سیدنا قتادہ بن نعمان رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: قربانی کو کھاؤ اور اس کو ذخیرہ بھی کر سکتے ہو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7760]

سیدنا عبداللہ بن عباس رضی اللہ عنہما فرماتے ہیں: ایک آدمی نے بکری کو ذبح کرنے کے لیے لٹایا ہوا تھا اور چھری تیز کر رہا تھا، نبی اکرم صلی اللہ علیہ وسلم نے فرمایا: کیا تم اس کو کئی موتیں مارنا چاہتے ہو؟ تم نے اس کو لٹانے سے پہلے چھری تیز کیوں نہیں کر لی؟ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7761]

سیدنا عبداللہ بن عباس رضی اللہ عنہما فرمایا کرتے تھے: اللہ تبارک و تعالیٰ نے فرمایا ہے: اذْكُرُوا اسْمَ اللَّهِ عَلَيْهَا صَوَافَّ ” تو ان پر اللہ کا نام لو ایک پاؤں بندھے تین پاؤں سے کھڑے “ آپ فرماتے ہیں: اس کا مطلب یہ ہے کہ جانور کا ایک پاؤں باندھ دو، اور وہ تین پاؤں پر کھڑا رہے، اور یہ تکبیر پڑھو، بِسْمِ اللَّهِ وَاللَّهُ أَكْبَرُ اللَّهُمَّ مِنْكَ وَإِلَيْكَ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7762]

سیدنا عبداللہ بن عباس رضی اللہ عنہما فرماتے ہیں: جو شخص (مسلمان) ذبح کرتے وقت تکبیر پڑھنا بھول جائے، اس کا ذبیحہ کھا سکتے ہیں۔ اور مجوسی تکبیر پڑھ کر بھی ذبح کرے تب بھی نہ کھاؤ۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7763]

سیدنا عبداللہ بن عباس رضی اللہ عنہما فرماتے ہیں: مشرکین، مسلمانوں سے جھگڑتے تھے، وہ کہتے تھے: جو جانور یہ خود مارتے ہیں، اس کو کھا لیتے ہیں اور جس کو اللہ تعالیٰ مارتا ہے، اس کو نہیں کھاتے۔ اس پر یہ آیت نازل ہوئی۔ وَلَا تَأْكُلُوا مِمَّا لَمْ يُذْكَرِ اسْمُ اللَّهِ عَلَيْهِ (الأنعام: 121) ” اور اسے نہ کھاؤ جس پر اللہ کا نام نہ لیا گیا “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7764]

سیدنا عبداللہ بن عمرو رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: جس نے کسی چڑیا یا اس سے بھی چھوٹے جاندار کو ناحق قتل کیا، قیامت کے دن اللہ تعالیٰ اس کے بارے میں پوچھے گا۔ آپ صلی اللہ علیہ وسلم سے پوچھا گیا: یا رسول اللہ صلی اللہ علیہ وسلم ! تو چڑیا کو برحق قتل کرنے کی کیا صورت ہو سکتی ہے؟ آپ صلی اللہ علیہ وسلم نے فرمایا: اس کو ذبح کر کے کھاؤ، اور اس کا سر الگ کر کے پھینک مت دو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7765]

سیدنا سعید بن جبیر رضی اللہ عنہ فرماتے ہیں: میں سیدنا عبداللہ بن عمر رضی اللہ عنہما کے ہمراہ مدینہ شریف کی ایک گلی میں سے گزر رہا تھا، وہاں کچھ بچے ایک مرغی کو زمین میں گاڑ کر اس کو پتھر مار رہے تھے، سیدنا عبداللہ بن عمر رضی اللہ عنہما بہت ناراض ہوئے، اور پوچھا: یہ کام کس نے کیا؟ وہ سب بچے وہاں سے بھاگ گئے، سیدنا عبداللہ بن عمر رضی اللہ عنہما نے فرمایا: اللہ تعالیٰ کی اس پر لعنت ہے جو جانور کا مثلہ کرے۔ (مثلہ کا مطلب ہے شکل بگاڑنا) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7766]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ابوہیثم بن تیہان رضی اللہ عنہ سے فرمایا: دودھ دار جانور کو ذبح مت کرو، ہمارے لیے عناق (ایسی بکری جو دودھ نہ دیتی ہو) کو ذبح کرو۔ چنانچہ سیدنا ابوالہیثم نے اپنی بیوی کو کہا، اس نے ان کے لیے آٹا گوندھا، اور ابوہیثم نے گوشت بنا کر دیا، ان کی بیوی نے روٹیاں پکائیں اور گوشت بھونا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7767]

سیدنا علی رضی اللہ عنہ فرماتے ہیں کہ رسول اللہ صلی اللہ علیہ وسلم نے دودھ دینے والا جانور ذبح کرنے سے اور سورج طلوع ہونے سے پہلے سودا بیچنے سے منع فرمایا۔ [المستدرك على الصحيحين/كتاب الذبائح/حدیث: 7768]

سیدنا عبداللہ بن عمرو بن العاص رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: چالیس عادتیں (اچھی) ہیں، ان میں سب سے اعلیٰ۔ بکری کو منیحہ کرنا ہے (منیحہ وہ دودھ والی بکری یا اونٹنی ہے جس کو ایک معین مدت تک دودھ کے لیے مستعار لیا جاتا ہے اور پھر مالک کو واپس کر دی جاتی ہے) انسان ان میں سے کوئی کام بھی ثواب کی نیت سے کرے اور جو اس سے وعدہ کیا گیا ہے اس کی تصدیق کے طور پر کرے تو اللہ تعالیٰ اس کو جنت میں داخل فرمائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الذبائح/حدیث: 7769]