حضرت ابوہریرہ رضی اللہ عنہ سے مروی ہے، وہ بیان کرتے ہیں کہ اللہ کے رسول صلی اللہ علیہ وسلم نے فرمایا: ”جب تم میں سے کسی کے برتن میں کتا منہ ڈال کر پیے تو اسے چاہیے کہ مشروب کو گرا دے اور برتن کو سات دفعہ دھوئے۔“ [سنن نسائي/كتاب المياه/حدیث: 336]

حضرت عبداللہ بن مغفل رضی اللہ عنہ سے منقول ہے کہ رسول اللہ صلی اللہ علیہ وسلم نے کتوں کو قتل کرنے کا حکم دیا اور شکار اور بکریوں کی حفاظت کے لیے کتا رکھنے کی اجازت دی اور فرمایا: ”جب کتا برتن میں منہ ڈال دے تو اسے سات دفعہ دھوؤ اور آٹھویں دفعہ اسے مٹی سے مانجو۔“ [سنن نسائي/كتاب المياه/حدیث: 337]

حضرت عبداللہ بن مغفل رضی اللہ عنہ سے مروی ہے، انہوں نے کہا: اللہ کے رسول صلی اللہ علیہ وسلم نے کتوں کے قتل کرنے کا حکم دیا، فرمایا: ”لوگوں کا کتوں سے کیا تعلق؟“ اور آپ صلی اللہ علیہ وسلم نے شکار اور بکریوں کی حفاظت کے لیے کتا رکھنے کی اجازت دی اور فرمایا: ”جب کتا برتن میں منہ ڈال دے تو اس (برتن) کو سات دفعہ دھوؤ اور آٹھویں بار مٹی سے مانجو۔“ حضرت ابوہریرہ رضی اللہ عنہ نے حضرت عبداللہ بن مغفل رضی اللہ عنہ کی مخالفت کی اور کہا: ”ایک دفعہ مٹی کے ساتھ (دھوو)۔“ [سنن نسائي/كتاب المياه/حدیث: 338]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب کتا کسی کے برتن میں چاٹ جائے تو وہ اسے سات دفعہ دھوئے۔ ان میں سے پہلی دفعہ مٹی کے ساتھ (دھوئے)۔“ [سنن نسائي/كتاب المياه/حدیث: 339]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب کتا کسی کے برتن سے پی جائے تو وہ اسے سات دفعہ دھوئے، ان میں سے پہلی دفعہ مٹی کے ساتھ (دھوئے)۔“ [سنن نسائي/كتاب المياه/حدیث: 340]

حضرت کبشہ بنت کعب بن مالک رضی اللہ عنہا سے مروی ہے کہ حضرت ابوقتادہ رضی اللہ عنہ میرے پاس آئے، میں نے ان کے لیے وضو کا پانی ڈالا، اتنے میں ایک بلی آئی اور اس سے پینے لگی، انہوں نے اس کے لیے برتن جھکا دیا (تاکہ وہ اچھی طرح پی سکے۔) حضرت کبشہ رضی اللہ عنہا نے کہا: چنانچہ انہوں نے مجھے دیکھا کہ میں (تعجب سے) دیکھ رہی ہوں تو وہ کہنے لگے: ”اے بھتیجی! کیا تعجب کرتی ہو؟“ میں نے کہا: ”جی ہاں!“ وہ کہنے لگے: ”تحقیق اللہ کے رسول صلی اللہ علیہ وسلم نے فرمایا ہے: «إِنَّهَا لَيْسَتْ بِنَجَسٍ، إِنَّهَا مِنَ الطَّوَّافِينَ عَلَيْكُمْ وَالطَّوَّافَاتِ» ”بلاشبہ یہ (بلی) پلید نہیں ہے۔ یہ تو تم پر آنے جانے والے (نوکروں اور نوکرانیوں) کی طرح ہے۔““ [سنن نسائي/كتاب المياه/حدیث: 341]

حضرت عائشہ رضی اللہ عنہا سے روایت ہے، انہوں نے فرمایا: ”بسا اوقات میں ایک ہڈی سے گوشت نوچتی تو رسول اللہ صلی اللہ علیہ وسلم اپنا دہن مبارک وہیں رکھتے جہاں میں نے رکھا تھا، حالانکہ میں حیض کی حالت میں ہوتی تھی۔ اسی طرح میں برتن سے پانی پیتی تو آپ اپنا منہ مبارک وہیں رکھتے جہاں میں نے اپنا منہ رکھا تھا، حالانکہ میں حیض کی حالت میں ہوتی تھی۔“ [سنن نسائي/كتاب المياه/حدیث: 342]

حضرت عبداللہ بن عمر رضی اللہ عنہ سے منقول ہے کہ ”رسول اللہ صلی اللہ علیہ وسلم کے دور میں (نزول حجاب سے قبل یا محرم) مرد اور عورتیں اکٹھے وضو کرلیا کرتے تھے۔“ [سنن نسائي/كتاب المياه/حدیث: 343]

حضرت حکم بن عمرو رضی اللہ عنہ سے مروی ہے کہ رسول اللہ صلی اللہ علیہ وسلم نے منع فرمایا کہ ”مرد، عورت کے وضو (یا غسل) سے بچے ہوئے پانی کے ساتھ وضو کرے۔“ [سنن نسائي/كتاب المياه/حدیث: 344]

حضرت عائشہ رضی اللہ عنہا سے منقول ہے، فرماتی ہیں: ”بلاشبہ وہ اللہ کے رسول صلی اللہ علیہ وسلم کے ساتھ ایک برتن میں غسل کیا کرتی تھیں۔“ [سنن نسائي/كتاب المياه/حدیث: 345]