عامر شعبی رحمہ اللہ سے مروی ہے کہ ”سیدنا علی، فضل اور اسامہ بن زید رضی اللہ عنہم نے رسول اللہ صلی اللہ علیہ وسلم کو غسل دیا اور انہوں نے ہی آپ صلی اللہ علیہ وسلم کو قبر میں اتارا۔“ شعبی نے کہا کہ ”مجھے مرحب یا ابن ابی مرحب (سوید بن قیس) نے بیان کیا کہ انہوں نے اپنے ساتھ سیدنا عبدالرحمٰن بن عوف رضی اللہ عنہ کو بھی شامل کیا تھا اور جب سیدنا علی رضی اللہ عنہ فارغ ہوئے تو کہا: ”تدفین وغیرہ کے عمل میں آدمی کے اپنے اہل کے افراد ہی حصہ لیں۔““ [سنن ابي داود/كتاب الجنائز /حدیث: 3209]

سیدنا ابومرحب رضی اللہ عنہ سے روایت ہے کہ ”سیدنا عبدالرحمٰن بن عوف رضی اللہ عنہ نبی کریم صلی اللہ علیہ وسلم کی قبر میں اترے تھے۔“ (ابومرحب) کہتے ہیں: ”گویا میں ان چاروں کو دیکھ رہا ہوں۔“ [سنن ابي داود/كتاب الجنائز /حدیث: 3210]

جناب ابو اسحاق (سبیعی) سے روایت ہے کہ حارث اعور نے وصیت کی کہ سیدنا عبداللہ بن یزید (عبداللہ بن یزید خطمی رضی اللہ عنہ) ان کی نماز جنازہ پڑھائیں، چنانچہ انہوں نے جنازہ پڑھایا، پھر انہیں قبر کی پائینتی کی طرف سے قبر میں اتارا اور فرمایا: ”یہ سنت ہے۔“ [سنن ابي داود/كتاب الجنائز /حدیث: 3211]

سیدنا براء بن عازب رضی اللہ عنہ سے روایت ہے کہ ”ہم رسول اللہ صلی اللہ علیہ وسلم کے ساتھ ایک انصاری کے جنازے میں گئے، ہم قبر کے پاس پہنچے تو ابھی تک لحد نہیں بنی تھی۔ پس نبی کریم صلی اللہ علیہ وسلم قبلہ رخ ہو کر بیٹھ گئے اور ہم بھی آپ صلی اللہ علیہ وسلم کے ساتھ بیٹھ گئے۔“ [سنن ابي داود/كتاب الجنائز /حدیث: 3212]

سیدنا ابن عمر رضی اللہ عنہ سے منقول ہے کہ نبی کریم صلی اللہ علیہ وسلم جب میت کو قبر میں اتارتے، تو یوں فرمایا کرتے: «بِسْمِ اللّٰهِ، وَعَلَىٰ سُنَّةِ رَسُولِ اللّٰهِ صلی اللہ علیہ وسلم » ”اللہ کے نام سے اور رسول اللہ ( صلی اللہ علیہ وسلم ) کے طریقے پر۔“ اور یہ لفظ مسلم بن ابراہیم کے ہیں۔ [سنن ابي داود/كتاب الجنائز /حدیث: 3213]

سیدنا علی رضی اللہ عنہ سے روایت ہے، وہ کہتے ہیں کہ میں نے نبی کریم صلی اللہ علیہ وسلم کو خبر دی کہ ”آپ صلی اللہ علیہ وسلم کا بوڑھا گمراہ چچا مر گیا ہے۔“ آپ صلی اللہ علیہ وسلم نے فرمایا: ”جاؤ اور اپنے والد کو زمین میں دبا آؤ، پھر کوئی کام نہ کرنا حتیٰ کہ میرے پاس آ جانا۔“ چنانچہ میں گیا اور اسے زمین میں دبا آیا اور آپ صلی اللہ علیہ وسلم کی خدمت میں حاضر ہو گیا، آپ صلی اللہ علیہ وسلم نے مجھے حکم دیا تو میں نے غسل کیا اور آپ صلی اللہ علیہ وسلم نے میرے لیے دعا فرمائی۔ [سنن ابي داود/كتاب الجنائز /حدیث: 3214]

سیدنا ہشام بن عامر رضی اللہ عنہ سے مروی ہے کہ احد کے روز انصاری لوگ رسول اللہ صلی اللہ علیہ وسلم کی خدمت میں حاضر ہوئے اور کہا: ”ہم زخمی ہیں اور تھکے ہوئے بھی، تو آپ صلی اللہ علیہ وسلم کیا ارشاد فرماتے ہیں؟“ آپ صلی اللہ علیہ وسلم نے فرمایا: ”قبریں کھودو اور کھلی کھلی بناؤ اور دو دو اور تین تین کو ایک ایک قبر میں دفنا دو۔“ کہا گیا کہ آگے کسے کیا جائے؟ فرمایا: ”جسے قرآن زیادہ یاد ہو۔“ ہشام کہتے ہیں کہ میرے والد عامر رضی اللہ عنہ بھی اسی دن شہید ہو گئے تھے اور وہ دو آدمیوں کے ساتھ دفن ہوئے تھے یا کہا کہ ایک آدمی کے ساتھ۔ [سنن ابي داود/كتاب الجنائز /حدیث: 3215]

حمید بن ہلال رحمہ اللہ نے اپنی مذکورہ بالا سند سے اس کے ہم معنی بیان کیا اور اس میں اضافہ ہے: ”(قبریں) گہری بناؤ۔“ [سنن ابي داود/كتاب الجنائز /حدیث: 3216]

حمید بن ہلال نے سعد بن ہشام بن عامر سے یہی حدیث روایت کی۔ [سنن ابي داود/كتاب الجنائز /حدیث: 3217]

سیدنا ابوالہیاج اسدی رحمہ اللہ سے روایت ہے، وہ کہتے ہیں کہ سیدنا علی رضی اللہ عنہ نے مجھے بھیجا اور فرمایا: ”میں تمہیں اس کام پر بھیج رہا ہوں جس پر رسول اللہ صلی اللہ علیہ وسلم نے مجھے بھیجا تھا کہ کسی اونچی قبر کو نہ چھوڑوں مگر اسے برابر کر دوں اور نہ کسی مورتی کو مگر اسے مٹا ڈالوں۔“ [سنن ابي داود/كتاب الجنائز /حدیث: 3218]