سیدنا عامر رام رضی اللہ عنہ سے روایت ہے کہ ہم لوگ اپنے علاقے میں تھے کہ ہمارے لیے جھنڈے اور نشانات بلند کیے گئے (ہمارے علاقے میں جہادی مہمیں پہنچ گئیں)، میں نے پوچھا: ”یہ کیا ہیں؟“ تو لوگوں نے کہا: ”یہ رسول اللہ صلی اللہ علیہ وسلم کا جھنڈا ہے۔“ چنانچہ میں آپ صلی اللہ علیہ وسلم کی خدمت میں حاضر ہوا جبکہ آپ صلی اللہ علیہ وسلم ایک درخت کے نیچے تشریف فرما تھے، آپ صلی اللہ علیہ وسلم کے لیے ایک چادر بچھائی گئی تھی اور آپ صلی اللہ علیہ وسلم اس پر بیٹھے ہوئے تھے اور آپ کے صحابہ رضی اللہ عنہم آپ کے پاس جمع تھے، سو میں بھی ان کے ساتھ بیٹھ گیا۔ رسول اللہ صلی اللہ علیہ وسلم نے بیماریوں کا ذکر کیا، آپ صلی اللہ علیہ وسلم نے فرمایا: ”مومن کو جب کوئی بیماری آتی ہے اور پھر اللہ اسے عافیت اور شفا دے دیتا ہے تو وہ اس کے سابقہ گناہوں کا کفارہ بن جاتی ہے اور آئندہ کے لیے نصیحت کا سبب ہوتی ہے، اور منافق جب بیمار پڑتا ہے اور پھر اسے عافیت دی جاتی ہے تو اس کی مثال اونٹ کی سی ہوتی ہے جسے اس کے گھر والوں نے باندھا ہو اور پھر کھول دیا ہو، اسے معلوم نہیں ہوتا کہ کیوں باندھا تھا اور یہ بھی معلوم نہیں ہوتا کہ کیوں چھوڑ دیا ہے۔“ آپ صلی اللہ علیہ وسلم کے گرد بیٹھے ہوئے لوگوں میں سے ایک نے پوچھا: ”اے اللہ کے رسول! یہ بیماریاں کیا ہوتی ہیں؟ میں تو اللہ کی قسم! کبھی بیمار نہیں ہوا۔“ نبی کریم صلی اللہ علیہ وسلم نے فرمایا: ”اٹھ جا، تو ہم میں سے نہیں ہے۔“ (پھر کسی دوسرے موقع پر) ہم آپ صلی اللہ علیہ وسلم کے پاس بیٹھے ہوئے تھے کہ ایک آدمی آیا، وہ چادر اوڑھے ہوئے تھا اور اس کے ہاتھ میں کچھ تھا جسے اس نے لپیٹا ہوا تھا، اس نے کہا: ”اے اللہ کے رسول! جب میں نے آپ کو تشریف لاتے دیکھا تو آپ کی طرف چل پڑا، میں درختوں کے ایک جھنڈ کے پاس سے گزرا تو اس میں سے پرندے کے بچوں کی آواز سنی، پس میں نے انہیں پکڑ لیا اور اپنی چادر میں ڈال لیا، پھر ان کی ماں آئی تو میرے سر پر منڈلانے لگی، میں نے اس کے لیے اس کے بچوں کو ننگا کیا تو وہ ان کے ساتھ ان کے اوپر آ پڑی، تو میں نے انہیں اپنی چادر میں لپیٹ لیا اور یہ وہی میرے پاس ہیں۔“ آپ صلی اللہ علیہ وسلم نے فرمایا: ”انہیں چھوڑ دے۔“ تو میں نے انہیں چھوڑ دیا، مگر ان کی ماں نے (اڑ جانے سے) انکار کیا اور بچوں کے ساتھ پڑی رہی، تو رسول اللہ صلی اللہ علیہ وسلم نے صحابہ رضی اللہ عنہم سے فرمایا: ”کیا تم اس ماں کی اپنے بچوں پر شفقت سے تعجب کر رہے ہو؟“ انہوں نے کہا: ”ہاں، اے اللہ کے رسول!“ آپ صلی اللہ علیہ وسلم نے فرمایا: ”قسم اس ذات کی جس نے مجھے حق کے ساتھ مبعوث فرمایا ہے! بلاشبہ اللہ تعالیٰ اپنے بندوں کے ساتھ ان بچوں کی ماں سے بڑھ کر رحیم اور شفیق ہے، انہیں واپس لے جا اور وہیں رکھ آ جہاں سے تو نے انہیں اٹھایا ہے اور ان کی ماں بھی ساتھ رہے۔“ چنانچہ وہ آدمی انہیں واپس لے گیا۔ [سنن ابي داود/كتاب الجنائز /حدیث: 3089]

محمد بن خالد سے روایت ہے، امام ابوداؤد رحمہ اللہ فرماتے ہیں کہ ابراہیم بن مہدی نے اس راوی (محمد بن خالد) کے متعلق کہا کہ یہ ”سلمی“ ہیں، وہ اپنے والد سے، وہ اپنے دادا رضی اللہ عنہ سے روایت کرتے ہیں، جنہیں رسول اللہ صلی اللہ علیہ وسلم کی صحبت کا شرف حاصل تھا، کہا کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”بیشک بندے کے لیے جب اللہ تعالیٰ کے ہاں کوئی مقام و مرتبہ مقدر ہو چکا ہو اور وہ اپنے اعمال کی بنا پر اس تک نہ پہنچ سکتا ہو، تو اللہ اسے اس کے اپنے جسم یا مال یا اولاد کی آزمائش میں ڈال دیتا ہے۔“ امام ابوداؤد رحمہ اللہ فرماتے ہیں کہ ابن نفیل نے یہ اضافہ بیان کیا: ”اور پھر اللہ تعالیٰ اسے صبر کی توفیق بھی دیتا ہے۔“ پھر دونوں راوی حدیث بیان کرنے میں متفق ہو جاتے ہیں: ”حتیٰ کہ اسے اس مقام و مرتبہ تک پہنچا دیتا ہے جو اللہ تعالیٰ کی طرف سے پہلے ہی سے اس کے لیے مقدر ہو چکا ہوتا ہے۔“ [سنن ابي داود/كتاب الجنائز /حدیث: 3090]

سیدنا ابوموسیٰ اشعری رضی اللہ عنہ سے مروی ہے، وہ کہتے ہیں کہ میں نے نبی کریم صلی اللہ علیہ وسلم سے بارہا سنا، آپ صلی اللہ علیہ وسلم فرماتے تھے: ”جب کوئی بندہ نیک عمل کرتا رہا ہو مگر بیماری یا سفر کی وجہ سے وہ نہ کر سکے تو اللہ تعالیٰ اس کے لیے وہ عمل اسی طرح عمدہ کیفیت میں لکھتا رہتا ہے جبکہ وہ تندرست اور مقیم تھا۔“ [سنن ابي داود/كتاب الجنائز /حدیث: 3091]

سیدہ ام علاء رضی اللہ عنہا بیان کرتی ہیں کہ میں بیمار ہو گئی تو رسول اللہ صلی اللہ علیہ وسلم میری عیادت کے لیے تشریف لائے اور فرمایا: ”اے ام علاء! تمہیں خوشخبری ہو، بلاشبہ مسلمان کی بیماری کے ذریعے سے اللہ تعالیٰ اس کے گناہوں کو ختم کر دیتا ہے جیسے کہ آگ سونے اور چاندی کا کھوٹ نکال دیتی ہے۔“ [سنن ابي داود/كتاب الجنائز /حدیث: 3092]

ام المؤمنین سیدہ عائشہ رضی اللہ عنہا سے روایت ہے، وہ کہتی ہیں کہ میں نے عرض کیا: ”اے اللہ کے رسول! میں خوب جانتی ہوں کہ قرآن مجید میں سب سے سخت آیت کون سی ہے۔“ آپ صلی اللہ علیہ وسلم نے فرمایا: ”کون سی آیت ہے وہ؟ اے عائشہ!“ کہتی ہیں، میں نے کہا: اللہ تعالیٰ کا یہ فرمان: ﴿مَنْ يَعْمَلْ سُوءًا يُجْزَ بِهِ﴾ [سورة النساء: 123] ”جس نے بھی کوئی برائی کی، اسے اس کا بدلہ دیا جائے گا۔“ آپ صلی اللہ علیہ وسلم نے فرمایا: ”عائشہ! کیا تمہیں معلوم نہیں کہ مومن کو جو کوئی پریشانی آتی ہے یا کانٹا بھی چبھ جاتا ہے تو اسے اس کے کسی سب سے برے عمل کا بدلہ دے دیا جاتا ہے اور جس کا حساب لیا گیا تو اسے عذاب ہوا۔“ کہتی ہیں کہ میں نے عرض کیا: ”تو کیا اللہ نے نہیں فرمایا: ﴿فَسَوْفَ يُحَاسَبُ حِسَابًا يَسِيرًا﴾ [سورة الانشقاق: 8] ”عنقریب بندے کا حساب لیا جائے گا آسان حساب؟““ آپ صلی اللہ علیہ وسلم نے فرمایا: ”اس سے مراد اللہ تعالیٰ کے سامنے حاضری ہے، اے عائشہ! جس سے حساب میں پوچھ گچھ ہو گئی، اسے عذاب ہوا۔“ امام ابوداؤد رحمہ اللہ فرماتے ہیں یہ ابن بشار کے لفظ ہیں، اور اس کی سند میں «عَنْ» کی بجائے «حَدَّثَنَا ابْنُ أَبِي مُلَيْكَةَ» ہے۔ [سنن ابي داود/كتاب الجنائز /حدیث: 3093]

سیدنا اسامہ بن زید رضی اللہ عنہ بیان کرتے ہیں کہ رسول اللہ صلی اللہ علیہ وسلم عبداللہ بن ابی (منافق) کی عیادت کے لیے تشریف لے گئے، اس بیماری میں جس میں کہ وہ مر گیا تھا۔ چنانچہ جب آپ صلی اللہ علیہ وسلم اس کے ہاں پہنچے تو آپ صلی اللہ علیہ وسلم نے اس پر موت کے اثرات محسوس کیے (اور) فرمایا: ”میں تجھے منع کیا کرتا تھا کہ یہود سے محبت نہ رکھ۔“ اس نے کہا: ”اسعد بن زرادہ نے ان سے بغض رکھا تو کیا ہوا؟“ پھر جب وہ مر گیا تو اس کا بیٹا (عبداللہ رضی اللہ عنہ) آپ صلی اللہ علیہ وسلم کی خدمت میں آیا اور کہا: ”اے اللہ کے نبی! بے شک عبداللہ بن ابی مر گیا ہے، تو آپ مجھے اپنی قمیص عنایت فرما دیں کہ میں اسے اس میں کفن دوں۔“ تو رسول اللہ صلی اللہ علیہ وسلم نے اپنی قمیص اتار کر اسے دے دی۔ [سنن ابي داود/كتاب الجنائز /حدیث: 3094]

سیدنا انس رضی اللہ عنہ سے روایت ہے کہ یہودیوں کا ایک لڑکا بیمار ہو گیا تو نبی کریم صلی اللہ علیہ وسلم اس کی عیادت کے لیے تشریف لے گئے۔ آپ صلی اللہ علیہ وسلم اس کے سر کے پاس بیٹھ گئے، اور اس سے فرمایا: ”اسلام قبول کر لو۔“ تو اس نے اپنے باپ کی طرف دیکھا جب کہ وہ بھی اس کے سر کے پاس ہی بیٹھا ہوا تھا۔ تو اس کے باپ نے اس سے کہا: ”ابوالقاسم کی بات مان لو۔“ چنانچہ اس نے اسلام قبول کر لیا۔ پھر نبی کریم صلی اللہ علیہ وسلم وہاں سے اٹھے تو فرما رہے تھے: «الْحَمْدُ لِلَّهِ الَّذِي أَنْقَذَهُ مِنَ النَّارِ» ”حمد اس اللہ کی جس نے اس کو میرے ذریعے سے آگ سے نجات دی۔“ [سنن ابي داود/كتاب الجنائز /حدیث: 3095]

سیدنا جابر رضی اللہ عنہ بیان کرتے ہیں کہ ”نبی کریم صلی اللہ علیہ وسلم میری عیادت کے لیے تشریف لاتے، بغیر اس کے کہ کسی خچر پر سوار ہوں یا گھوڑے پر۔“ [سنن ابي داود/كتاب الجنائز /حدیث: 3096]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے وضو کیا اور اچھا وضو کیا اور ثواب کی نیت سے اپنے مسلمان بھائی کی عیادت کے لیے گیا تو اسے جہنم سے ستر سال کی مسافت پر دور کر دیا جائے گا۔“ ثابت بنانی رحمہ اللہ کہتے ہیں، میں نے پوچھا: ”اے ابوحمزہ! «خَرِيفٍ» سے کیا مراد ہے؟“ انہوں نے کہا: ”سال۔“ امام ابوداؤد رحمہ اللہ فرماتے ہیں: ”اہل بصرہ جن احادیث کے بیان کرنے میں منفرد ہیں ان میں سے ایک یہ بھی ہے کہ انسان باوضو ہو کر عیادت کے لیے جائے۔“ [سنن ابي داود/كتاب الجنائز /حدیث: 3097]

سیدنا علی رضی اللہ عنہ سے مروی ہے کہ ”جو شخص شام کے وقت کسی مریض کی عیادت کے لیے نکلتا ہے تو اس کے ساتھ ستر ہزار فرشتے بھی نکلتے ہیں جو اس کے لیے صبح تک بخشش طلب کرتے رہتے ہیں اور جنت میں اسے ایک باغ بھی حاصل ہو گا، اور جو کوئی صبح کے وقت عیادت کے لیے نکلے تو اس کے ساتھ ستر ہزار فرشتے نکلتے ہیں جو اس کے لیے شام تک بخشش مانگتے رہتے ہیں اور جنت میں اسے ایک باغ بھی حاصل ہو گا۔“ [سنن ابي داود/كتاب الجنائز /حدیث: 3098]