حضرت ابوہریرہ رضی اللہ عنہ سے روایت ہے، انہوں نے کہا کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”جس نے اپنا مال بعینہ کسی شخص کے پاس پایا جو دیوالیہ ہو گیا ہے، تو وہ دوسروں کی نسبت اس کا زیادہ حق دار ہے۔“ [صحيح البخاري/كتاب الاستقراض/حدیث: 2402]

حضرت جابر رضی اللہ عنہ سے روایت ہے، انہوں نے کہا کہ ایک شخص نے اپنے مرنے کے بعد اپنے غلام آزاد کرنے کی وصیت کر دی۔ نبی صلی اللہ علیہ وسلم نے فرمایا: ”اس غلام کو مجھ سے کون خریدتا ہے؟“ تو اسے حضرت نعیم بن عبداللہ رضی اللہ عنہ نے خرید لیا، آپ صلی اللہ علیہ وسلم نے اس کی قیمت وصول کر کے مالک کو واپس کر دی۔ [صحيح البخاري/كتاب الاستقراض/حدیث: 2403]

حضرت ابوہریرہ رضی اللہ عنہ سے روایت ہے، وہ رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے بنی اسرائیل کے ایک شخص کا ذکر فرمایا کہ ”اس نے ایک دوسرے بنی اسرائیلی سے قرض طلب کیا تو اس نے مقررہ مدت تک کے لیے اسے قرض دے دیا۔“ پھر آگے پوری حدیث بیان کی۔ [صحيح البخاري/كتاب الاستقراض/حدیث: 2404]

حضرت جابر بن عبد اللہ رضی اللہ عنہما سے روایت ہے، انہوں نے کہا کہ (میرے والد گرامی) حضرت عبد اللہ رضی اللہ عنہ کی جب شہادت ہوئی تو وہ اپنے پیچھے بہت سا عیال اور قرض چھوڑ گئے۔ میں نے قرض خواہوں سے گزارش کی کہ وہ کچھ قرض معاف کر دیں لیکن انہوں نے انکار کر دیا۔ میں نبی صلی اللہ علیہ وسلم کی خدمت میں حاضر ہوا اور قرض خواہوں سے سفارش کرنے کی درخواست کی لیکن انہوں نے آپ صلی اللہ علیہ وسلم کی سفارش کو بھی ٹھکرا دیا۔ اس پر آپ صلی اللہ علیہ وسلم نے فرمایا: ”تم اپنی کھجوروں کی ہر قسم کو الگ الگ کر دو۔ عذق ابن زید الگ، لین علیحدہ اور عجوہ ایک طرف رکھو، پھر ان لوگوں کو بلاؤ حتیٰ کہ میں بھی آ جاؤں۔“ میں نے ایسا ہی کیا۔ پھر آپ صلی اللہ علیہ وسلم تشریف لائے اور کھجور کے ڈھیر کے پاس بیٹھ گئے اور ہر قرض خواہ کو ماپ کر دیا حتیٰ کہ سارا قرض ادا کر دیا اور کھجوریں اسی طرح باقی رہیں جس طرح پہلے تھیں، گویا ان کو ہاتھ بھی نہیں لگایا گیا تھا۔ [صحيح البخاري/كتاب الاستقراض/حدیث: 2405]

حضرت جابر رضی اللہ عنہ بیان کرتے ہیں کہ میں نے نبی صلی اللہ علیہ وسلم کے ہمراہ ایک اونٹ پر جہاد کیا۔ وہ اونٹ تھک ہار کر لوگوں سے پیچھے رہ گیا۔ نبی صلی اللہ علیہ وسلم نے اسے پیچھے سے چھڑی ماری اور فرمایا: ”اسے میرے ہاتھ فروخت کر دو، تاہم تمہیں مدینے تک اس پر سفر کرنے کی اجازت ہوگی۔“ جب ہم مدینہ طیبہ کے قریب آئے تو میں نے آگے جانے کی اجازت طلب کی اور بتایا کہ اے اللہ کے رسول صلی اللہ علیہ وسلم ! میں نے نئی نئی شادی کی ہے۔ آپ صلی اللہ علیہ وسلم نے دریافت فرمایا: ”دوشیزہ سے نکاح کیا ہے یا شوہر دیدہ سے؟“ میں نے عرض کیا: شوہر آشنا سے شادی کی ہے، وہ اس لیے کہ (میرے والد گرامی) حضرت عبداللہ رضی اللہ عنہ شہید ہو گئے تو انہوں نے چھوٹی چھوٹی بچیاں چھوڑیں، اس لیے میں نے ایک بیوہ سے شادی کی تاکہ وہ انہیں تعلیم دے اور تہذیب سکھائے۔ پھر آپ صلی اللہ علیہ وسلم نے فرمایا: ”تم اپنے اہل خانہ کے ہاں جاؤ۔“ میں نے گھر آکر اپنے ماموں کو اپنا اونٹ فروخت کرنے کا بتایا تو اس نے مجھے بڑی ملامت کی۔ میں نے اسے اپنے اونٹ کے تھک جانے کا، نبی صلی اللہ علیہ وسلم نے جو کچھ کیا اس کا، نیز اسے چھڑی مارنے کا واقعہ سنایا۔ حضرت جابر رضی اللہ عنہ کہتے ہیں کہ نبی صلی اللہ علیہ وسلم جب تشریف لائے تو صبح کے وقت میں بھی آپ کی خدمت میں اونٹ لے کر حاضر ہوا۔ آپ صلی اللہ علیہ وسلم نے مجھے اونٹ کی قیمت دی اور اونٹ بھی واپس کر دیا۔ اس کے علاوہ لوگوں کے ساتھ غنیمت میں میرا حصہ بھی دے دیا۔ [صحيح البخاري/كتاب الاستقراض/حدیث: 2406]

حضرت عبداللہ بن عمر رضی اللہ عنہما سے روایت ہے، انہوں نے کہا کہ ایک آدمی نبی صلی اللہ علیہ وسلم کی خدمت میں حاضر ہوا اور عرض کرنے لگا کہ میں لین دین میں بہت دھوکا کھا جاتا ہوں۔ آپ صلی اللہ علیہ وسلم نے فرمایا: ”جب تم کسی سے معاملہ کرو تو کہہ دیا کرو کہ کوئی دھوکا نہیں ہوگا۔“ چنانچہ وہ شخص معاملہ کرتے وقت یہ (الفاظ) کہہ دیتا تھا۔ [صحيح البخاري/كتاب الاستقراض/حدیث: 2407]

حضرت مغیرہ بن شعبہ رضی اللہ عنہ سے روایت ہے، انہوں نے بیان کیا کہ نبی کریم صلی اللہ علیہ وسلم نے فرمایا: ”اللہ تعالیٰ نے تم پر ماؤں کی نافرمانی اور لڑکیوں کو زندہ درگور کرنا حرام کر دیا ہے۔ حقوق ادا نہ کرنا اور دوسروں کے سامنے ہاتھ پھیلانا بھی حرام قرار دیا ہے، نیز تمہارے لیے فضول گفتگو، کثرتِ سوال اور بربادیِ مال کو ناپسند کیا ہے۔“ [صحيح البخاري/كتاب الاستقراض/حدیث: 2408]