حضرت ابو امامہ رضی اللہ عنہ سے روایت ہے کہ ایک دن نبی صلی اللہ علیہ وسلم شدید گرمی میں بقیع الغرقد کی طرف تشریف لے جا رہے تھے، دوسرے حضرات آپ صلی اللہ علیہ وسلم کے پیچھے چلے آ رہے تھے، آپ صلی اللہ علیہ وسلم نے ان کے جوتوں کی آواز سنی تو ناگواری محسوس ہوئی، لہٰذا آپ صلی اللہ علیہ وسلم بیٹھ گئے حتی کہ صحابہ رضی اللہ عنہم کو آگے نکل جانے دیا تاکہ آپ کے دل میں فخر کی کوئی کیفیت پیدا نہ ہو جائے۔ [سنن ابن ماجه/(أبواب كتاب السنة)/حدیث: 245]

حضرت جابر بن عبداللہ رضی اللہ عنہ سے روایت ہے، انہوں نے فرمایا: ”جب نبی صلی اللہ علیہ وسلم چلتے تو صحابہ کرام رضی اللہ عنہم آپ سے آگے چلتے تھے اور آپ کے پیچھے فرشتوں کے لیے جگہ چھوڑ دیتے تھے۔“ [سنن ابن ماجه/(أبواب كتاب السنة)/حدیث: 246]

حضرت ابو سعید خدری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”تمہارے پاس لوگ علم کی تلاش میں آئیں گے۔ جب تم انہیں دیکھو تو کہو: «مَرْحَبًا» ”خوش آمدید“ جن کے حق میں اللہ کے رسول صلی اللہ علیہ وسلم نے وصیت کی۔ اور انہیں وہ چیز دو جو ذخیرہ کیے جانے کے قابل ہے۔“ امام ابن ماجہ رحمہ اللہ کے استاذ محمد بن حارث رحمہ اللہ فرماتے ہیں: میں نے اپنے استاد حکم بن عبدہ رحمہ اللہ سے پوچھا: ”قابلِ ذخیرہ چیز دینے کا کیا مطلب ہے؟“ انہوں نے فرمایا: ”اس کا مطلب ہے کہ انہیں علم سکھاؤ۔“ [سنن ابن ماجه/(أبواب كتاب السنة)/حدیث: 247]

اسماعیل (بن مسلم) رحمہ اللہ سے روایت ہے، انہوں نے فرمایا: ”ہم حسن بصری رحمہ اللہ کی عیادت کے لیے ان کے ہاں گئے (ہم لوگوں کی تعداد اتنی زیادہ تھی کہ) کمرہ ہم لوگوں سے بھر گیا، حسن بصری رحمہ اللہ نے اپنے پاؤں سمیٹ لیے اور فرمایا: (ایک بار) ہم ابوہریرہ رضی اللہ عنہ کی بیمار پرسی کے لیے ان کے ہاں گئے حتیٰ کہ کمرہ بھر گیا تو انہوں نے بھی پاؤں سمیٹ لیے تھے اور فرمایا تھا: ”ہم لوگ رسول اللہ صلی اللہ علیہ وسلم کی خدمت میں حاضر ہوئے حتیٰ کہ کمرہ بھر گیا، آپ صلی اللہ علیہ وسلم پہلو کے بل لیٹے ہوئے تھے۔ ہمیں دیکھ کر قدم مبارک سمیٹ لیے۔ پھر فرمایا: ”میرے بعد تمہارے پاس بہت سے لوگ علم کی طلب میں آئیں گے، تم انہیں «مَرْحَبًا» ”خوش آمدید“ کہنا، انہیں دعائیں دینا اور انہیں تعلیم دینا۔“”حسن بصری رحمہ اللہ نے فرمایا: ”اللہ کی قسم! ہمیں تو ایسے لوگ ملے جنہوں نے ہمیں نہ «مَرْحَبًا» ”مرحبا“ کہا، نہ دعائیں دیں اور تعلیم بھی اس طرح دی کہ ہم ان کے پاس جاتے تھے اور وہ ہم سے بے رخی کا اظہار کرتے تھے۔“ [سنن ابن ماجه/(أبواب كتاب السنة)/حدیث: 248]

ابو ہارون عبدی سے روایت ہے، انہوں نے کہا: ہم لوگ جب حضرت ابو سعید خدری رضی اللہ عنہ کی خدمت میں حاضر ہوتے تو وہ فرماتے: ”انہیں خوش آمدید جن کے بارے میں اللہ کے رسول صلی اللہ علیہ وسلم نے وصیت کی ہے۔“ رسول اللہ صلی اللہ علیہ وسلم نے ہمیں فرمایا تھا: ”لوگ (دین میں) تمہارے تابع ہیں، وہ دنیا کے دور دراز علاقوں سے تمہارے پاس دین کی سمجھ حاصل کرنے کے لیے آئیں گے۔ میں وصیت کرتا ہوں کہ جب وہ تمہارے پاس آئیں تو ان سے بھلائی کرنا۔“ [سنن ابن ماجه/(أبواب كتاب السنة)/حدیث: 249]

حضرت ابو ہریرہ رضی اللہ عنہ سے روایت ہے کہ انہوں نے فرمایا: نبی کریم صلی اللہ علیہ وسلم کی ایک دعا یہ بھی تھی: «اَللّٰهُمَّ إِنِّي أَعُوذُ بِكَ مِنْ عِلْمٍ لَا يَنْفَعُ، وَمِنْ دُعَاءٍ لَا يُسْمَعُ، وَمِنْ قَلْبٍ لَا يَخْشَعُ، وَمِنْ نَفْسٍ لَا تَشْبَعُ» ”اے اللہ! میں تیری پناہ میں آتا ہوں اس علم سے جو فائدہ نہ دے، اس دعا سے جو قبول نہ ہو، اس دل سے جو (تیرے سامنے) عاجزی نہ کرے اور اس نفس سے جو سیر نہ ہو۔“ [سنن ابن ماجه/(أبواب كتاب السنة)/حدیث: 250]

حضرت ابوہریرہ رضی اللہ عنہ سے روایت ہے، انہوں نے فرمایا: اللہ کے رسول صلی اللہ علیہ وسلم فرمایا کرتے تھے: ” «اللَّهُمَّ انْفَعْنِي بِمَا عَلَّمْتَنِي، وَعَلِّمْنِي مَا يَنْفَعُنِي، وَزِدْنِي عِلْمًا، وَالْحَمْدُ لِلَّهِ عَلَى كُلِّ حَالٍ» ”اے اللہ! تو مجھے جو علم نصیب فرمائے اس سے مجھے فائدہ پہنچا اور مجھے وہ علم دے جو مجھے فائدہ دے اور میرے علم میں اضافہ فرما۔ اور ہر حال میں اللہ کی تعریف ہے۔“” [سنن ابن ماجه/(أبواب كتاب السنة)/حدیث: 251]

حضرت ابوہریرہ رضی اللہ عنہ سے روایت ہے، اللہ کے رسول صلی اللہ علیہ وسلم نے فرمایا: ”جو علم اللہ کی رضا کے لیے حاصل کیا جاتا ہے، جس نے اسے دنیا کا مال و متاع حاصل کرنے کے لیے سیکھا، اسے قیامت کے دن جنت کی خوشبو نہیں آئے گی۔“ [سنن ابن ماجه/(أبواب كتاب السنة)/حدیث: 252]