سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کے انصاری صحابہ میں سے ایک صاحب نے مجھے یہ بات بتائی کہ ایک مرتبہ وہ لوگ نبی اکرم صلی اللہ علیہ وسلم کے ساتھ بیٹھے ہوئے تھے، اسی دوران کوئی ستارا ٹوٹا اور روشنی سی نظر آئی، نبی اکرم صلی اللہ علیہ وسلم نے ان لوگوں سے دریافت کیا: ”جب اس طرح کا کوئی ستارا ٹوٹتا تھا، تو تم لوگ زمانہ جاہلیت میں کیا سمجھتے تھے؟“ لوگوں نے عرض کی: ”ہم یہ کہتے تھے کہ آج رات کوئی بڑا آدمی پیدا ہو گا یا کوئی بڑا آدمی فوت ہو جائے گا۔“ نبی اکرم صلی اللہ علیہ وسلم نے ارشاد فرمایا: ”یہ کسی کے مرنے یا پیدا ہونے کی وجہ سے نہیں ٹوٹتے ہیں، بلکہ ہمارا پروردگار جب کوئی فیصلہ سناتا ہے تو عرش کو اٹھانے والے فرشتے تسبیح بیان کرتے ہیں، پھر ان کے بعد والے فرشتے تسبیح بیان کرتے ہیں، یہاں تک کہ یہ تسبیح آسمانِ دنیا تک پہنچ جاتی ہے۔ عرش کو اٹھانے والے فرشتوں کے قریب جو فرشتے ہوتے ہیں (یعنی ساتویں آسمان کے فرشتے) وہ دریافت کرتے ہیں: ہمارے پروردگار نے کیا فرمایا ہے؟ تو (عرش کو اٹھانے والے فرشتے) انہیں اس بارے میں بتاتے ہیں، اسی طرح تمام آسمانوں کے فرشتے دوسرے آسمان والوں کو اس بارے میں اطلاع دیتے ہیں، یہاں تک کہ آسمانِ دنیا تک یہ بات پہنچ جاتی ہے، تو کوئی جن اسے اچک لیتا ہے اور اپنے دوستوں کی طرف اسے القاء کر دیتا ہے اور وہ اس میں ملاوٹ بھی کر دیتا ہے؛ تو جب (کسی کاہن کی کہی ہوئی بات) درست ثابت ہوتی ہے تو وہ اس حق کی وجہ سے ہوتی ہے، تاہم وہ لوگ اس میں اور بہت سے جھوٹ شامل کر دیتے ہیں (اس لیے ان کی بہت سی باتیں غلط بھی ثابت ہوتی ہیں)۔“ یہاں مبشر نامی راوی کو شک ہے، شاید یہ الفاظ ہیں: ”وہ اس بات میں اضافہ کر دیتے ہیں۔“ [صحیح ابن حبان/كتاب النجوم والأنواء/حدیث: 6129]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اگر اللہ تعالیٰ سات سال تک لوگوں سے بارش کو روک لے اور پھر اسے برسا دے تو ان لوگوں میں سے ایک گروہ انکار کرتے ہوئے پھر بھی یہی کہے گا کہ «المُجْدِحِ» ”مجدح“ ستارے کی وجہ سے ہم پر بارش نازل ہوئی ہے۔“ (امام ابن حبان رحمہ اللہ فرماتے ہیں:) مجدح سے مراد ”دبران“ ہے اور یہ چاند کی منزلوں میں چوتھی منزل پر ہوتا ہے۔ [صحیح ابن حبان/كتاب النجوم والأنواء/حدیث: 6130]

سیدنا قبیصہ بن مخارق رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”عیافہ، طیرہ اور طرق شیطان کی طرف سے ہوتے ہیں۔“ (امام ابن حبان رحمہ اللہ فرماتے ہیں:) طرق سے مراد نجوم (پر اعتقاد رکھنا) ہے اور طرق سے مراد بتوں کے لیے پتھروں سے کھیلنا ہے۔ [صحیح ابن حبان/كتاب النجوم والأنواء/حدیث: 6131]

سیدنا زید بن خالد جہنی رضی اللہ عنہ بیان کرتے ہیں: حدیبیہ میں نبی اکرم صلی اللہ علیہ وسلم نے ہمیں صبح کی نماز پڑھائی، گزشتہ رات بارش ہو چکی تھی، نبی اکرم صلی اللہ علیہ وسلم نماز پڑھ کر فارغ ہوئے تو آپ صلی اللہ علیہ وسلم نے لوگوں کی طرف توجہ کی اور فرمایا: ”کیا تم لوگ یہ بات جانتے ہو تمہارے پروردگار نے کیا ارشاد فرمایا ہے؟“ لوگوں نے عرض کی: اللہ اور اس کے رسول صلی اللہ علیہ وسلم بہتر جانتے ہیں۔ نبی اکرم صلی اللہ علیہ وسلم نے فرمایا: ”اللہ تعالیٰ نے یہ فرمایا ہے کہ میرے کچھ بندے مجھ پر ایمان رکھنے والے ہیں اور کچھ میرا کفر کرنے والے ہیں، جو شخص یہ کہتا ہے کہ ہم پر اللہ کے فضل اور اس کی رحمت کی وجہ سے بارش نازل ہوئی ہے وہ مجھ پر ایمان رکھتا ہے اور ستاروں کا انکار کرتا ہے اور جو شخص یہ کہتا ہے کہ فلاں اور فلاں ستارے کی وجہ سے ہم پر بارش نازل ہوئی ہے تو وہ میرا انکار کرتا ہے اور ستاروں پر ایمان رکھتا ہے۔“ [صحیح ابن حبان/كتاب النجوم والأنواء/حدیث: 6132]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ” «لَا عَدْوَىٰ وَلَا هَامَةَ وَلَا صَفَرَ وَلَا نَوْءَ» ”عدوی، ہامہ، صفر اور نوء کی کوئی حیثیت نہیں ہے۔““ [صحیح ابن حبان/كتاب النجوم والأنواء/حدیث: 6133]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”علم کی کنجیاں پانچ ہیں، جنہیں اللہ تعالیٰ کے علاوہ کوئی نہیں جانتا: کوئی شخص یہ بات نہیں جانتا کہ رحم میں کیا ہے، بس اللہ جانتا ہے، اور کوئی شخص یہ نہیں جانتا کہ کل کیا ہو گا، صرف اللہ جانتا ہے، کوئی یہ نہیں جانتا کہ بارش کب ہو گی، صرف اللہ جانتا ہے، کوئی شخص یہ نہیں جانتا کہ وہ کہاں مرے گا، صرف اللہ جانتا ہے، اور کوئی شخص یہ نہیں جانتا کہ قیامت کب آئے گی، صرف اللہ جانتا ہے۔“ [صحیح ابن حبان/كتاب النجوم والأنواء/حدیث: 6134]

سیدنا انس رضی اللہ عنہ بیان کرتے ہیں کہ ہم پر بارش نازل ہوئی اور ہم اس وقت نبی اکرم صلی اللہ علیہ وسلم کے ساتھ تھے، تو نبی اکرم صلی اللہ علیہ وسلم نے بارش کے لیے اپنا کپڑا ہٹا دیا، تو ہم نے عرض کی: یا رسول اللہ صلی اللہ علیہ وسلم ! آپ نے ایسا کیوں کیا ہے؟ آپ صلی اللہ علیہ وسلم نے فرمایا: ”کیونکہ یہ پروردگار کی بارگاہ سے آ رہی ہے۔“ [صحیح ابن حبان/كتاب النجوم والأنواء/حدیث: 6135]