ابوعلی ہمدانی نے بیان کیا کہ ہم سیدنا فضالہ بن عبید رضی اللہ عنہ کی معیت میں روم کی سرزمین میں جزیرہ روڈس میں تھے کہ ہمارا ایک ساتھی وفات پا گیا، سیدنا فضالہ رضی اللہ عنہ نے ان کی قبر کے متعلق کہا کہ ”اسے برابر کر دیا جائے“ پھر فرمایا: ”میں نے رسول اللہ صلی اللہ علیہ وسلم کو سنا کہ آپ صلی اللہ علیہ وسلم قبر کو برابر کرنے کا حکم دیتے تھے۔“ امام ابوداؤد رحمہ اللہ نے کہا کہ ”روڈس ایک سمندری جزیرے کا نام ہے۔“ [سنن ابي داود/كتاب الجنائز /حدیث: 3219]

جناب قاسم (ابن محمد بن ابی بکر صدیق رضی اللہ عنہ) کہتے ہیں: ”میں ام المؤمنین سیدہ عائشہ رضی اللہ عنہا کی خدمت میں حاضر ہوا اور عرض کیا کہ اماں جان! مجھے رسول اللہ صلی اللہ علیہ وسلم اور آپ صلی اللہ علیہ وسلم کے دو ساتھیوں کی قبریں دکھائیں، تو انہوں نے میری خاطر پردہ ایک طرف کیا۔ تین قبریں تھیں جو نہ تو اونچی تھیں اور نہ زمین کے ساتھ برابر، بلکہ قدرے اونچی تھیں اور سرخ میدان کی کنکریاں ان پر ڈالی گئی تھیں۔“ جناب ابوعلی لؤلؤی (راویِ سنن ابی داؤد) سے منقول ہے کہ ”رسول اللہ صلی اللہ علیہ وسلم کی قبر آگے ہے اور ابوبکر رضی اللہ عنہ ان کے سر کے پاس ہیں اور عمر رضی اللہ عنہ ان کے پاؤں کے پاس یعنی سیدنا عمر رضی اللہ عنہ کا سر رسول اللہ صلی اللہ علیہ وسلم کے قدموں میں ہے۔“ [سنن ابي داود/كتاب الجنائز /حدیث: 3220]

سیدنا عثمان بن عفان رضی اللہ عنہ سے مروی ہے کہ نبی کریم صلی اللہ علیہ وسلم جب میت کو دفن کر کے فارغ ہو جاتے تو قبر پر رکتے اور فرماتے: ”اپنے بھائی کے لیے استغفار کرو اور ثابت قدمی کی دعا کرو، بیشک اب اس سے سوال کیا جائے گا۔“ امام ابوداؤد رحمہ اللہ نے (سند کے ایک راوی عبداللہ کے والد کا نام) بحیر بن ریسان بیان کیا۔ [سنن ابي داود/كتاب الجنائز /حدیث: 3221]

سیدنا انس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”اسلام میں «عَقْرٌ» (جانوروں کو قبر پر ذبح کرنا) نہیں ہے۔“ امام عبدالرزاق رحمہ اللہ نے بیان کیا: ”لوگوں کا معمول تھا کہ وہ قبر کے پاس گائے یا بکری وغیرہ ذبح کیا کرتے تھے۔“ [سنن ابي داود/كتاب الجنائز /حدیث: 3222]

سیدنا عقبہ بن عامر رضی اللہ عنہ کا بیان ہے کہ ”رسول اللہ صلی اللہ علیہ وسلم ایک دن تشریف لے گئے اور اہل احد پر نماز پڑھی جیسے کہ میت پر پڑھتے ہیں، پھر واپس تشریف لے آئے“۔ [سنن ابي داود/كتاب الجنائز /حدیث: 3223]

سیدنا یزید بن ابی حبیب رحمہ اللہ نے یہ حدیث بیان کی اور کہا کہ: ”بے شک نبی کریم صلی اللہ علیہ وسلم نے شہدائےِ احد پر آٹھ سال کے بعد نمازِ جنازہ پڑھی، گویا کہ آپ صلی اللہ علیہ وسلم زندوں اور مردوں کو الوداع کہہ رہے تھے۔“ [سنن ابي داود/كتاب الجنائز /حدیث: 3224]

سیدنا جابر رضی اللہ عنہ کہتے ہیں کہ ”میں نے نبی کریم صلی اللہ علیہ وسلم سے سنا، آپ صلی اللہ علیہ وسلم منع فرماتے تھے کہ قبر پر بیٹھا جائے یا اسے چونا گچ کیا جائے اور اس پر کوئی تعمیر کی جائے“۔ [سنن ابي داود/كتاب الجنائز /حدیث: 3225]

سیدنا سلیمان بن موسیٰ اور ابوالزبیر رحمہما اللہ نے سیدنا جابر رضی اللہ عنہ سے یہ حدیث بیان کی۔ امام ابوداؤد رحمہ اللہ فرماتے ہیں کہ عثمان بن ابی شیبہ رحمہ اللہ نے کہا: ”اس کو زیادہ کرنا منع ہے (اسے اونچا کر دیا جائے)۔“ اور سلیمان بن موسیٰ رحمہ اللہ نے مزید کہا: ”اس پر کتبہ لگانا منع ہے۔“ مگر مسدد رحمہ اللہ نے اپنی روایت میں «أَوْ يُزَادَ عَلَيْهِ» ”یا اس پر زیادہ کیا جائے“ کا لفظ ذکر نہیں کیا۔ امام ابوداؤد رحمہ اللہ کہتے ہیں کہ ”مسدد رحمہ اللہ کی روایت میں میرے لیے لفظ «وَأَنْ» ”اور یہ کہ“ واضح نہیں ہوا تھا۔“ [سنن ابي داود/كتاب الجنائز /حدیث: 3226]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”اللہ تعالیٰ یہودیوں کو ہلاک کرے، انہوں نے اپنے انبیاء کی قبروں کو سجدہ گاہ بنا لیا۔“ [سنن ابي داود/كتاب الجنائز /حدیث: 3227]

سیدنا ابوہریرہ رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”تم میں سے کوئی دہکتے کوئلے پر بیٹھ جائے، وہ اس کے کپڑے جلا دے اور پھر اس کا اثر اس کے جسم تک پہنچ جائے، یہ اس کے لیے بہتر ہے اس سے کہ کسی قبر پر بیٹھے۔“ [سنن ابي داود/كتاب الجنائز /حدیث: 3228]