حضرت مجاشع بن مسعود رضی اللہ عنہ سے روایت ہے کہ میں ابو معبد کو لے کر نبی صلی اللہ علیہ وسلم کی خدمت میں حاضر ہوا تاکہ آپ ہجرت پر ان سے بیعت لیں، تو آپ صلی اللہ علیہ وسلم نے فرمایا: ”ہجرت تو اہل ہجرت کے ساتھ گزر چکی ہے، اب میں اسلام اور جہاد پر بیعت لوں گا۔“ (راویِ حدیث کہتے ہیں:) پھر میں ابو معبد سے ملا اور ان سے پوچھا تو انہوں نے کہا کہ مجاشع نے سچ کہا ہے۔ خالد نے ابو عثمان کے واسطے سے مجاشع سے روایت کی کہ وہ اپنے بھائی مجالد کو لے کر آئے تھے۔ [صحيح البخاري/كتاب المغازي/حدیث: 4307]

حضرت مجاشع بن مسعود رضی اللہ عنہ روایت کرتے ہیں کہ میں ابو معبد کو لے کر نبی صلی اللہ علیہ وسلم کی خدمت میں حاضر ہوا تاکہ آپ ہجرت پر اس سے بیعت لیں تو آپ صلی اللہ علیہ وسلم نے فرمایا: ”ہجرت تو اہل ہجرت کے ساتھ گزر چکی ہے۔ اب میں اسلام اور جہاد پر بیعت لوں گا۔“ (راویِ حدیث کہتے ہیں:) پھر میں ابو معبد سے ملا اور اس سے پوچھا تو انہوں نے کہا کہ مجاشع نے سچ کہا ہے۔ خالد نے ابو عثمان کے واسطے سے حضرت مجاشع رضی اللہ عنہ سے روایت کی کہ وہ اپنے بھائی مجالد کو لے کر آئے تھے۔ [صحيح البخاري/كتاب المغازي/حدیث: 4308]

حضرت مجاہد رحمہ اللہ سے روایت ہے، انہوں نے کہا کہ میں نے حضرت عبداللہ بن عمر رضی اللہ عنہ سے عرض کی: ”میرا شام کی طرف ہجرت کرنے کا ارادہ ہے۔“ انہوں نے فرمایا: ”اب ہجرت ختم ہے لیکن جہاد باقی ہے۔ جاؤ، خود کو (جہاد کے لیے) پیش کرو۔ اگر تمہیں موقع مل جائے تو ٹھیک، بصورتِ دیگر واپس آ جاؤ۔“ [صحيح البخاري/كتاب المغازي/حدیث: 4309]

حضرت مجاہد رحمہ اللہ ہی سے روایت ہے کہ میں نے حضرت ابن عمر رضی اللہ عنہ سے ہجرت کے متعلق دریافت کیا تو انہوں نے فرمایا: ”فتح مکہ کے بعد ہجرت ختم ہے،“ یا فرمایا: ”رسول اللہ صلی اللہ علیہ وسلم کے بعد کوئی ہجرت نہیں۔“ [صحيح البخاري/كتاب المغازي/حدیث: 4310]

مجاہد بن جبر رحمہ اللہ سے روایت ہے کہ حضرت عبداللہ بن عمر رضی اللہ عنہما کہتے ہیں کہ: ”فتح مکہ کے بعد ہجرت ختم ہے۔“ [صحيح البخاري/كتاب المغازي/حدیث: 4311]

حضرت عطاء بن ابی رباح رحمہ اللہ سے روایت ہے، انہوں نے کہا کہ میں عبید بن عمیر کے ہمراہ حضرت عائشہ رضی اللہ عنہا سے ملنے گیا تو انہوں نے ان سے ہجرت کے بارے میں پوچھا، تو حضرت عائشہ رضی اللہ عنہا نے فرمایا: ”آج ہجرت باقی نہیں رہی کیونکہ پہلے آدمی اپنے دین کو بچانے کے لیے اللہ اور اس کے رسول صلی اللہ علیہ وسلم کی طرف بھاگتا تھا، مبادا دین کی وجہ سے کسی فتنے میں مبتلا ہو جائے۔ آج فتح مکہ کے بعد اللہ تعالیٰ نے اسلام کو غلبہ دیا ہے، اس لیے مومن جہاں چاہے اپنے رب کی عبادت کر سکتا ہے، لیکن جہاد اور نیت (کا ثواب) باقی ہے۔“ [صحيح البخاري/كتاب المغازي/حدیث: 4312]

حضرت مجاہد رحمہ اللہ سے روایت ہے کہ رسول اللہ صلی اللہ علیہ وسلم فتح مکہ کے دن خطبے کے لیے کھڑے ہوئے اور فرمایا: ”اللہ تعالیٰ نے جس دن آسمانوں اور زمین کو پیدا کیا تھا اسی دن اس نے مکے کو حرمت والا قرار دے دیا تھا۔ یہ شہر اللہ کے حرام ٹھہرانے سے قیامت تک کے لیے حرمت والا ہے۔ مجھ سے پہلے کسی کے لیے حلال نہیں ہوا اور نہ میرے بعد کسی کے لیے حلال ہو گا۔ میرے لیے بھی دن کی ایک گھڑی کے لیے حلال ہوا تھا۔ یہاں حدودِ حرم میں شکار کے قابل کسی جانور کو نہ چھیڑا جائے۔ یہاں کے کانٹے دار درخت بھی نہ کاٹے جائیں، اور نہ یہاں کی گھاس اکھاڑی جائے، نیز یہاں پر گری پڑی چیز نہ اٹھائی جائے سوائے اس شخص کے جو اس کے اعلان کا ارادہ رکھتا ہو۔“ حضرت عباس بن عبدالمطلب رضی اللہ عنہ نے کہا: ”اے اللہ کے رسول! اذخر گھاس کی اجازت دیں کیونکہ وہ لوہاروں اور گھروں کی ضرورت ہے۔“ آپ صلی اللہ علیہ وسلم خاموش ہو گئے۔ پھر آپ صلی اللہ علیہ وسلم نے فرمایا: ”ٹھیک ہے، اذخر اس سے مستثنیٰ ہے۔ چنانچہ یہ تمہارے لیے حلال ہے۔“ دوسری روایت ابن جریج سے ایسے ہی ہے، انہوں نے عبدالکریم سے، انہوں نے عکرمہ سے اور انہوں نے حضرت ابن عباس رضی اللہ عنہما سے بیان کیا ہے۔ حضرت ابوہریرہ رضی اللہ عنہ نے بھی نبی صلی اللہ علیہ وسلم سے اسے بیان کیا ہے۔ [صحيح البخاري/كتاب المغازي/حدیث: 4313]

اسماعیل سے روایت ہے، انہوں نے کہا: ”میں نے ابن ابی اوفی رضی اللہ عنہ کے ہاتھ پر تلوار کا زخم دیکھا۔“ انہوں نے بتایا کہ ”غزوہ حنین میں مجھے نبی صلی اللہ علیہ وسلم کے ہمراہ یہ زخم آیا تھا۔“ میں نے پوچھا: ”آپ غزوہ حنین میں موجود تھے؟“ انہوں نے فرمایا: ”میں اس سے پہلے غزوات میں بھی حاضر ہوتا رہا ہوں۔“ [صحيح البخاري/كتاب المغازي/حدیث: 4314]

حضرت براء رضی اللہ عنہ سے روایت ہے، ان کے پاس ایک آدمی آیا اور ان سے کہنے لگا: ”اے ابو عمارہ! کیا تم نے حنین کی لڑائی میں پیٹھ پھیر لی تھی؟“ انہوں نے جواب دیا: ”میں گواہی دیتا ہوں کہ نبی صلی اللہ علیہ وسلم اپنی جگہ سے نہیں ہٹے تھے، البتہ قوم میں جو جلد باز تھے انہوں نے اپنی جلد بازی کا ثبوت دیا تو ہوازن کے تیر اندازوں نے انہیں اپنے تیروں سے چھلنی کر دیا۔ اس دوران میں حضرت ابو سفیان بن حارث رضی اللہ عنہ آپ صلی اللہ علیہ وسلم کے سفید خچر کی لگام تھامے ہوئے تھے جبکہ رسول اللہ صلی اللہ علیہ وسلم فرما رہے تھے: «أَنَا النَّبِيُّ لَا كَذِبْ، أَنَا ابْنُ عَبْدِ الْمُطَّلِبْ» ”میں نبی برحق ہوں، اس میں کوئی جھوٹ نہیں۔ میں عبدالمطلب کا بیٹا ہوں۔““ [صحيح البخاري/كتاب المغازي/حدیث: 4315]

حضرت ابو اسحاق سے روایت ہے، انہوں نے کہا کہ میں نے حضرت براء رضی اللہ عنہ سے سنا جبکہ ان کے پاس ایک آدمی آیا اور کہا: ”(ابو عمارہ!) کیا تم لوگوں نے نبی صلی اللہ علیہ وسلم کے ہمراہ حنین کے دن پیٹھ پھیر لی تھی؟ (بھاگ گئے تھے؟)“ انہوں نے کہا: ”جہاں تک نبی صلی اللہ علیہ وسلم کا تعلق ہے تو آپ صلی اللہ علیہ وسلم نے پیٹھ نہیں پھیری تھی۔ دراصل قبیلہ ہوازن کے لوگ سخت تیر انداز تھے اور آپ صلی اللہ علیہ وسلم نے اس وقت فرمایا: «أَنَا النَّبِيُّ لَا كَذِبْ، أَنَا ابْنُ عَبْدِ الْمُطَّلِبْ» ”میں نبی ہوں، جس میں کوئی جھوٹ نہیں اور میں عبدالمطلب کا بیٹا ہوں۔““ [صحيح البخاري/كتاب المغازي/حدیث: 4316]