سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”جس نے کوئی ایسا جانور خریدا جس کا دودھ روکا گیا تھا، تو اسے تین دن تک اختیار ہے۔ اگر اسے واپس کرے تو اس کے دودھ کے بقدر یا اس سے دوگنی گندم بھی واپس کرے۔“ [سنن ابي داود/كتاب الإجارة /حدیث: 3446]

سیدنا معمر بن ابی معمر رضی اللہ عنہ سے روایت ہے اور یہ بنو عدی بن کعب کے فرد ہیں، یہ کہتے ہیں کہ رسول اللہ صلی اللہ علیہ وسلم نے فرمایا: ”کوئی نافرمان اور گناہ گار آدمی ہی ذخیرہ اندوزی کر سکتا ہے۔“ (محمد بن عمرو نے) کہا: میں نے جناب سعید بن مسیب رحمہ اللہ سے کہا کہ ”آپ بھی تو ذخیرہ کرتے ہیں۔“ انہوں نے کہا کہ ”سیدنا معمر رضی اللہ عنہ بھی ذخیرہ کیا کرتے تھے۔“ امام ابوداؤد رحمہ اللہ کہتے ہیں: میں نے امام احمد رحمہ اللہ سے پوچھا کہ «حُكْرَة» (ذخیرہ اندوزی) کیا ہے؟ تو انہوں نے فرمایا کہ ”وہ چیزیں جن پر لوگوں کی گزران ہو (ان کا ذخیرہ کرنا منع ہے)۔“ امام ابوداؤد رحمہ اللہ نے کہا: اوزاعی رحمہ اللہ کہتے ہیں کہ ”ذخیرہ اندوز وہ ہوتا ہے جو بازار آتا جاتا رہے۔ (بازار پر نظر رکھے اور اہم چیزیں خرید کر روک لے)۔“ [سنن ابي داود/كتاب الإجارة /حدیث: 3447]

سیدنا قتادہ رحمہ اللہ نے کہا کہ: ”کھجور میں ذخیرہ اندوزی (روک رکھنا جائز) نہیں ہے۔“ ابن مثنی نے حسن بصری رحمہ اللہ سے بھی یہ بات بیان کی، تو ہم نے اس سے کہا: ”حسن کے متعلق یہ نہ کہیں۔“ (یعنی اس بات کی نسبت ان کی طرف نہ کریں)۔ امام ابوداؤد رحمہ اللہ کہتے ہیں کہ: ”یہ روایت ہمارے نزدیک باطل ہے۔“ امام ابوداؤد رحمہ اللہ مزید فرماتے ہیں کہ: ”جناب سعید بن مسیب رحمہ اللہ گٹھلی دار پھل (کھجور اور کشمش وغیرہ)، پتے (جانوروں کا چارا) اور (قابل کاشت) بیج ذخیرہ رکھتے تھے۔“ امام ابوداؤد رحمہ اللہ نے کہا: میں نے احمد بن یونس رحمہ اللہ سے سنا، انہوں نے کہا: میں نے جناب سفیان رحمہ اللہ سے برسیم حجازی (جانوروں کے چارے) کو دبانے (روکنے) کے متعلق پوچھا، تو انہوں نے کہا کہ: ”لوگ (صحابہ کرام رضی اللہ عنہم) ذخیرہ اندوزی کو مکروہ سمجھتے تھے۔“ میں نے ابوبکر بن عیاش رحمہ اللہ سے یہ مسئلہ پوچھا تو انہوں نے کہا کہ: ”ذخیرہ کر سکتے ہو۔“ [سنن ابي داود/كتاب الإجارة /حدیث: 3448]

جناب علقمہ بن عبداللہ اپنے والد رضی اللہ عنہ سے بیان کرتے ہیں کہ رسول اللہ صلی اللہ علیہ وسلم نے ”مسلمانوں میں رائج الوقت سکے کو توڑنے سے منع فرمایا ہے سوائے اس کے کہ کوئی خاص ضرورت ہو۔“ [سنن ابي داود/كتاب الإجارة /حدیث: 3449]

سیدنا ابوہریرہ رضی اللہ عنہ سے روایت ہے کہ ایک شخص آیا اور کہنے لگا: ”اے اللہ کے رسول! نرخ مقرر فرما دیجیے۔“ آپ صلی اللہ علیہ وسلم نے فرمایا: ”(نہیں) بلکہ میں دعا کروں گا (کہ اللہ تعالیٰ ارزانی فرما دے)۔“ پھر ایک اور آدمی آیا اور کہا: ”اے اللہ کے رسول! نرخ مقرر فرما دیجیے۔“ آپ صلی اللہ علیہ وسلم نے فرمایا: ”(نہیں) بلکہ اللہ ہی گھٹاتا اور بڑھاتا ہے، اور مجھے یقین ہے کہ میں اللہ سے اس حال میں ملوں گا کہ کسی کو مجھ پر ظلم کا دعویٰ نہ ہوگا۔“ [سنن ابي داود/كتاب الإجارة /حدیث: 3450]

سیدنا انس بن مالک رضی اللہ عنہ سے مروی ہے کہ لوگوں نے کہا: ”اے اللہ کے رسول! نرخ بہت بڑھ گئے ہیں، لہٰذا آپ نرخ مقرر فرما دیں۔“ رسول اللہ صلی اللہ علیہ وسلم نے فرمایا: ”بلاشبہ اللہ عز وجل ہی نرخ مقرر کرنے والا ہے، وہی تنگی کرنے والا، وسعت دینے والا، روزی رساں ہے، اور مجھے یقین ہے کہ میں اللہ سے اس حال میں ملوں گا کہ تم میں سے کوئی بھی مجھ پر کسی خون یا مال کے معاملے میں کوئی مطالبہ نہ رکھتا ہوگا۔“ [سنن ابي داود/كتاب الإجارة /حدیث: 3451]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم ایک آدمی کے پاس سے گزرے جو غلہ بیچ رہا تھا۔ آپ صلی اللہ علیہ وسلم نے اس سے پوچھا: ”کیسے بیچ رہے ہو؟“ اس نے بتا دیا۔ پھر آپ صلی اللہ علیہ وسلم پر وحی کی گئی کہ ”اپنا ہاتھ اس غلے میں ڈالیے۔“ آپ صلی اللہ علیہ وسلم نے اپنا ہاتھ اس میں ڈالا تو اسے گیلا پایا۔ تو رسول اللہ صلی اللہ علیہ وسلم نے فرمایا: ”جو دھوکا دیتا ہے وہ ہم میں سے نہیں۔“ [سنن ابي داود/كتاب الإجارة /حدیث: 3452]

یحییٰ بیان کرتے ہیں کہ جناب سفیان رحمہ اللہ ناپسند کرتے تھے کہ ” «لَيْسَ مِنَّا» کی تفسیر «لَيْسَ مِثْلَنَا» سے کی جائے۔“ [سنن ابي داود/كتاب الإجارة /حدیث: 3453]

سیدنا عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”خریدنے اور بیچنے والوں میں سے دونوں کو اختیار حاصل ہوتا ہے (کہ وہ اپنے سودے کو منسوخ کر دیں) جب تک کہ جدا نہ ہو جائیں، سوائے اس کے کہ سودا ہی اختیار کا ہو۔ (یعنی جدا ہونے کے بعد کی جتنی زیادہ یا کم مدت وہ آپس میں طے کر لیں اختیار قائم رہے گا)“ [سنن ابي داود/كتاب الإجارة /حدیث: 3454]

سیدنا ابن عمر رضی اللہ عنہما نے نبی کریم صلی اللہ علیہ وسلم سے اس حدیث کے ہم معنی روایت کیا۔ فرمایا: ”یا کوئی دوسرے کو یوں کہہ دے کہ (ابھی) پسند کر لو۔“ [سنن ابي داود/كتاب الإجارة /حدیث: 3455]