حضرت علی رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم نے کدو اور تار کول کے برتنوں میں نبیذ بنانے سے منع فرمایا۔“ عثمان بن ابی شیبہ نے جریر کے واسطے سے اعمش سے یہ حدیث بیان کی۔ [صحيح البخاري/كتاب الأشربة/حدیث: 5594]

حضرت ابراہیم نخعی رحمہ اللہ سے روایت ہے، انہوں نے کہا کہ میں نے حضرت اسود بن یزید رحمہ اللہ سے پوچھا: ”کیا تم نے حضرت عائشہ رضی اللہ عنہا سے پوچھا تھا کہ کس برتن میں نبیذ بنانا مکروہ ہے؟“ حضرت اسود رحمہ اللہ نے کہا: ”ہاں۔“ میں نے عرض کی: ”ام المؤمنین! نبی صلی اللہ علیہ وسلم نے کس کس برتن میں نبیذ بنانے سے منع فرمایا تھا؟“ انہوں نے کہا: ”آپ صلی اللہ علیہ وسلم نے ہم اہل خانہ کو کدو اور تارکول کے برتنوں میں نبیذ بنانے سے منع فرمایا۔“ میں نے حضرت اسود رحمہ اللہ سے پوچھا کہ انہوں نے مٹکے اور سبز مرتبان کا ذکر نہیں کیا؟ تو انہوں نے کہا: ”میں تم سے وہی کچھ بیان کرتا ہوں جو میں نے سنا ہے، کیا وہ بھی بیان کروں جو میں نے نہیں سنا؟“ [صحيح البخاري/كتاب الأشربة/حدیث: 5595]

حضرت عبداللہ بن ابی اوفی رضی اللہ عنہ سے روایت ہے، انہوں نے بیان کیا کہ نبی صلی اللہ علیہ وسلم نے سبز مٹکوں میں نبیذ بنانے سے منع فرمایا، میں نے عرض کی: ”ہم سفید مٹکوں میں نبیذ بنا کر نوش کر لیا کریں؟“ انہوں نے فرمایا: ”نہیں۔“ [صحيح البخاري/كتاب الأشربة/حدیث: 5596]

حضرت سہل بن سعد رضی اللہ عنہ سے روایت ہے کہ حضرت ابو اسید ساعدی رضی اللہ عنہ نے نبی صلی اللہ علیہ وسلم کو اپنے ولیمے میں شمولیت کی دعوت دی۔ اس دن ان کی بیوی مہمانوں کی خدمت کر رہی تھیں جبکہ وہ خود دلہن تھیں۔ انہوں نے کہا: ”تم جانتے ہو کہ میں نے رسول اللہ صلی اللہ علیہ وسلم کے لیے کس چیز کا شربت تیار کیا تھا؟ میں نے رات ہی کو آپ صلی اللہ علیہ وسلم کے لیے کھجوریں ایک پتھر کے برتن میں بھگو دی تھیں۔“ [صحيح البخاري/كتاب الأشربة/حدیث: 5597]

حضرت ابو جویریہ رحمہ اللہ سے روایت ہے، انہوں نے کہا کہ میں نے حضرت ابن عباس رضی اللہ عنہ سے باذق کے متعلق دریافت کیا تو انہوں نے فرمایا: ”حضرت محمد صلی اللہ علیہ وسلم باذق کے وجود سے پہلے ہی دنیا سے رخصت ہو گئے۔ بہرحال جو بھی چیز نشہ لائے وہ حرام ہے۔“ ابو جویریہ نے کہا: ”باذق تو حلال و طیب ہے۔“ حضرت ابن عباس رضی اللہ عنہ نے فرمایا: ”انگور حلال و طیب تھا، جب اس کی شراب بن گئی تو وہ حرام و خبیث ہے۔“ [صحيح البخاري/كتاب الأشربة/حدیث: 5598]

حضرت عائشہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم حلوا اور شہد پسند کرتے تھے۔“ [صحيح البخاري/كتاب الأشربة/حدیث: 5599]

حضرت انس رضی اللہ عنہ سے روایت ہے، انہوں نے کہا: ”میں حضرت ابو طلحہ، حضرت ابو دجانہ اور سہل بن بیضا رضی اللہ عنہم کو نیم پختہ اور پختہ کھجوروں کا آمیزہ پلا رہا تھا (جو نشہ آور تھا) کہ اچانک حرمت شراب کا حکم آ گیا۔ اس کے بعد میں نے اسے زمین پر پھینک دیا۔ میں ہی انہیں پلا رہا تھا کیونکہ میں ان سب سے کم عمر تھا۔ ہم اس قسم کی نبیذ کو اس وقت شراب ہی کہتے تھے۔“ عمرو بن حارث رحمہ اللہ نے کہا: ”ہمیں قتادہ رحمہ اللہ نے بیان کیا اور انہوں نے حضرت انس رضی اللہ عنہ سے سنا۔“ [صحيح البخاري/كتاب الأشربة/حدیث: 5600]

حضرت جابر رضی اللہ عنہ سے روایت ہے، انہوں نے کہا کہ: ”نبی صلی اللہ علیہ وسلم نے کشمش اور کھجور کو نیز نیم پختہ اور پختہ تازہ کھجور کو ملا کر بھگونے سے منع فرمایا تھا۔“ [صحيح البخاري/كتاب الأشربة/حدیث: 5601]

حضرت ابو قتادہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے اس سے روکا تھا کہ ”پختہ اور نیم پختہ کھجور نیز کھجور اور منقیٰ کو ملا کر نبیذ بنائی جائے“ اور آپ صلی اللہ علیہ وسلم نے ”ہر ایک کو جدا جدا بھگونے“ کا حکم دیا۔ [صحيح البخاري/كتاب الأشربة/حدیث: 5602]