حضرت زید بن اسلم سے روایت ہے، وہ اپنے باپ سے بیان کرتے ہیں، انہوں نے کہا کہ میں حضرت عمر رضی اللہ عنہ کے ہمراہ بازار گیا تو وہاں آپ سے ایک نوجوان عورت نے ملاقات کی۔ اس نے عرض کی: ”اے امیر المومنین! میرا شوہر فوت ہو گیا ہے اور اپنے پیچھے چھوٹے چھوٹے بچے چھوڑ گیا ہے۔ اللہ کی قسم! ان کے پاس نہ تو بکری کے پائے ہیں جنہیں پکا کر کھائیں، نہ کھیتی ہے اور نہ دودھ کے جانور ہی ہیں۔ مجھے اندیشہ ہے کہ وہ فقر و فاقہ کی وجہ سے ہلاک نہ ہو جائیں۔ اور میں خفاف بن ایماء غفاری کی بیٹی ہوں جو رسول اللہ صلی اللہ علیہ وسلم کے ہمراہ حدیبیہ میں موجود تھے۔“ حضرت عمر رضی اللہ عنہ یہ سن کر آگے بڑھنے کے بجائے اس کے پاس ٹھہر گئے، پھر فرمایا: ”مرحبا! تمہارا خاندانی تعلق تو بہت ہی قریبی ہے۔“ اس کے بعد آپ ایک طاقتور اونٹ کی طرف گئے جو گھر میں بندھا ہوا تھا اور اس پر دو بوریاں گندم سے بھر کر رکھ دیں۔ ان دونوں بوریوں کے درمیان کچھ خرچہ اور کپڑے وغیرہ بھی رکھ دیے۔ پھر آپ نے اس کی مہار عورت کے ہاتھ میں دے کر فرمایا: ”اسے لے جاؤ، اس کے ختم ہونے سے پہلے پہلے اللہ تعالیٰ کوئی اور بہتر بندوبست کر دے گا۔“ ایک آدمی نے کہا: ”اے امیر المومنین! آپ نے اس عورت کو بہت سا مال دے دیا ہے۔“ حضرت عمر رضی اللہ عنہ نے فرمایا: ”تیری ماں تجھے روئے، اللہ کی قسم! اس عورت کے والد اور بھائی کو میں نے دیکھا، انہوں نے ایک مدت تک قلعے کا محاصرہ کیا، آخر کار اسے فتح کر لیا، پھر ہم صبح کے وقت مالِ غنیمت سے حصہ وصول کر رہے تھے۔“ [صحيح البخاري/كتاب المغازي/حدیث: 4161]

حضرت مسیب رضی اللہ عنہ سے روایت ہے، انہوں نے کہا: ”میں نے وہ درخت دیکھا تھا (جس کے نیچے بیعت رضوان ہوئی تھی) لیکن بعد میں جب آیا تو میں اسے پہچان نہ سکا۔“ محمود کی روایت کے مطابق انہوں نے فرمایا: ”پھر مجھے وہ درخت یاد نہیں رہا تھا۔“ [صحيح البخاري/كتاب المغازي/حدیث: 4162]

طارق بن عبدالرحمن سے روایت ہے، انہوں نے کہا: ”میں حج کے لیے نکلا تو چند ایسے لوگوں کے پاس سے گزرا جو نماز پڑھ رہے تھے۔ میں نے پوچھا: یہ کون سی مسجد ہے؟ لوگوں نے بتایا کہ یہ وہی درخت ہے جہاں رسول اللہ صلی اللہ علیہ وسلم نے بیعتِ رضوان لی تھی۔ میں سعید بن مسیب کے پاس آیا اور انہیں اس کی خبر دی تو انہوں نے فرمایا: مجھے میرے والد گرامی نے حدیث بیان کی اور وہ ان لوگوں میں شامل تھے جنہوں نے درخت کے نیچے رسول اللہ صلی اللہ علیہ وسلم سے بیعت کی تھی، انہوں نے فرمایا: جب ہم اگلے سال حج کے لیے نکلے تو اس کی جگہ بھول گئے اور اسے معلوم کرنے پر قادر نہ ہو سکے۔ حضرت سعید بن مسیب نے فرمایا: بلاشبہ حضرت محمد صلی اللہ علیہ وسلم کے صحابہ کرام رضی اللہ عنہم تو اس درخت کو پہچان نہ سکے اور تم لوگوں نے اسے پہچان لیا! تم لوگ ان سے زیادہ جانتے ہو؟“ [صحيح البخاري/كتاب المغازي/حدیث: 4163]

حضرت سعید بن مسیب رحمہ اللہ سے روایت ہے، وہ اپنے باپ حضرت مسیب رضی اللہ عنہ سے بیان کرتے ہیں، وہ ان لوگوں میں سے تھے جنہوں نے اس درخت کے نیچے بیعت کی تھی، انہوں نے فرمایا: ”جب ہم دوسرے سال ادھر گئے تو ہمیں پتا ہی نہ چل سکا کہ وہ کون سا درخت تھا۔“ [صحيح البخاري/كتاب المغازي/حدیث: 4164]

حضرت طارق بن عبدالرحمٰن سے روایت ہے، انہوں نے کہا کہ سعید بن مسیب رحمہ اللہ کی مجلس میں «الشَّجَرَةُ» کا ذکر ہوا تو وہ ہنس پڑے اور کہا: ”میرے والد گرامی رضی اللہ عنہ نے مجھے بتایا تھا اور وہ اس درخت کے نیچے بیعت کے وقت وہاں موجود تھے۔“ [صحيح البخاري/كتاب المغازي/حدیث: 4165]

حضرت عبداللہ بن ابی اوفی رضی اللہ عنہ سے روایت ہے، اور وہ اصحاب شجرہ میں سے ہیں، انہوں نے فرمایا: ”جب لوگ نبی صلی اللہ علیہ وسلم کے پاس صدقہ لے کر آتے تو آپ صلی اللہ علیہ وسلم ان کے لیے دعا فرماتے: «اللَّهُمَّ صَلِّ عَلَيْهِمْ» ”اے اللہ! ان پر رحمت نازل فرما۔“ چنانچہ میرے والد بھی آپ صلی اللہ علیہ وسلم کے پاس صدقہ لے کر آئے تو آپ صلی اللہ علیہ وسلم نے دعا فرمائی: «اللَّهُمَّ صَلِّ عَلَى آلِ أَبِي أَوْفَى» ”اے اللہ! ابی اوفی کی اولاد پر رحمت نازل فرما۔““ [صحيح البخاري/كتاب المغازي/حدیث: 4166]

حضرت عباد بن تمیم رحمہ اللہ سے روایت ہے، انہوں نے کہا کہ حرہ کے دن عبداللہ بن حنظلہ کی لوگ بیعت کر رہے تھے تو حضرت ابن زید رضی اللہ عنہ نے کہا: ”ابن حنظلہ لوگوں سے کس شرط پر بیعت لے رہے ہیں؟“ انہیں بتایا گیا: ”وہ موت پر بیعت لے رہے ہیں۔“ انہوں نے فرمایا: ”میں تو رسول اللہ صلی اللہ علیہ وسلم کے بعد کسی دوسرے شخص سے موت پر بیعت نہیں کروں گا۔“ اور وہ (عبداللہ بن زید رضی اللہ عنہ) آپ صلی اللہ علیہ وسلم کے ہمراہ حدیبیہ میں موجود تھے۔ [صحيح البخاري/كتاب المغازي/حدیث: 4167]

حضرت سلمہ بن اکوع رضی اللہ عنہ سے روایت ہے اور وہ اصحابِ شجرہ میں سے تھے، انہوں نے کہا: ”ہم نبی صلی اللہ علیہ وسلم کے ساتھ نمازِ جمعہ ادا کرتے، پھر جب ہم نماز سے فارغ ہوتے تو دیواروں کا اتنا سایہ نہ ہوتا تھا کہ ہم اس میں بیٹھ سکتے۔“ [صحيح البخاري/كتاب المغازي/حدیث: 4168]

حضرت یزید بن ابو عبید سے روایت ہے، انہوں نے کہا کہ میں نے سلمہ بن اکوع رضی اللہ عنہ سے پوچھا: ”تم نے حدیبیہ میں رسول اللہ صلی اللہ علیہ وسلم کی کس شرط پر بیعت کی تھی؟“ انہوں نے فرمایا: ”موت پر۔“ [صحيح البخاري/كتاب المغازي/حدیث: 4169]

حضرت مسیب رحمہ اللہ سے روایت ہے، انہوں نے کہا کہ میں حضرت براء بن عازب رضی اللہ عنہ کی خدمت میں حاضر ہوا اور عرض کی: ”آپ کو مبارک ہو! آپ نے نبی صلی اللہ علیہ وسلم کی صحبت اختیار کی اور آپ کو درخت کے نیچے آپ صلی اللہ علیہ وسلم سے بیعتِ رضوان کا موقع ملا۔“ انہوں نے فرمایا: ”اے بھتیجے! تم نہیں جانتے کہ ہم نے آپ صلی اللہ علیہ وسلم کے بعد کیا کیا کام کیے۔“ [صحيح البخاري/كتاب المغازي/حدیث: 4170]