سیدنا سعید بن جبیر رحمہ اللہ، سیدنا ابن عباس رضی اللہ عنہما سے اس حدیث کی مانند روایت کرتے ہیں، انہوں نے کہا: ”اور اس کو دو کپڑوں میں کفن دو۔“ امام ابوداؤد رحمہ اللہ فرماتے ہیں کہ سلیمان بن حرب کی ایوب سے روایت میں لفظ یوں ہیں: «ثَوْبَيْهِ» یعنی ”اس کے اپنے دو کپڑوں میں کفن دو۔“ جب کہ عمرو کی روایت میں «ثَوْبَيْنِ» آیا ہے، یعنی ”دو کپڑوں میں کفن دو۔“ (اس کے اپنے ہوں یا کسی دوسرے نے دیے ہوں۔) ابن عبید کی روایت جو ایوب سے ہے اس میں «فِي ثَوْبَيْنِ» کا لفظ ہے، جبکہ عمرو نے «ثَوْبَيْهِ» کہا ہے اور صرف سلیمان نے یہ اضافہ کیا: ”اسے حنوط (خوشبو) بھی نہ لگاؤ۔“ [سنن ابي داود/كتاب الجنائز /حدیث: 3239]

ایوب، سعید بن جبیر سے اور وہ سیدنا ابن عباس رضی اللہ عنہما سے سلیمان کی روایت کے ہم معنی بیان کرتے ہیں، یعنی «فِي ثَوْبَيْنِ» ”دو کپڑوں میں کفن دو۔“ [سنن ابي داود/كتاب الجنائز /حدیث: 3240]

جناب سعید بن جبیر رحمہ اللہ، سیدنا ابن عباس رضی اللہ عنہ سے روایت کرتے ہیں کہ ایک محرم آدمی کو اس کی سواری نے گرا دیا اور اس کی گردن توڑ دی اور اس سے وہ فوت ہو گیا، اس کو رسول اللہ صلی اللہ علیہ وسلم کے پاس لایا گیا تو آپ صلی اللہ علیہ وسلم نے فرمایا: ”اسے غسل دو، کفن پہناؤ، لیکن سر نہ ڈھانپو اور نہ خوشبو ہی لگاؤ، بلاشبہ یہ تلبیہ پکارتے ہوئے اٹھایا جائے گا۔“ [سنن ابي داود/كتاب الجنائز /حدیث: 3241]