حضرت اسامہ بن زید رضی اللہ عنہ سے روایت ہے، ان سے سوال کیا گیا کہ رسول اللہ صلی اللہ علیہ وسلم جب عرفات سے روانہ تھے تو کس طرح چلتے تھے؟ انہوں نے فرمایا: ”درمیانی رفتار سے چلتے تھے۔ جب کھلی جگہ ملتی تو رفتار تیز کر دیتے۔“ راویِ حدیث وکیع رحمہ اللہ نے کہا: ”یعنی آپ صلی اللہ علیہ وسلم درمیانی رفتار سے تھوڑا تیز چلتے۔“ [سنن ابن ماجه/كتاب المناسك/حدیث: 3017]

حضرت عائشہ رضی اللہ عنہا سے روایت ہے، انہوں نے فرمایا: ”قریش کہتے تھے: ہم بیت اللہ کے پاس رہنے والے ہیں۔ ہم حرم (کی حدود) سے آگے نہیں جائیں گے، اس لیے اللہ تعالیٰ نے فرمایا: ﴿ثُمَّ أَفِيضُوا مِنْ حَيْثُ أَفَاضَ النَّاسُ﴾ [سورة البقرة: 199] ”پھر وہاں سے واپس آؤ جہاں سے (دوسرے) لوگ واپس آئیں۔“” [سنن ابن ماجه/كتاب المناسك/حدیث: 3018]

حضرت اسامہ بن زید رضی اللہ عنہ سے روایت ہے، انہوں نے فرمایا: ”میں رسول اللہ صلی اللہ علیہ وسلم کے ساتھ (عرفات سے) واپس ہوا۔ جب رسول اللہ صلی اللہ علیہ وسلم اس گھاٹی کے پاس پہنچے جس کے پاس امیر قیام کرتے ہیں، آپ صلی اللہ علیہ وسلم سواری سے اترے اور پیشاب کیا، پھر آپ صلی اللہ علیہ وسلم نے وضو کیا۔ میں نے کہا: ”نماز!“ آپ صلی اللہ علیہ وسلم نے فرمایا: ”نماز آگے ہو گی۔“ جب رسول اللہ صلی اللہ علیہ وسلم مزدلفہ پہنچے تو اذان اور اقامت کہلوائی، پھر مغرب کی نماز پڑھائی، پھر کسی نے بھی اونٹوں سے سامان نہیں اتارا تھا کہ رسول اللہ صلی اللہ علیہ وسلم اٹھ کھڑے ہوئے اور عشاء کی نماز پڑھائی۔“ [سنن ابن ماجه/كتاب المناسك/حدیث: 3019]

حضرت ابو ایوب انصاری رضی اللہ عنہ سے روایت ہے، انہوں نے فرمایا: ”میں نے حجۃ الوداع میں رسول اللہ صلی اللہ علیہ وسلم کے ساتھ مغرب اور عشاء کی نمازیں مزدلفہ میں ادا کیں۔“ [سنن ابن ماجه/كتاب المناسك/حدیث: 3020]

حضرت عبداللہ بن عمر رضی اللہ عنہما سے روایت ہے کہ نبی صلی اللہ علیہ وسلم نے مزدلفہ میں مغرب کی نماز ادا کی۔ جب ہم نے اپنے اونٹ بٹھائے تو رسول اللہ صلی اللہ علیہ وسلم نے فرمایا: ”نماز اقامت کے ساتھ ہوتی ہے۔“ [سنن ابن ماجه/كتاب المناسك/حدیث: 3021]

حضرت عمرو بن میمون رحمہ اللہ سے روایت ہے، انہوں نے کہا: ”ہم نے حضرت عمر بن خطاب رضی اللہ عنہ کے ہمراہ حج کیا۔ جب ہم مزدلفہ سے واپس ہونے لگے تو حضرت عمر رضی اللہ عنہ نے فرمایا: ”مشرکین کہا کرتے تھے: «أَشْرِقْ ثَبِيرُ كَيْمَا نُغِيرُ» ”اے ثبیر پہاڑ! روشن ہو جا تاکہ ہم (واپس منیٰ کی طرف) بھاگیں۔“ وہ اس وقت تک واپس نہیں لوٹتے تھے جب تک کہ سورج طلوع نہ ہو جاتا۔ رسول اللہ صلی اللہ علیہ وسلم نے ان کے خلاف عمل کیا کہ سورج طلوع ہونے سے پہلے ہی واپس چل دیے۔““ [سنن ابن ماجه/كتاب المناسك/حدیث: 3022]

حضرت جابر رضی اللہ عنہ سے روایت ہے، انہوں نے فرمایا: حجۃ الوداع میں نبی صلی اللہ علیہ وسلم (مزدلفہ سے) واپس لوٹے تو آپ صلی اللہ علیہ وسلم پر اطمینان و سکون کی کیفیت تھی۔ آپ صلی اللہ علیہ وسلم نے لوگوں کو بھی سکون کا حکم دیا اور انہیں ایسی (چھوٹی) کنکریوں کے ساتھ رمی کرنے کا حکم دیا جو انگلیوں میں پکڑ کر پھینکی جا سکیں۔ آپ صلی اللہ علیہ وسلم نے وادئِ محسر میں سواری کو تیز کیا اور فرمایا: ”میری امت کو چاہیے کہ اپنے عبادت کے طریقے سیکھ لے۔ مجھے معلوم نہیں کہ میں اس سال کے بعد ان سے (حج میں) ملاقات نہ کر سکوں۔“ [سنن ابن ماجه/كتاب المناسك/حدیث: 3023]

حضرت بلال بن رباح رضی اللہ عنہ سے روایت ہے، نبی صلی اللہ علیہ وسلم نے مزدلفہ کی صبح ان سے فرمایا: ”بلال! لوگوں کو خاموش کرو۔“ پھر فرمایا: ”اللہ تعالیٰ نے تمہارے اس مزدلفہ میں تم پر احسان فرمایا ہے کہ تمہارے نیکوکاروں کی وجہ سے تمہارے گناہ گاروں کو بھی بخش دیا ہے اور تمہارے نیکوکاروں نے جو کچھ مانگا انہیں دے دیا۔ اللہ کا نام لے کر روانہ ہو جاؤ۔“ [سنن ابن ماجه/كتاب المناسك/حدیث: 3024]

حضرت عبد اللہ بن عباس رضی اللہ عنہما سے روایت ہے، انہوں نے فرمایا: ”ہم عبد المطلب کے خاندان کے چند لڑکے مزدلفہ سے اپنی گدھیوں پر رسول اللہ صلی اللہ علیہ وسلم سے پہلے ہی روانہ ہو گئے۔ رسول اللہ صلی اللہ علیہ وسلم نے ہماری رانوں پر ہاتھ مار کر فرمایا: ”میرے پیارے بیٹو! اس وقت تک جمرے پر کنکریاں نہ مارنا جب تک سورج طلوع نہ ہو جائے۔“”(راوئ حدیث) سفیان نے مذکورہ روایت میں ان الفاظ کا اضافہ کیا ہے: ”میرے خیال میں کوئی بھی سورج طلوع ہونے سے پہلے اسے کوئی رمی نہیں کرے گا۔“ [سنن ابن ماجه/كتاب المناسك/حدیث: 3025]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”رسول اللہ صلی اللہ علیہ وسلم نے اپنے گھر کے جو کمزور افراد (عورتیں اور بچے، قوت والے لوگوں سے) پہلے (مزدلفہ سے منیٰ) بھیجے تھے، میں بھی ان میں شامل تھا۔“ [سنن ابن ماجه/كتاب المناسك/حدیث: 3026]