حضرت شفیق رضی اللہ عنہ سے روایت ہے، انہوں نے کہا: ”ایک شخص نے بیت اللہ کو ہدیہ کرنے کے لیے میرے ہاتھ کچھ درہم بھیجے۔ میں کعبہ میں داخل ہوا تو دیکھا کہ حضرت شیبہ رضی اللہ عنہ کرسی پر بیٹھے تھے۔ میں نے انہیں وہ درہم دے دیے۔ انہوں نے کہا: ”یہ تمہارے ہیں؟“ میں نے کہا: ”نہیں، اگر میرے ہوتے تو میں آپ کے پاس نہ لاتا۔“ انہوں نے کہا: ”تم نے یہ بات کہی ہے (تو مجھے بھی ایک بات یاد آگئی) حضرت عمر بن خطاب رضی اللہ عنہ (ایک دن) اسی جگہ بیٹھے تھے جہاں تم اب بیٹھے ہو، انہوں نے فرمایا: ”میں (کعبہ سے) باہر نہیں جاؤں گا جب تک کعبے کا مال نکال کر غریب مسلمانوں میں تقسیم نہ کردوں۔“ میں نے کہا: ”آپ یہ کام نہیں کرسکتے۔“ انہوں نے فرمایا: ”میں یہ کام ضرور کروں گا۔“ لیکن تم نے یہ بات کیوں کہی ہے؟ میں نے کہا: ”اس لیے کہ نبی کریم صلی اللہ علیہ وسلم اور حضرت ابوبکر رضی اللہ عنہ نے یہ مال یہاں دیکھا تھا اور ان کو اس مال کی آپ سے زیادہ ضرورت تھی، ان دونوں نے تو اسے ہلایا بھی نہیں۔“ حضرت عمر رضی اللہ عنہ اسی طرح کھڑے ہو گئے اور (کعبے سے) باہر تشریف لے گئے۔“ [سنن ابن ماجه/كتاب المناسك/حدیث: 3116]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جس شخص کو مکہ مکرمہ میں رمضان کا مہینہ آگیا اور اس نے حسب استطاعت اس کے روزے رکھے اور قیام کیا، اللہ تعالیٰ اس کے لیے کسی دوسری جگہ گزارے ہوئے ایک لاکھ رمضان کے مہینوں کا ثواب لکھ دے گا، اور اس کے لیے ہر دن کے بدلے میں ایک غلام آزاد کرنے کا ثواب اور ہر رات کے بدلے ایک غلام آزاد کرنے کا ثواب لکھے گا، اور ہر دن کے بدلے میں اللہ کی راہ میں ایک سواری کا گھوڑا دینے کا ثواب لکھے گا، اور ہر دن کی نیکی اور ہر رات کی ایک نیکی لکھے گا۔“ [سنن ابن ماجه/كتاب المناسك/حدیث: 3117]

داؤد بن عجلان سے روایت ہے، انہوں نے کہا: ”ہم نے ابو عقال کے ساتھ بارش میں طواف کیا۔ جب ہم نے طواف مکمل کر لیا تو ہم مقامِ ابراہیم کے پیچھے آ گئے۔ ابو عقال نے کہا: ”میں نے حضرت انس بن مالک رضی اللہ عنہ کے ہمراہ بارش میں طواف کیا۔ جب ہم نے طواف مکمل کر لیا تو مقامِ ابراہیم پر دو رکعتیں پڑھیں۔ تب حضرت انس رضی اللہ عنہ نے ہم سے کہا: ”اب نئے سرے سے اپنے عمل کا حساب سمجھو، تمہاری بخشش ہو گئی (پہلے گناہ سب معاف ہو گئے)۔ ہمیں بھی رسول اللہ صلی اللہ علیہ وسلم نے یہی ارشاد فرمایا تھا جب ہم نے رسول اللہ صلی اللہ علیہ وسلم کے ساتھ بارش میں طواف کیا تھا۔“““ [سنن ابن ماجه/كتاب المناسك/حدیث: 3118]

حضرت ابو سعید رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم اور آپ کے صحابہ کرام رضی اللہ عنہم نے مدینہ سے مکہ تک پیدل چل کر حج کیا، آپ صلی اللہ علیہ وسلم نے فرمایا: ”اپنی کمروں پر تہبند اچھی طرح باندھ لو (کمریں کس لو)۔“ اور رسول اللہ صلی اللہ علیہ وسلم ایسی رفتار سے چلے جس میں کچھ دوڑنا بھی شامل تھا (اتنی تیزی سے چلے کہ دوڑنے کے قریب ہو گئے)۔“ [سنن ابن ماجه/كتاب المناسك/حدیث: 3119]