حضرت سراقہ بن مالک رضی اللہ عنہ سے روایت ہے، نبی صلی اللہ علیہ وسلم نے فرمایا: ”کیا میں تمہیں سب سے افضل صدقہ نہ بتاؤں؟ تیری بیٹی جو (بیوہ ہو کر یا طلاق ہو جانے کی وجہ سے) تیرے پاس واپس آ جائے، اور تیرے سوا اس کا کوئی کمانے والا نہ ہو۔“ (اس کے اخراجات برداشت کرنا افضل صدقہ ہے)۔ [سنن ابن ماجه/كتاب الأدب/حدیث: 3667]

حضرت احنف بن قیس بن معاویہ رحمہ اللہ کے چچا حضرت صعصہ بن معاویہ تیمی رضی اللہ عنہ سے روایت ہے، انہوں نے فرمایا: ”حضرت عائشہ رضی اللہ عنہا کے پاس ایک عورت آئی، اس کے ساتھ اس کی دو بیٹیاں تھیں، ام المؤمنین رضی اللہ عنہا نے اسے تین کھجوریں دیں (اس وقت وہی میسر تھیں) اس نے دونوں بیٹیوں کو ایک ایک کھجور دی، پھر بچی ہوئی (تیسری کھجور) بھی دو ٹکڑے کرکے ان (بچیوں) کو دے دی۔ (بعد میں) نبی صلی اللہ علیہ وسلم تشریف لائے تو ام المؤمنین رضی اللہ عنہا نے یہ واقعہ عرض کیا، رسول اللہ صلی اللہ علیہ وسلم نے فرمایا: ”تعجب کیوں کرتی ہو؟ وہ عورت اس عمل کی وجہ سے جنت میں داخل ہوگئی ہے۔““ [سنن ابن ماجه/كتاب الأدب/حدیث: 3668]

حضرت عقبہ بن عامر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس کی تین بیٹیاں ہوں، وہ ان پر صبر کرے، جو کچھ میسر ہو اس میں سے انہیں کھلائے، پلائے اور پہنائے، قیامت کے دن وہ اس کے لیے جہنم سے رکاوٹ بن جائیں گی۔“ [سنن ابن ماجه/كتاب الأدب/حدیث: 3669]

حضرت عبداللہ بن عباس رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس شخص کی دو بیٹیاں جوان ہو جائیں اور وہ ان سے اس وقت تک اچھا سلوک کرتا رہے جب تک وہ اس کے ساتھ رہیں، یا جب تک وہ ان کے ساتھ رہے، وہ اسے جنت میں ضرور داخل کر دیں گی۔“ [سنن ابن ماجه/كتاب الأدب/حدیث: 3670]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اپنی اولاد کی عزت نفس کا خیال رکھو، اور انہیں اچھے آداب (واخلاق) سکھاؤ۔“ [سنن ابن ماجه/كتاب الأدب/حدیث: 3671]

حضرت ابو شریح خزاعی رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جو شخص اللہ پر اور یومِ آخرت پر ایمان رکھتا ہے تو اسے چاہیے کہ اپنے پڑوسی سے اچھا سلوک کرے، اور جو شخص اللہ پر اور یومِ آخرت پر ایمان رکھتا ہے تو اسے چاہیے کہ اپنے مہمان کی عزت کرے، اور جو شخص اللہ پر اور یومِ آخرت پر ایمان رکھتا ہے تو اسے چاہیے کہ اچھی بات کہے یا خاموش رہے۔“ [سنن ابن ماجه/كتاب الأدب/حدیث: 3672]

حضرت عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”مجھے جبرئیل علیہ السلام پڑوسی کے ساتھ حسن سلوک کی ہمیشہ تاکید کرتے رہے حتی کہ میں گمان کرنے لگا کہ وہ اسے وراثت میں بھی شریک ٹھہرا دیں گے۔“ [سنن ابن ماجه/كتاب الأدب/حدیث: 3673]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”حضرت جبریل علیہ السلام مجھے پڑوسی کے ساتھ حسن سلوک کی ہمیشہ تاکید کرتے رہے حتی کہ میں گمان کرنے لگا کہ وہ اسے وراثت میں بھی شریک ٹھہرا دیں گے۔“ [سنن ابن ماجه/كتاب الأدب/حدیث: 3674]

حضرت ابو شریح خزاعی رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جو شخص اللہ پر اور اس کے رسول پر ایمان رکھتا ہے، اسے چاہیے کہ اپنے مہمان کی عزت کرے۔ اور اس کی (واجب) مہمانی ایک دن رات۔ مہمان کے لیے اپنے دوست (میزبان) کے ہاں (اتنا عرصہ) ٹھہرے رہنا جائز نہیں کہ وہ (میزبان) تنگی محسوس کرے۔ مہمان (کی مسنون حد) تین دن تک ہے۔ تین دن کے بعد وہ جو کچھ اس پر خرچ کرتا ہے وہ صدقہ ہے۔“ [سنن ابن ماجه/كتاب الأدب/حدیث: 3675]

حضرت عقبہ بن عامر جہنی رضی اللہ عنہ سے روایت ہے، انہوں نے فرمایا: ”ہم نے اللہ کے رسول صلی اللہ علیہ وسلم سے عرض کیا: آپ صلی اللہ علیہ وسلم ہمیں (سرکاری امور کی انجام دہی کے لیے) بھیجتے ہیں۔ کچھ لوگوں کے پاس ہم ٹھہرتے ہیں تو وہ ہماری مہمانی نہیں کرتے۔ اس بارے میں آپ صلی اللہ علیہ وسلم کیا فرماتے ہیں؟“ رسول اللہ صلی اللہ علیہ وسلم نے ہم سے فرمایا: ”جب تم کچھ لوگوں کے پاس (ان کی بستی میں) ٹھہرو اور وہ تمہارے لیے وہ کچھ مہیا کریں جو مہمان کے لیے ہونا چاہیے تو (ان سے) قبول کر لو۔ اور اگر وہ ایسا نہ کریں تو ان سے مہمان کا وہ حق وصول کرو جو انہیں چاہیے تھا (کہ پیش کرتے)۔“ [سنن ابن ماجه/كتاب الأدب/حدیث: 3676]