سیدنا علی رضی اللہ عنہ نے نبی کریم صلی اللہ علیہ وسلم سے مذکورہ بالا حدیث کے ہم معنی بیان کیا، لیکن اس میں «خَرِيف» یعنی باغ کا ذکر نہیں ہے۔ امام ابوداؤد رحمہ اللہ فرماتے ہیں: ”اس حدیث کو منصور نے بھی حکم سے ایسے ہی روایت کیا ہے جیسے کہ شعبہ نے۔“ [سنن ابي داود/كتاب الجنائز /حدیث: 3099]

ابوجعفر عبداللہ بن نافع سے روایت ہے اور نافع سیدنا حسن بن علی رضی اللہ عنہ کے غلام تھے، بیان کرتے ہیں کہ ”سیدنا ابوموسیٰ اشعری رضی اللہ عنہ، سیدنا حسن بن علی رضی اللہ عنہ کی عیادت کے لیے تشریف لائے تھے۔“ امام ابوداؤد رحمہ اللہ نے کہا: ”اور پھر حدیث شعبہ کے ہم معنی بیان کیا۔“ امام ابوداؤد رحمہ اللہ فرماتے ہیں کہ ”اس روایت کو بواسطہ سیدنا علی رضی اللہ عنہ، نبی کریم صلی اللہ علیہ وسلم سے کئی ایک صحیح سندوں سے روایت کیا گیا ہے۔“ [سنن ابي داود/كتاب الجنائز /حدیث: 3100]

ام المؤمنین سیدہ عائشہ رضی اللہ عنہا بیان کرتی ہیں کہ ”سیدنا سعد بن معاذ رضی اللہ عنہ جنگ خندق میں زخمی ہو گئے۔ ایک آدمی نے ان کے بازو کی رگ (رگ ہفت اندام) پر نشانہ مارا تھا تو رسول اللہ صلی اللہ علیہ وسلم نے ان کے لیے مسجد میں خیمہ لگوا لیا تاکہ قریب سے ان کی عیادت کرتے رہیں۔“ [سنن ابي داود/كتاب الجنائز /حدیث: 3101]

سیدنا زید بن ارقم رضی اللہ عنہ سے روایت ہے، انہوں نے کہا: ”رسول اللہ صلی اللہ علیہ وسلم میری عیادت کے لیے تشریف لائے جبکہ میری آنکھ میں درد تھا۔“ [سنن ابي داود/كتاب الجنائز /حدیث: 3102]

سیدنا عبداللہ بن عباس رضی اللہ عنہ فرماتے ہیں کہ سیدنا عبدالرحمٰن بن عوف رضی اللہ عنہ نے بیان کیا، وہ کہتے ہیں: ”میں نے رسول اللہ صلی اللہ علیہ وسلم کو فرماتے ہوئے سنا: ”جب تم سنو کہ فلاں علاقے میں طاعون پھیل گیا ہے تو پھر وہاں مت جاؤ، اور جب کہیں پھیل جائے اور تم وہاں ہو تو اس (طاعون) سے فرار اختیار کرتے ہوئے وہاں سے مت نکلو۔““ [سنن ابي داود/كتاب الجنائز /حدیث: 3103]

سیدہ عائشہ رضی اللہ عنہا دختر سعد ابی وقاص رضی اللہ عنہ سے مروی ہے کہ ان کے والد نے بیان کیا کہ میں مکہ میں بیمار ہو گیا تو رسول اللہ صلی اللہ علیہ وسلم بیمار پرسی کے لیے میرے ہاں تشریف لائے، آپ صلی اللہ علیہ وسلم نے اپنا ہاتھ مبارک میری پیشانی پر رکھا، پھر میرے سینے اور پیٹ پر پھیرا اور فرمایا: «اللَّهُمَّ اشْفِ سَعْدًا، وَأَتْمِمْ لَهُ هِجْرَتَهُ» ”اے اللہ! سعد کو شفاء عنایت فرما اور اس کی ہجرت مکمل فرما دے۔“ [سنن ابي داود/كتاب الجنائز /حدیث: 3104]

سیدنا ابوموسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بھوکے کو کھانا کھلاؤ، مریض کی بیمار پرسی کرو اور قیدی کو چھڑاؤ۔“ سفیان نے وضاحت کی کہ «الْعَانِي» سے مراد قیدی ہے۔ [سنن ابي داود/كتاب الجنائز /حدیث: 3105]

سیدنا ابن عباس رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جس نے کسی ایسے مریض کی عیادت کی جس کی ابھی اجل نہ آئی ہو تو سات بار اس کے پاس یہ دعا «أَسْأَلُ اللّٰهَ الْعَظِيْمَ رَبَّ الْعَرْشِ الْعَظِيْمِ اَنْ يَشْفِيَكَ» ”میں اللہ سے سوال کرتا ہوں جو عظمت اور بڑائی والا اور عرش عظیم کا رب ہے کہ تجھے شفا عنایت فرمائے۔“ پڑھے تو اللہ تعالیٰ اسے اس بیماری سے عافیت دے دے گا۔“ [سنن ابي داود/كتاب الجنائز /حدیث: 3106]

سیدنا (عبداللہ) بن عمرو رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب کوئی شخص کسی مریض کی عیادت کے لیے جائے، تو چاہیے کہ یوں کہے: «اللَّهُمَّ اشْفِ عَبْدَكَ يَنْكَأُ لَكَ عَدُوًّا أَوْ يَمْشِي لَكَ إِلَى جَنَازَةٍ» ”اے اللہ! اپنے بندے کو شفا عنایت فرما، یہ تیری راہ میں کسی دشمن کو زخمی کرے گا یا تیری رضا کے لیے کسی جنازہ میں شریک ہو گا۔““ امام ابوداؤد رحمہ اللہ فرماتے ہیں کہ: ”ابن السرح (احمد بن عمرو بن عبداللہ) نے «إِلَى جَنَازَةٍ» کے بجائے «إِلَى صَلَاةٍ» روایت کیا ہے، یعنی یہ بندہ نماز کے لیے جائے گا۔“ [سنن ابي داود/كتاب الجنائز /حدیث: 3107]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کسی دکھ کے آنے پر کوئی شخص ہرگز موت کی دعا نہ کرے، بلکہ چاہیے کہ یوں کہے: «اللَّهُمَّ أَحْيِنِي مَا كَانَتِ الْحَيَاةُ خَيْرًا لِي، وَتَوَفَّنِي إِذَا كَانَتِ الْوَفَاةُ خَيْرًا لِي» ”اے اللہ! مجھے زندہ رکھ جب تک کہ زندگی میرے لیے خیر کا باعث ہو اور جب موت میرے لیے بہتر ہو تو مجھے وفات دے دے۔““ [سنن ابي داود/كتاب الجنائز /حدیث: 3108]