حضرت ابو بداح عدی بن عاصم رضی اللہ عنہ اپنے والد (حضرت عاصم بن عدی بن جد رضی اللہ عنہ) سے روایت کرتے ہیں، انہوں نے فرمایا: ”رسول اللہ صلی اللہ علیہ وسلم نے اونٹوں کے چرواہے کو رات گزارنے کے بارے میں رعایت دی کہ وہ قربانی کے دن رمی کریں، پھر قربانی کے بعد دو دن کی رمی اکٹھی کسی ایک دن (گیارہ یا بارہ تاریخ کو) کر لیں۔“ امام مالک رحمہ اللہ نے فرمایا: ”میرا خیال ہے کہ راوی نے یہ کہا تھا: دو دنوں میں سے پہلے دن (گیارہ ذوالحجہ کو) رمی کر لیں، اس کے بعد واپسی کے دن (تیرہ ذوالحجہ کو) رمی کر لیں۔“ [سنن ابن ماجه/كتاب المناسك/حدیث: 3037]

حضرت جابر رضی اللہ عنہ سے روایت ہے، انہوں نے فرمایا: ”ہم نے رسول اللہ صلی اللہ علیہ وسلم کے ساتھ حج کیا اور ہمارے ساتھ عورتیں اور بچے بھی تھے۔ ہم نے بچوں کی طرف سے لبیک کہا اور ان کی طرف سے رمی بھی کی۔“ [سنن ابن ماجه/كتاب المناسك/حدیث: 3038]

حضرت عبداللہ بن عباس رضی اللہ عنہما سے روایت ہے کہ نبی صلی اللہ علیہ وسلم «لَبَّيْكَ» ”لبیک“ پکارتے رہے حتیٰ کہ آپ صلی اللہ علیہ وسلم نے جمرۂ عقبہ کی رمی کی۔ [سنن ابن ماجه/كتاب المناسك/حدیث: 3039]

حضرت فضل بن عباس رضی اللہ عنہما سے روایت ہے، انہوں نے فرمایا: ”میں سواری پر نبی صلی اللہ علیہ وسلم کے پیچھے سوار تھا، چنانچہ میں آپ صلی اللہ علیہ وسلم کو «لَبَّيْكَ» پکارتے سنتا رہا حتیٰ کہ آپ صلی اللہ علیہ وسلم نے جمرۂ عقبہ (بڑے جمرے) کو کنکریاں ماریں۔ جب آپ صلی اللہ علیہ وسلم نے اس کی رمی کر لی تو «لَبَّيْكَ» پکارنا بند کر دیا۔“ [سنن ابن ماجه/كتاب المناسك/حدیث: 3040]

حضرت عبداللہ بن عباس رضی اللہ عنہ سے روایت ہے، انہوں نے فرمایا: ”جب تم جمرۂ عقبہ پر کنکریاں مار لو تو تمہارے لیے عورتوں کے سوا ہر چیز حلال ہو گئی۔“ ایک آدمی نے کہا: ”اے ابن عباس! خوشبو بھی؟“ انہوں نے فرمایا: ”میں نے (اس موقع پر) رسول اللہ صلی اللہ علیہ وسلم کو دیکھا تھا کہ آپ اپنے سر مبارک کو کستوری لگاتے تھے۔ تو کیا وہ خوشبو ہے کہ نہیں؟“ [سنن ابن ماجه/كتاب المناسك/حدیث: 3041]

حضرت عائشہ رضی اللہ عنہا سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کو احرام کے لیے خوشبو لگائی جب آپ صلی اللہ علیہ وسلم نے احرام باندھا اور احرام کھولنے پر خوشبو لگائی جب احرام کھولا۔“ [سنن ابن ماجه/كتاب المناسك/حدیث: 3042]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” «اللَّهُمَّ اغْفِرْ لِلْمُحَلِّقِينَ» ”اے اللہ! سر منڈوانے والوں کی بخشش فرما۔“”صحابہ کرام رضی اللہ عنہم نے عرض کیا: ”اے اللہ کے رسول! بال کٹوانے والوں کی بھی۔“ آپ صلی اللہ علیہ وسلم نے فرمایا: ” «اللَّهُمَّ اغْفِرْ لِلْمُحَلِّقِينَ» ”اے اللہ! سر منڈوانے والوں کی بخشش فرما۔“”تین بار اسی طرح دعا فرمائی۔ (تیسری بار بھی) صحابہ کرام رضی اللہ عنہم نے عرض کیا: ”اے اللہ کے رسول! بال کٹوانے والوں کی بھی (بخشش کی دعا فرمائیے)۔“ رسول اللہ صلی اللہ علیہ وسلم نے فرمایا: ” «وَالْمُقَصِّرِينَ» ”اور بال کٹوانے والوں کی بھی (بخشش فرما)۔“” [سنن ابن ماجه/كتاب المناسك/حدیث: 3043]

حضرت عبد اللہ بن عمر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” «اللَّهُمَّ ارْحَمِ الْمُحَلِّقِينَ» ”اللہ سر منڈوانے والوں پر رحمت فرمائے۔“”صحابہ نے کہا: ”اے اللہ کے رسول! بال کٹوانے والوں پر بھی۔“ رسول اللہ صلی اللہ علیہ وسلم نے فرمایا: ” «اللَّهُمَّ ارْحَمِ الْمُحَلِّقِينَ» ”اللہ سر منڈوانے والوں پر رحمت فرمائے۔“”صحابہ نے کہا: ”اے اللہ کے رسول! بال کٹوانے والوں پر بھی۔“ رسول اللہ صلی اللہ علیہ وسلم نے فرمایا: ” «اللَّهُمَّ ارْحَمِ الْمُحَلِّقِينَ» ”اللہ سر منڈوانے والوں پر رحمت فرمائے۔“”صحابہ نے کہا: ”اے اللہ کے رسول! بال کٹوانے والوں پر بھی۔“ فرمایا: ” «وَالْمُقَصِّرِينَ» ”اور بال کٹوانے والوں پر بھی۔“” [سنن ابن ماجه/كتاب المناسك/حدیث: 3044]

حضرت عبداللہ بن عباس رضی اللہ عنہما سے روایت ہے کہ عرض کیا گیا: ”اے اللہ کے رسول! آپ نے سر کے بال منڈوانے والوں کی تین بار تائید فرمائی اور کٹوانے والوں کی ایک بار؟“ آپ صلی اللہ علیہ وسلم نے فرمایا: ”انہوں نے شک نہیں کیا۔“ [سنن ابن ماجه/كتاب المناسك/حدیث: 3045]

حضرت عبداللہ بن عمر رضی اللہ عنہما سے روایت ہے، نبی صلی اللہ علیہ وسلم کی زوجہ محترمہ حضرت حفصہ رضی اللہ عنہا نے فرمایا: ”میں نے عرض کیا: اے اللہ کے رسول! کیا وجہ ہے لوگوں نے احرام کھول دیا اور آپ نے عمرہ کر کے احرام نہیں کھولا؟“ آپ صلی اللہ علیہ وسلم نے فرمایا: ”میں نے سر کے بالوں کو جمایا ہوا ہے اور قربانی کے جانور کو قلادے پہنائے ہوئے ہیں، اس لیے میں قربانی کرنے تک احرام نہیں کھولوں گا۔“ [سنن ابن ماجه/كتاب المناسك/حدیث: 3046]