حضرت حجاج بن عمرو انصاری رضی اللہ عنہ سے روایت ہے، انہوں نے فرمایا: ”میں نے نبی صلی اللہ علیہ وسلم سے سنا، آپ فرما رہے تھے: ”جس شخص کی ہڈی ٹوٹ جائے یا لنگڑا ہو جائے، وہ احرام کھول دے اور اس پر ایک اور حج کرنا لازم ہے۔““ (حضرت عکرمہ رضی اللہ عنہ نے کہا: ”میں نے یہ حدیث حضرت ابن عباس اور حضرت ابوہریرہ رضی اللہ عنہما سے بیان کی تو انہوں نے کہا: ”اس (حجاج بن عمرو) نے سچ کہا۔“”) [سنن ابن ماجه/كتاب المناسك/حدیث: 3077]

ام المومنین حضرت ام سلمہ رضی اللہ عنہا کے آزاد کردہ غلام حضرت عبداللہ بن رافع رحمہ اللہ سے روایت ہے، انہوں نے فرمایا: ”میں نے حضرت حجاج بن عمرو رضی اللہ عنہ سے احرام والے کو رکاوٹ پیش آنے کے بارے میں دریافت کیا تو انہوں نے کہا: رسول اللہ صلی اللہ علیہ وسلم نے فرمایا: ”جس شخص کی ہڈی ٹوٹ جائے، یا بیمار ہو جائے، یا لنگڑا ہو جائے، وہ احرام کھول دے، اور اس پر اگلے سال حج کرنا لازم ہے۔““ حضرت عکرمہ رحمہ اللہ فرماتے ہیں: ”میں نے یہ حدیث حضرت ابن عباس اور حضرت ابوہریرہ رضی اللہ عنہما سے بیان کی تو انہوں نے کہا: ”اس (حجاج بن عمرو) نے سچ کہا۔““ امام عبدالرزاق رحمہ اللہ نے کہا: ”میں نے اس روایت کو ہشام صاحب دستوائی کی کتاب میں پایا، چنانچہ اسے میں معمر کے پاس لایا تو انہوں نے میرے سامنے اس کی قراءت کی یا میں نے ان کے سامنے اس کی قراءت کی۔“ [سنن ابن ماجه/كتاب المناسك/حدیث: 3078]

حضرت عبداللہ بن معقل رضی اللہ عنہ سے روایت ہے، انہوں نے فرمایا: ”میں مسجد میں حضرت کعب بن عجرہ رضی اللہ عنہ کے پاس جا بیٹھا اور ان سے اس آیت کے بارے میں سوال کیا: (فوائد و مسائل): ﴿فَفِدْيَةٌ مِّن صِيَامٍ أَوْ صَدَقَةٍ أَوْ نُسُكٍ﴾ [سورة البقرة: 196] ”تو فدیہ ہے روزوں سے یا صدقے سے یا قربانی سے۔“ حضرت کعب رضی اللہ عنہ نے فرمایا: ”یہ آیت میرے ہی بارے میں نازل ہوئی ہے۔ مجھے سر میں (جوؤں کی وجہ سے) تکلیف تھی۔ مجھے رسول اللہ صلی اللہ علیہ وسلم کی خدمت میں حاضر کیا گیا جبکہ جوئیں (سر کے بالوں سے) جھڑ جھڑ کر میرے چہرے پر گر رہی تھیں تو آپ صلی اللہ علیہ وسلم نے فرمایا: ”میرا یہ خیال نہیں تھا کہ تمہیں اس حد تک تکلیف ہو گی جتنی میں (اب) دیکھ رہا ہوں۔ کیا تمہیں ایک بکری مل سکتی ہے؟“ میں نے کہا: ”جی نہیں۔“ تب یہ آیت نازل ہوئی: ﴿فَفِدْيَةٌ مِّن صِيَامٍ أَوْ صَدَقَةٍ أَوْ نُسُكٍ﴾ [سورة البقرة: 196] ”تو فدیہ ہے روزوں سے یا صدقے سے یا قربانی سے۔“ صحابی رضی اللہ عنہ نے فرمایا: ”روزے تو تین دن کے ہیں اور صدقہ چھ مسکینوں کو دیا جائے، ہر مسکین کو آدھا صاع غلہ دیا جائے۔ اور قربانی (کی مقدار) ایک بکری ہے۔““ [سنن ابن ماجه/كتاب المناسك/حدیث: 3079]

حضرت کعب بن عجرہ رضی اللہ عنہ سے روایت ہے، انہوں نے فرمایا: ”مجھے جب جوؤں سے تکلیف پہنچی تو نبی صلی اللہ علیہ وسلم نے مجھے حکم دیا کہ میں سر منڈا دوں اور تین دن روزے رکھوں یا چھ مسکینوں کو کھانا کھلا دوں۔ رسول اللہ صلی اللہ علیہ وسلم کو معلوم تھا کہ میرے پاس قربانی دینے کی گنجائش نہیں۔“ [سنن ابن ماجه/كتاب المناسك/حدیث: 3080]

حضرت عبداللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے روزے اور احرام کی حالت میں سینگی لگوائی۔“ [سنن ابن ماجه/كتاب المناسك/حدیث: 3081]

حضرت جابر رضی اللہ عنہ سے روایت ہے کہ نبی صلی اللہ علیہ وسلم نے ”احرام کی حالت میں سینگی لگوائی کیونکہ آپ کو درد ہو گیا تھا۔“ [سنن ابن ماجه/كتاب المناسك/حدیث: 3082]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم ”احرام کی حالت میں اپنے سر میں ایسا تیل ڈال لیتے تھے جس میں خوشبو نہ ہوتی۔“ [سنن ابن ماجه/كتاب المناسك/حدیث: 3083]

حضرت عبداللہ بن عباس رضی اللہ عنہما سے روایت ہے کہ ایک آدمی کے سواری کے جانور نے اس کی گردن توڑ دی جبکہ وہ شخص احرام کی حالت میں تھا۔ نبی صلی اللہ علیہ وسلم نے فرمایا: ”اسے «بِمَاءٍ وَسِدْرٍ» ”پانی اور بیری کے پتوں“ میں غسل دو اور اسے اس کے (احرام کے) دو کپڑوں میں کفنا دو، اس کا سر اور چہرہ نہ ڈھانپنا کیونکہ وہ قیامت کے دن «مُلَبِّيًا» ”لبیک پکارتا“ اٹھے گا۔“ [سنن ابن ماجه/كتاب المناسك/حدیث: 3084]

حضرت جابر رضی اللہ عنہ سے روایت ہے، انہوں نے فرمایا: ”اگر احرام والا آدمی لگڑ بگھا (بھیڑے جیسا ایک خونخوار جانور) مار دے تو رسول اللہ صلی اللہ علیہ وسلم نے اس پر ایک مینڈھے کی قربانی دینا لازم کیا ہے اور اس جانور کو شکار قرار دیا ہے۔“ [سنن ابن ماجه/كتاب المناسك/حدیث: 3085]