سیدنا ابن عمر رضی اللہ عنہما سے روایت ہے، فرمایا کہ ”ایسے جانور پر سواری کرنے سے منع کیا گیا ہے جو گندگی کھاتا ہو۔“ [سنن ابي داود/كتاب الجهاد /حدیث: 2557]

سیدنا ابن عمر رضی اللہ عنہ سے منقول ہے، انہوں نے فرمایا کہ رسول اللہ صلی اللہ علیہ وسلم نے ”ایسے اونٹ کی سواری سے منع فرمایا جو گندگی کھاتا ہو۔“ [سنن ابي داود/كتاب الجهاد /حدیث: 2558]

سیدنا معاذ بن جبل رضی اللہ عنہ بیان کرتے ہیں کہ ”میں رسول اللہ صلی اللہ علیہ وسلم کے ساتھ ایک گدھے پر آپ صلی اللہ علیہ وسلم کے پیچھے بیٹھا ہوا تھا جسے «عُفَيْرٌ» ”عفیر“ کہا جاتا تھا۔“ [سنن ابي داود/كتاب الجهاد /حدیث: 2559]

سیدنا سمرہ بن جندب رضی اللہ عنہ سے روایت ہے کہ «أَمَّا بَعْدُ»: نبی کریم صلی اللہ علیہ وسلم ہمارے سواروں کو، جب ہم گھبراتے تو «خَيْلَ اللّٰهِ» ”اللہ کے شہسوار بندو!“ کہہ کر پکارتے، اور رسول اللہ صلی اللہ علیہ وسلم ہمیں حکم دیتے تھے کہ ”جب خوف اور گھبراہٹ کی کیفیت ہو تو اکٹھے ہو جایا کریں، صبر اور سکون سے کام لیں اور ایسے ہی قتال کے وقت کیا کریں۔“ [سنن ابي داود/كتاب الجهاد /حدیث: 2560]

سیدنا عمران بن حصین رضی اللہ عنہ سے منقول ہے کہ نبی کریم صلی اللہ علیہ وسلم ایک سفر میں تھے، پس آپ صلی اللہ علیہ وسلم نے (کسی سے) لعنت کرنے کی آواز سنی تو آپ صلی اللہ علیہ وسلم نے پوچھا: ”یہ کیا ہے؟“ صحابہ نے کہا: ”فلاں عورت ہے جس نے اپنی سواری کو لعنت کی ہے۔“ تو نبی کریم صلی اللہ علیہ وسلم نے فرمایا: ”اس سے (کجاوہ اور سامان) اتار دو۔ بلاشبہ یہ اب ملعونہ ہے۔“ چنانچہ صحابہ نے اس سے (سامان وغیرہ) اتار دیا۔ عمران رضی اللہ عنہ کہتے ہیں: ”گویا میں اس کی طرف دیکھ رہا ہوں کہ وہ سیاہی مائل اونٹنی تھی۔“ [سنن ابي داود/كتاب الجهاد /حدیث: 2561]

سیدنا ابن عباس رضی اللہ عنہما سے مروی ہے کہ ”رسول اللہ صلی اللہ علیہ وسلم نے اس بات سے منع فرمایا ہے کہ جانوروں کو آپس میں لڑایا جائے۔“ [سنن ابي داود/كتاب الجهاد /حدیث: 2562]

سیدنا انس بن مالک رضی اللہ عنہ کا بیان ہے کہ ”میرے بھائی (عبداللہ بن ابی طلحہ) کی ولادت ہوئی تو میں اسے لے کر نبی کریم صلی اللہ علیہ وسلم کی خدمت میں حاضر ہوا تاکہ آپ صلی اللہ علیہ وسلم اسے گھٹی دیں۔ میں نے آپ صلی اللہ علیہ وسلم کو بکریوں کے باڑے میں پایا، آپ صلی اللہ علیہ وسلم بکریوں کو نشان لگا رہے تھے۔“ (شعبہ نے) کہا میرا خیال ہے، شیخ نے بیان کیا کہ ”آپ صلی اللہ علیہ وسلم ان کے کانوں پر نشان لگا رہے تھے۔“ [سنن ابي داود/كتاب الجهاد /حدیث: 2563]

سیدنا جابر رضی اللہ عنہ سے مروی ہے کہ نبی کریم صلی اللہ علیہ وسلم کے پاس سے ایک گدھا لے جایا گیا جس کے چہرے پر داغ دیا گیا تھا تو آپ صلی اللہ علیہ وسلم نے فرمایا: ”کیا تمہیں یہ بات نہیں پہنچی کہ میں نے ایسے شخص پر لعنت کی ہے جو کسی جانور کو اس کے چہرے پر داغے یا اس کے منہ پر مارے؟“ چنانچہ آپ صلی اللہ علیہ وسلم نے اس کام سے منع فرما دیا۔ [سنن ابي داود/كتاب الجهاد /حدیث: 2564]

سیدنا علی بن ابی طالب رضی اللہ عنہ سے مروی ہے کہ رسول اللہ صلی اللہ علیہ وسلم کو ایک خچر ہدیہ دیا گیا تو آپ صلی اللہ علیہ وسلم اس پر سوار ہوئے۔ سیدنا علی رضی اللہ عنہ نے کہا: ”اگر ہم گدھوں کو گھوڑیوں پر چڑھائیں (تو ان کے اس جنسی عمل سے) ہمیں اس طرح کے خچر حاصل ہو جائیں گے۔“ رسول اللہ صلی اللہ علیہ وسلم نے فرمایا: ”جاہل لوگ یہ کام کرتے ہیں۔“ [سنن ابي داود/كتاب الجهاد /حدیث: 2565]

سیدنا عبداللہ بن جعفر رضی اللہ عنہ بیان کرتے ہیں کہ ”نبی کریم صلی اللہ علیہ وسلم جب سفر سے تشریف لاتے تو ہمارے ساتھ آپ صلی اللہ علیہ وسلم کا استقبال کیا جاتا، تو جس (بچے) کے ساتھ آپ صلی اللہ علیہ وسلم کا پہلے استقبال کیا جاتا آپ صلی اللہ علیہ وسلم اسے اپنے آگے بٹھا لیتے۔ چنانچہ میرے ساتھ آپ صلی اللہ علیہ وسلم کا استقبال کیا گیا تو آپ صلی اللہ علیہ وسلم نے مجھے اپنے آگے بٹھا لیا، پھر سیدنا حسن رضی اللہ عنہ یا سیدنا حسین رضی اللہ عنہ آئے تو آپ صلی اللہ علیہ وسلم نے ان کو اپنے پیچھے بٹھا لیا، پھر ہم مدینہ میں داخل ہوئے تو اسی طرح تھے (کہ تینوں ایک سواری پر سوار تھے۔)“ [سنن ابي داود/كتاب الجهاد /حدیث: 2566]