکل کر کے کھاؤ۔“ (امام ابن حبان رحمہ اللہ فرماتے ہیں:) مفضل بن فضالہ نامی راوی یہ مبارک بن فضالہ کا بھائی ہے، یہ مفضل بن فضالہ قتبانی نہیں ہے، ویسے یہ دونوں راوی ثقہ ہیں۔ [صحیح ابن حبان/كتاب العدوى والطيرة والفأل/حدیث: 6120]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم کو فال پسند تھی اور آپ صلی اللہ علیہ وسلم بدشگونی کو ناپسند کرتے تھے۔ [صحیح ابن حبان/كتاب العدوى والطيرة والفأل/حدیث: 6121]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ” «الطِّيَرَةُ شِرْكٌ» بدشگونی شرک ہے، ہم میں سے ہر شخص (کو شگون لاحق ہوتا ہے) تاہم اللہ تعالیٰ توکل کے ذریعے اسے ختم کر دیتا ہے۔“ [صحیح ابن حبان/كتاب العدوى والطيرة والفأل/حدیث: 6122]

سیدنا انس بن مالک رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ” «الطِّيَرَةُ» ”طیرہ“ کی کوئی حیثیت نہیں ہے، اس کا وبال اس پر ہو گا جو بدشگونی کرے گا، اگر یہ (نحوست) کسی چیز میں ہوتی تو گھر میں ہوتی، یا گھوڑے میں ہوتی، یا عورت میں ہوتی۔“ [صحیح ابن حبان/كتاب العدوى والطيرة والفأل/حدیث: 6123]