جناب عمارہ بن غزیہ نے بیان کیا کہ میری قوم کے ایک آدمی نے سیدنا جابر بن عبداللہ رضی اللہ عنہ سے روایت کیا، انہوں نے کہا کہ رسول اللہ صلی اللہ علیہ وسلم نے فرمایا: ”جسے کوئی عطیہ اور ہدیہ دیا جائے تو اگر ہمت ہو اور میسر ہو تو اس کا بدلہ دے اور اگر نہ پائے تو اس کی مدح و ثنا کرے۔ جس نے اپنے محسن کی مدح کی اس نے اس کا شکریہ ادا کیا اور جس نے اس (کے احسان) کو چھپایا اس نے اس کی ناشکری کی۔“ امام ابوداؤد رحمہ اللہ کہتے ہیں کہ اس روایت کو یحییٰ بن ایوب نے بواسطہ عمارہ بن غزیہ، شرجیل سے اور اس نے سیدنا جابر رضی اللہ عنہ سے روایت کیا۔ امام ابوداؤد رحمہ اللہ کہتے ہیں کہ سند میں عمارہ بن غزیہ نے جس آدمی کا نام لیا اور یوں کہا ہے کہ ”میری قوم کے ایک آدمی نے مجھ سے بیان کیا۔“ وہ شرجیل ہی ہے، گویا انہوں نے اس کا نام ذکر کرنا پسند نہیں کیا۔ [سنن ابي داود/كتاب الأدب /حدیث: 4813]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جس نے کسی پر کوئی احسان کیا پھر اس دوسرے نے اس کا ذکر کیا تو یہ اس کا شکریہ ادا کرنا ہے اور اگر اس (دوسرے) نے اسے چھپایا تو یہ اس کی ناشکری اور ناقدری کی۔“ [سنن ابي داود/كتاب الأدب /حدیث: 4814]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”راستوں پر بیٹھنے سے احتراز کرو۔“ لوگوں نے کہا: ”اے اللہ کے رسول! ہمیں تو اس سے چارہ نہیں ہے، ہم نے آپس میں بات چیت کرنی ہوتی ہے،“ تو رسول اللہ صلی اللہ علیہ وسلم نے فرمایا: ”اگر اس سے انکار کرتے ہو تو پھر راستے کے حق کا خیال رکھو۔“ انہوں نے پوچھا: ”اے اللہ کے رسول! راستے کا کیا حق ہے؟“ آپ صلی اللہ علیہ وسلم نے فرمایا: ”نظر نیچی رکھنا، تکلیف دہ چیز کا ہٹا دینا، سلام کا جواب دینا، بھلی بات کہنا اور برائی سے روکنا۔“ [سنن ابي داود/كتاب الأدب /حدیث: 4815]

سیدنا ابوہریرہ رضی اللہ عنہ نے نبی کریم صلی اللہ علیہ وسلم سے اس قصے (حدیث) میں بیان کیا، آپ صلی اللہ علیہ وسلم نے فرمایا: ”راہ گیر کی رہنمائی کرنا (بھی راستے کے حق میں شامل ہے)۔“ [سنن ابي داود/كتاب الأدب /حدیث: 4816]

سیدنا عمر بن خطاب رضی اللہ عنہ نے اس قصے (حدیث) میں بیان کیا کہ نبی کریم صلی اللہ علیہ وسلم نے فرمایا: ”پریشان حال کی مدد کرو اور راستہ بھول جانے والے کی رہنمائی کرو۔“ [سنن ابي داود/كتاب الأدب /حدیث: 4817]

سیدنا انس رضی اللہ عنہ بیان کرتے ہیں کہ ایک عورت نبی کریم صلی اللہ علیہ وسلم کے پاس آئی اور کہنے لگی: ”اے اللہ کے رسول! مجھے آپ سے ایک کام ہے۔“ آپ صلی اللہ علیہ وسلم نے اس سے فرمایا: ”اے فلاں! کسی گلی کے کونے پر بیٹھ جاؤ میں تیرے ساتھ بیٹھ سکتا ہوں (تیری بات سن سکتا ہوں)۔“ چنانچہ وہ بیٹھ گئی اور نبی کریم صلی اللہ علیہ وسلم بھی اس کے ساتھ بیٹھ گئے حتیٰ کہ اس نے اپنا مقصد پا لیا۔ ابن عیسیٰ نے «حَتَّى قَضَتْ حَاجَتَهَا» کا لفظ ذکر نہیں کیا۔ اور کثیر (کثیر بن عبید) نے اپنی سند میں (عنعنہ سے روایت کرتے ہوئے) «عَنْ حُمَيْدٍ عَنْ أَنَسٍ» کہا۔ [سنن ابي داود/كتاب الأدب /حدیث: 4818]

سیدنا انس رضی اللہ عنہ نے بیان کیا کہ ”اس عورت کی عقل میں کوئی کمی تھی۔“ اور مذکورہ بالا کے ہم معنی بیان کیا۔ [سنن ابي داود/كتاب الأدب /حدیث: 4819]

سیدنا ابو سعید خدری رضی اللہ عنہ کہتے ہیں کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”بہترین مجلس وہ ہے جو وسیع اور کھلی ہو۔“ امام ابوداؤد رحمہ اللہ فرماتے ہیں کہ راویِ حدیث عبدالرحمٰن بن ابو عمرہ کا صحیح نسب یوں ہے: ”عبدالرحمٰن بن عمرو بن ابو عمرہ الانصاری۔“ [سنن ابي داود/كتاب الأدب /حدیث: 4820]

سیدنا ابوہریرہ رضی اللہ عنہ بیان کرتے ہیں کہ سیدنا ابوالقاسم صلی اللہ علیہ وسلم نے فرمایا: ”جب کوئی شخص دھوپ میں بیٹھا ہو، (مخلد کے الفاظ ہیں: اگر کوئی سائے میں بیٹھا ہو) اور پھر اس سے سایہ ٹل جائے اور وہ کچھ دھوپ میں آ جائے اور کچھ سائے میں تو وہاں سے اٹھ جائے۔“ [سنن ابي داود/كتاب الأدب /حدیث: 4821]

جناب قیس (قیس بن ابوحازم) اپنے والد رضی اللہ عنہ سے روایت کرتے ہیں کہ: ”وہ آئے جبکہ رسول اللہ صلی اللہ علیہ وسلم خطبہ ارشاد فرما رہے تھے۔ تو یہ دھوپ میں کھڑے ہو گئے تو آپ صلی اللہ علیہ وسلم نے انہیں حکم دیا تو سائے میں چلے گئے۔“ [سنن ابي داود/كتاب الأدب /حدیث: 4822]