ام المؤمنین سیدہ عائشہ رضی اللہ عنہا نے اس قصے میں بیان کیا کہ نبی کریم صلی اللہ علیہ وسلم نے فرمایا: ”اے عائشہ! بدترین ہیں وہ لوگ جن کی زبان کے شر سے بچنے کے لیے عزت کی جائے۔“ [سنن ابي داود/كتاب الأدب /حدیث: 4793]

سیدنا انس رضی اللہ عنہ بیان کرتے ہیں: ”میں نے نہیں دیکھا کہ کسی نے نبی کریم صلی اللہ علیہ وسلم کے کان میں سرگوشی کرنا چاہی ہو تو آپ نے اس سے اپنا سر دور کر لیا ہو، حتیٰ کہ وہ آدمی خود ہی آپ صلی اللہ علیہ وسلم سے اپنا سر دور کرتا تھا۔ اور میں نے نہیں دیکھا کہ کسی نے آپ کا ہاتھ پکڑا ہو، تو آپ نے اس کا ہاتھ جھٹک دیا ہو، حتیٰ کہ وہ از خود آپ کا ہاتھ چھوڑتا تھا۔“ [سنن ابي داود/كتاب الأدب /حدیث: 4794]

سیدنا عبداللہ بن عمر رضی اللہ عنہ سے روایت ہے کہ نبی کریم صلی اللہ علیہ وسلم ایک انصاری کے پاس سے گزرے جب کہ وہ اپنے بھائی کو حیاء کے بارے میں وعظ کر رہا تھا، تو رسول اللہ صلی اللہ علیہ وسلم نے فرمایا: ”اسے چھوڑ دو، بلاشبہ حیاء ایمان سے ہے۔“ [سنن ابي داود/كتاب الأدب /حدیث: 4795]

سیدنا ابوقتادہ رضی اللہ عنہ بیان کرتے ہیں کہ ہم سیدنا عمران بن حصین رضی اللہ عنہ کے ساتھ تھے جبکہ وہاں بشیر بن کعب بھی تھے (با کے ضمہ کے ساتھ)، سیدنا عمران بن حصین رضی اللہ عنہ نے حدیث بیان کی، رسول اللہ صلی اللہ علیہ وسلم نے فرمایا: ”حیاء سراسر خیر ہے۔“ بشیر بن کعب نے کہا: ”ہمیں کئی کتابوں میں ملتا ہے کہ بعض حیاء اطمینان اور وقار کی وجہ سے ہوتی ہے اور بعض حیاء کمزوری اور بزدلی کی وجہ سے ہوتی ہے۔“ تو سیدنا عمران رضی اللہ عنہ نے حدیثِ رسول دوبارہ دہرائی اور پھر بشیر نے بھی اپنی بات دہرا دی۔ راوی بیان کرتے ہیں کہ سیدنا عمران رضی اللہ عنہ اس قدر غصے میں آ گئے کہ ان کی آنکھیں سرخ ہو گئیں اور بولے: ”میں تجھے رسول اللہ صلی اللہ علیہ وسلم کی حدیث سنا رہا ہوں اور تو مجھے اپنی کتابوں سے بتائے جا رہا ہے۔“ ہم نے کہا: ”اے ابونجید! بس کیجیے، بس کیجیے (اسے یہ تنبیہ کافی ہے)۔“ [سنن ابي داود/كتاب الأدب /حدیث: 4796]

سیدنا ابومسعود رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”گزشتہ انبیاء کی تعلیمات میں سے جو بات لوگوں کے پاس محفوظ رہی ہے وہ یہی ہے کہ جب حیا نہ رہے تو جو جی چاہے کر۔“ امام ابوداؤد رحمہ اللہ سے پوچھا گیا: ”کیا قعنبی کے پاس شعبہ کے واسطے سے اس حدیث کے سوا کوئی اور حدیث بھی ہے؟“ انہوں نے فرمایا: ”نہیں۔“ [سنن ابي داود/كتاب الأدب /حدیث: 4797]

ام المؤمنین سیدہ عائشہ رضی اللہ عنہا کا بیان ہے کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”بلاشبہ مومن اپنے حسن اخلاق (عمدہ عادات) کی بنا پر روزہ دار، شب زندہ دار کا درجہ حاصل کر لیتا ہے۔“ [سنن ابي داود/كتاب الأدب /حدیث: 4798]

سیدنا ابودرداء رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”میزان میں حسن خلق سے بڑھ کر اور کوئی چیز بھاری نہیں ہو گی۔“ ابوولید طیالسی رحمہ اللہ کہتے ہیں (قاسم بن ابی بزہ کی سند میں تصریح ہے کہ) ”میں نے عطاء کیخارانی سے سنا ہے۔“ امام ابوداؤد رحمہ اللہ فرماتے ہیں کہ ”یہ عطاء بن یعقوب ہیں اور ابراہیم بن نافع کے ماموں ہیں۔ ان کی نسبت کیخارانی اور کوخارانی، دونوں طرح بیان کی جاتی ہے۔“ [سنن ابي داود/كتاب الأدب /حدیث: 4799]

سیدنا ابوامامہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”میں ذمہ دار ہوں ایک محل کا، جنت کی ایک جانب میں، اس شخص کے لیے جو جھگڑا چھوڑ دے، اگرچہ حق پر ہو۔ اور ایک محل کا، جنت کے درمیان میں، اس شخص کے لیے جو جھوٹ چھوڑ دے، اگرچہ مزاح ہی میں ہو، اور جنت کی اعلیٰ منازل میں ایک محل کا، اس شخص کے لیے جو اپنے اخلاق کو عمدہ بنا لے۔“ [سنن ابي داود/كتاب الأدب /حدیث: 4800]

سیدنا حارثہ بن وہب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ترش رو بدمزاج جنت میں داخل نہیں ہو گا اور نہ تکبر سے چلنے والا۔“ اور «جَوَّاظٌ» کا مفہوم ہے ”سخت مزاج، بدخلق۔“ [سنن ابي داود/كتاب الأدب /حدیث: 4801]

سیدنا انس رضی اللہ عنہ کا بیان ہے کہ (رسول اللہ صلی اللہ علیہ وسلم کی اونٹنی) «عَضْبَاءُ» ہمیشہ سب سے آگے رہتی تھی، کوئی اس سے آگے نہ بڑھتا تھا۔ ایک بدوی اپنے ایک جوان اونٹ پر آیا اور اس اونٹنی سے مقابلہ کیا اور اس سے آگے بڑھ گیا۔ اس سے اصحاب رسول اللہ صلی اللہ علیہ وسلم کو گویا ناگواری ہوئی، تو رسول اللہ صلی اللہ علیہ وسلم نے فرمایا: ”اللہ پر یہ حق ہے کہ جو کوئی بھی دنیا میں اونچا ہوتا ہے تو وہ اسے نیچا دکھا دیتا ہے۔“ [سنن ابي داود/كتاب الأدب /حدیث: 4802]