حضرت ابو ایوب انصاری رضی اللہ عنہ سے روایت ہے، انہوں نے فرمایا: ہم نے عرض کیا: ”اے اللہ کے رسول صلی اللہ علیہ وسلم ! یہ سلام (تو ہمیں معلوم) ہے لیکن اجازت طلب کرنے کا کیا مطلب ہے؟“ آپ صلی اللہ علیہ وسلم نے فرمایا: ”آدمی کوئی بات کہے، «سُبْحَانَ اللّٰهِ» ”سبحان اللہ“ کہہ دے، «اللّٰهُ أَكْبَرُ» ”اللہ اکبر“ کہہ دے، «الْحَمْدُ لِلّٰهِ» ”الحمد للہ“ کہہ دے یا کھانس دے۔ (مقصد یہ ہے کہ) گھر والوں کو معلوم کرا دے (کہ میں اندر آنا چاہتا ہوں۔)“ [سنن ابن ماجه/كتاب الأدب/حدیث: 3707]

حضرت علی رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم کی خدمت میں حاضر ہونے کے میرے دو اوقات تھے۔ ایک رات میں اور ایک دن میں۔ جب میں ایسے وقت حاضر ہوتا کہ نبی صلی اللہ علیہ وسلم نماز پڑھ رہے ہوتے تو آپ صلی اللہ علیہ وسلم کھانس دیتے (جس کا مطلب یہ ہوتا کہ مجھے تمہارے آنے کا علم ہو گیا ہے اور تم اندر آ سکتے ہو۔)“ [سنن ابن ماجه/كتاب الأدب/حدیث: 3708]

حضرت جابر رضی اللہ عنہ سے روایت ہے، انہوں نے فرمایا: ”میں نے نبی صلی اللہ علیہ وسلم سے (حاضر ہونے کی) اجازت طلب کی تو آپ صلی اللہ علیہ وسلم نے فرمایا: ”کون ہے؟“ میں نے کہا: ”میں“۔ نبی صلی اللہ علیہ وسلم نے فرمایا: ”میں، میں“۔“ [سنن ابن ماجه/كتاب الأدب/حدیث: 3709]

حضرت جابر رضی اللہ عنہ سے روایت ہے، انہوں نے فرمایا: ”میں نے عرض کیا: اے اللہ کے رسول صلی اللہ علیہ وسلم ! آپ نے کیسے صبح کی؟ آپ نے فرمایا: خیریت سے صبح ہوئی، ایسے آدمی کی جس نے نہ روزہ رکھا، نہ کسی بیمار کی عیادت کی۔“ [سنن ابن ماجه/كتاب الأدب/حدیث: 3710]

حضرت ابو اسید (مالک بن ربیعہ) ساعدی رضی اللہ عنہ سے روایت ہے کہ رسول اللہ صلی اللہ علیہ وسلم حضرت عباس بن عبدالمطلب رضی اللہ عنہ کے ہاں تشریف لے گئے تو فرمایا: «السَّلَامُ عَلَيْكُمْ» ”تم پر سلامتی ہو“، انہوں نے (حضرت عباس رضی اللہ عنہ اور دیگر حاضرین رضی اللہ عنہم نے) کہا: «وَعَلَيْكَ السَّلَامُ وَرَحْمَةُ اللهِ وَبَرَكَاتُهُ» ”اور آپ پر بھی سلامتی اور اللہ کی رحمت اور اس کی برکتیں ہوں“، آپ صلی اللہ علیہ وسلم نے فرمایا: ”تمہاری صبح کیسی ہوئی؟ (کیا حال ہے؟)“ انہوں نے کہا: ”خیریت سے ہوئی، ہم اللہ کا شکر کرتے ہیں۔ آپ کی صبح کیسی ہوئی؟ اے اللہ کے رسول صلی اللہ علیہ وسلم ! ہمارے ماں باپ آپ پر قربان ہوں!“ آپ صلی اللہ علیہ وسلم نے فرمایا: ”میری صبح بھی خیریت سے ہوئی، میں اللہ کی حمد کرتا ہوں“۔ [سنن ابن ماجه/كتاب الأدب/حدیث: 3711]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جب تمہارے پاس کسی قوم کا معزز شخص آئے تو اس کی عزت کرو۔“ [سنن ابن ماجه/كتاب الأدب/حدیث: 3712]

حضرت انس بن مالک رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کے پاس دو آدمیوں کو چھینک آئی تو آپ صلی اللہ علیہ وسلم نے ایک کو دعا دی اور دوسرے کو نہ دی۔ عرض کیا گیا: ”اے اللہ کے رسول صلی اللہ علیہ وسلم ! آپ کے پاس دو آدمیوں کو چھینک آئی تو آپ صلی اللہ علیہ وسلم نے ایک کو دعا دی اور دوسرے کو دعا نہیں دی (اس کی کیا وجہ ہے؟)“ آپ صلی اللہ علیہ وسلم نے فرمایا: ”اس نے اللہ کی تعریف کی تھی جبکہ اس نے اللہ کی تعریف نہیں کی۔““ [سنن ابن ماجه/كتاب الأدب/حدیث: 3713]

حضرت سلمہ بن اکوع رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”چھینکنے والے کو تین بار ( «يَرْحَمُكَ اللّٰهُ» کہہ کر) دعا دی جائے، اس سے زیادہ ہو تو اس شخص کو زکام ہے۔“ [سنن ابن ماجه/كتاب الأدب/حدیث: 3714]

حضرت علی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب تم میں سے کسی کو چھینک آئے تو اسے چاہیے کہ یوں کہے: «الْحَمْدُ لِلّٰهِ» ”سب تعریفیں اللہ کے لیے ہیں“ (اللہ کا شکر ہے)۔ جو افراد اس کے پاس ہوں وہ کہیں: «يَرْحَمُكَ اللّٰهُ» ”اللہ تجھ پر رحمت نازل فرمائے“۔ وہ جواب میں انہیں کہے: «يَهْدِيكُمُ اللّٰهُ وَيُصْلِحُ بَالَكُمْ» ”اللہ تمہیں ہدایت پر قائم رکھے اور تمہارے حالات درست فرمائے“۔“ [سنن ابن ماجه/كتاب الأدب/حدیث: 3715]

حضرت انس بن مالک رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم جب کسی آدمی سے ملتے اور وہ آپ سے بات چیت کرتا تو آپ اپنا چہرہ اس سے نہیں پھیرتے تھے حتی کہ وہی (بات چیت سے فارغ ہو کر) دوسری طرف متوجہ ہو جاتا۔ اور جب کوئی آپ سے مصافحہ کرتا تو آپ صلی اللہ علیہ وسلم اس کے ہاتھ سے اپنا ہاتھ الگ نہ کرتے حتی کہ وہی اپنا ہاتھ الگ کرتا۔ اور آپ صلی اللہ علیہ وسلم کو کبھی اپنے ساتھ بیٹھے ہوئے سے گھٹنے آگے بڑھا کر بیٹھے ہوئے نہیں دیکھا گیا۔“ [سنن ابن ماجه/كتاب الأدب/حدیث: 3716]