حضرت عبدالرحمن بن ابی بکر رضی اللہ عنہ سے روایت ہے کہ حضرت ابوبکر صدیق رضی اللہ عنہ نے چند لوگوں کو مہمان بنایا اور عبدالرحمن سے کہا: ”ان مہمانوں کا پوری طرح خیال رکھنا کیونکہ میں نبی صلی اللہ علیہ وسلم کی خدمت میں جا رہا ہوں، میرے آنے سے پہلے پہلے انہیں کھانا کھلا دینا۔“ چنانچہ حضرت عبدالرحمن رضی اللہ عنہ گئے اور جو کھانا حاضر تھا وہ مہمانوں کے سامنے پیش کر دیا اور کہا: ”کھانا تناول فرمائیں۔“ مہمانوں نے کہا: ”صاحب خانہ کہاں ہیں؟“ عبدالرحمن رضی اللہ عنہ نے کہا: ”آپ کھانا کھائیں۔“ انہوں نے کہا: ”جب تک صاحب خانہ نہ آ جائیں ہم کھانا نہیں کھائیں گے۔“ حضرت عبدالرحمن رضی اللہ عنہ نے کہا: ”آپ ہماری درخواست قبول کریں کیونکہ حضرت ابوبکر صدیق رضی اللہ عنہ کے واپس آنے تک اگر آپ حضرات کھانے سے فارغ نہ ہوئے تو مجھے ان کی طرف سے خفگی کا سامنا کرنا پڑے گا۔“ انہوں نے کھانے سے انکار ہی کیا۔ میں جانتا تھا کہ حضرت ابوبکر صدیق رضی اللہ عنہ مجھ پر ناراض ہوں گے اس لیے جب وہ تشریف لائے تو میں ایک طرف ہو گیا۔ انہوں نے پوچھا: ”تم لوگوں نے کیا کیا ہے؟“ گھر والوں نے انہیں صورت حال سے آگاہ کیا تو انہوں نے ”عبدالرحمن“ کہہ کر آواز دی۔ میں خاموش رہا۔ پھر انہوں نے فرمایا: ”اے جاہل! میں تمہیں قسم دیتا ہوں کہ اگر تو میری آواز سنتا ہے تو میرے پاس آ جا۔“ چنانچہ میں باہر نکلا اور (مہمانوں نے) کہا: ”عبدالرحمن سچ کہہ رہا ہے، وہ کھانا ہمارے پاس لایا تھا۔“ آخر کار انہوں نے فرمایا: ”تم نے صرف میرے انتظار میں کھانا لیٹ کیا، اللہ کی قسم! میں آج رات کھانا نہیں کھاؤں گا۔“ مہمانوں نے بھی قسم اٹھائی: «وَاللّٰهِ» ”اللہ کی قسم! جب تک آپ نہیں کھائیں گے ہم بھی نہیں کھائیں گے۔“ حضرت ابوبکر صدیق رضی اللہ عنہ نے کہا: ”میں نے آج رات جیسی تکلیف دہ رات نہیں دیکھی، مہمانو! افسوس ہے تم لوگ ہماری میزبانی سے کیوں انکار کرتے ہو؟ اے عبدالرحمن! کھانا لاؤ۔“ چنانچہ وہ کھانا لائے تو آپ نے اس پر ہاتھ رکھ کر کہا: «بِسْمِ اللّٰهِ» ”اللہ کے نام سے (شروع کرتا ہوں)، پہلی حالت شیطان کی طرف سے تھی۔“ پھر انہوں نے کھانا کھایا تو مہمانوں نے بھی (ان کے ساتھ) تناول کیا۔ [صحيح البخاري/كتاب الأدب/حدیث: 6140]

حضرت عبدالرحمن بن ابی بکر رضی اللہ عنہ سے روایت ہے کہ حضرت ابوبکر صدیق رضی اللہ عنہ ایک یا کئی مہمان لے کر گھر آئے، پھر آپ شام ہی سے نبی صلی اللہ علیہ وسلم کی خدمت میں چلے گئے۔ جب وہ لوٹ کر آئے تو ان سے میری والدہ نے کہا: ”آج مہمانوں کو چھوڑ کر آپ کہاں رہ گئے تھے؟“ حضرت ابوبکر صدیق رضی اللہ عنہ نے پوچھا: ”کیا تم نے انہیں کھانا نہیں کھلایا؟“ انہوں نے کہا: ”ہم نے کھانا پیش کیا تھا“ لیکن انہوں نے کھانے سے انکار کر دیا۔ حضرت ابوبکر صدیق رضی اللہ عنہ کو یہ سن کر بہت غصہ آیا اور اہل خانہ کو برا بھلا کہا، پھر قسم اٹھائی کہ وہ کھانا نہیں کھائیں گے۔ عبدالرحمن رضی اللہ عنہ کہتے ہیں کہ میں تو (مارے ڈر کے) چھپ گیا۔ حضرت ابوبکر صدیق رضی اللہ عنہ نے آواز دی: ”اے جاہل! (تو کدھر ہے؟)“ میری والدہ نے بھی قسم اٹھالی کہ ”اگر آپ کھانا نہیں کھائیں گے تو وہ بھی نہیں کھائے گی۔“ ادھر مہمانوں نے بھی قسم اٹھالی کہ ”جب تک حضرت ابوبکر صدیق رضی اللہ عنہ کھانا نہیں کھائیں گے وہ (مہمان) بھی نہیں کھائیں گے۔“ آخر ابوبکر رضی اللہ عنہ نے فرمایا: ”یہ غصہ اور برہمی شیطان کی طرف سے تھی۔“ پھر آپ نے کھانا منگوایا، خود بھی کھایا اور مہمانوں کو بھی کھلایا۔ اس دوران میں جب وہ لقمہ اٹھاتے تو نیچے سے کھانا اور بڑھ جاتا۔ حضرت ابوبکر رضی اللہ عنہ نے یہ منظر دیکھ کر کہا: ”اے قبیلہ بنو فراس کی بہن! یہ کیا ہو رہا ہے؟“ انہوں نے کہا: ”میری آنکھوں کی ٹھنڈک! بلاشبہ اب تو یہ اس سے بھی زیادہ ہو چکا ہے جتنا یہ ہمارے کھانے سے پہلے تھا،“ پھر ان سب نے کھایا اور بچا ہوا کھانا نبی صلی اللہ علیہ وسلم کی خدمت میں بھیج دیا۔ انہوں نے ذکر کیا کہ آپ صلی اللہ علیہ وسلم نے بھی اس کھانے میں سے کھایا۔ [صحيح البخاري/كتاب الأدب/حدیث: 6141]

حضرت رافع بن خدیج اور حضرت سہل بن ابی حثمہ رضی اللہ عنہما سے روایت ہے، ان دونوں نے کہا کہ عبداللہ بن سہل رضی اللہ عنہ اور محیصہ بن مسعود رضی اللہ عنہ خیبر میں آئے اور کھجوروں کے باغ میں جدا جدا ہو گئے۔ وہاں حضرت عبداللہ بن سہل رضی اللہ عنہ کو قتل کر دیا گیا۔ پھر عبدالرحمن بن سہل رضی اللہ عنہ اور مسعود کے دونوں بیٹے حویصہ اور محیصہ رضی اللہ عنہم نبی صلی اللہ علیہ وسلم کی خدمت میں حاضر ہوئے اور اپنے ساتھی کے متعلق گفتگو کرنے لگے۔ عبدالرحمن رضی اللہ عنہ نے پہلے بات کرنا چاہی اور وہ سب سے چھوٹے تھے۔ نبی صلی اللہ علیہ وسلم نے فرمایا: ”بڑے کو بات کرنے دو۔“ مقصد یہ ہے کہ جو بڑا ہے وہ بات کرے۔ پھر انہوں نے اپنے ساتھی کے قتل کے متعلق بات کی تو نبی صلی اللہ علیہ وسلم نے فرمایا: ”اگر تم میں سے پچاس آدمی قسم اٹھا لیں تو تم دیت کے مستحق ہو سکتے ہو؟“ انہوں نے کہا: ”اے اللہ کے رسول! ہم نے خود تو اس معاملے کو نہیں دیکھا۔“ آپ صلی اللہ علیہ وسلم نے فرمایا: ”تو یہودی اپنے پچاس آدمیوں کی قسموں کے ذریعے تم سے بری ہو جائیں گے۔“ انہوں نے کہا: ”اللہ کے رسول! وہ کافر لوگ ہیں۔“ چنانچہ آپ صلی اللہ علیہ وسلم نے اپنی طرف سے دیت ادا کر دی۔ حضرت سہل رضی اللہ عنہ کہتے ہیں کہ میں نے ان اونٹوں میں سے ایک اونٹنی کو پکڑا جو باڑے میں گھس گئی تھی تو اس نے مجھے لات ماری تھی۔ لیث نے کہا: مجھے یحییٰ نے بشیر سے بیان کیا، اور ان سے سہل نے بیان کیا۔ یحییٰ نے کہا: میرا خیال ہے کہ بشیر نے «مَعَ رَافِعِ بْنِ خَدِیجٍ» ”رافع بن خدیج کے ساتھ“ کے الفاظ کہے تھے۔ ابن عیینہ نے کہا: ہم سے یحییٰ نے بیان کیا بشیر سے، انہوں نے صرف حضرت سہل رضی اللہ عنہ سے روایت کیا ہے۔ [صحيح البخاري/كتاب الأدب/حدیث: 6142]

حضرت رافع بن خدیج رضی اللہ عنہ اور حضرت سہل بن ابی حشمہ رضی اللہ عنہ سے روایت ہے، ان دونوں نے کہا کہ حضرت عبداللہ بن سہل رضی اللہ عنہ اور حضرت محیصہ بن مسعود رضی اللہ عنہ خیبر میں آئے اور کھجوروں کے باغ میں جدا جدا ہو گئے۔ وہاں حضرت عبداللہ بن سہل رضی اللہ عنہ کو قتل کر دیا گیا۔ پھر حضرت عبدالرحمن بن سہل رضی اللہ عنہ اور مسعود کے دونوں بیٹے حویصہ اور محیصہ رضی اللہ عنہم نبی صلی اللہ علیہ وسلم کی خدمت میں حاضر ہوئے اور اپنے ساتھی کے متعلق گفتگو کرنے لگے۔ حضرت عبدالرحمن رضی اللہ عنہ نے پہلے بات کرنا چاہی اور وہ سب سے چھوٹے تھے۔ نبی صلی اللہ علیہ وسلم نے فرمایا: ”بڑے کو بات کرنے دو۔“ (مقصد یہ ہے کہ جو بڑا ہے وہ بات کرے)۔ پھر انہوں نے اپنے ساتھی کے قتل کے متعلق بات کی تو نبی صلی اللہ علیہ وسلم نے فرمایا: ”اگر تم میں سے پچاس آدمی قسم اٹھا لیں تو تم دیت کے مستحق ہو سکتے ہو؟“ انہوں نے کہا: ”اے اللہ کے رسول! ہم نے خود تو اس معاملے کو نہیں دیکھا۔“ آپ صلی اللہ علیہ وسلم نے فرمایا: ”تو یہودی اپنے پچاس آدمیوں کی قسموں کے ذریعے تم سے بری ہو جائیں گے۔“ انہوں نے کہا: ”اللہ کے رسول! وہ کافر لوگ ہیں۔“ چنانچہ آپ صلی اللہ علیہ وسلم نے اپنی طرف سے دیت ادا کر دی۔ حضرت سہل رضی اللہ عنہ کہتے ہیں کہ میں نے ان اونٹوں میں سے ایک اونٹنی کو پکڑا جو باڑے میں گھس گئی تھی تو اس نے مجھے لات ماری تھی۔ لیث نے کہا: مجھے یحیٰی نے بشیر سے بیان کیا، اور ان سے حضرت سہل رضی اللہ عنہ نے بیان کیا۔ یحیٰی نے کہا: میرا خیال ہے کہ بشیر نے «مَعَ رَافِعِ بْنِ خَدِيجٍ» ”رافع بن خدیج کے ساتھ“ کے الفاظ کہے تھے۔ ابن عیینہ نے کہا: ہم سے یحییٰ نے بیان کیا بشیر سے، انہوں نے صرف حضرت سہل رضی اللہ عنہ سے روایت کیا ہے۔ [صحيح البخاري/كتاب الأدب/حدیث: 6143]

حضرت ابن عمر رضی اللہ عنہما سے روایت ہے انہوں نے کہا کہ رسول اللہ صلی اللہ علیہ وسلم نے فرمایا: ”مجھے اس درخت کا نام بتاؤ جس کی مثال مسلمان جیسی ہے۔ وہ ہمیشہ اپنے رب کے حکم سے پھل دیتا ہے اور اس کے پتے نہیں گرتے۔“ میرے دل میں خیال آیا کہ وہ کھجور کا درخت ہے لیکن میں نے اس کا جواب دینا مناسب خیال نہ کیا کیونکہ مجلس میں حضرت ابوبکر صدیق رضی اللہ عنہ اور حضرت عمر بن خطاب رضی اللہ عنہ (جیسے اکابر صحابہ) موجود تھے۔ پھر جب ان دونوں بزرگوں نے کچھ نہ کہا تو نبی صلی اللہ علیہ وسلم نے فرمایا: ”وہ کھجور کا درخت ہے۔“ چنانچہ جب میں اپنے والد کے ہمراہ وہاں سے باہر نکلا تو میں نے کہا: ”اے ابو جان! میرے دل میں آیا تھا کہ وہ کھجور کا درخت ہے“، انہوں نے فرمایا: ”پھر تمہیں جواب دینے سے کس چیز نے منع کیا تھا؟ اگر تم کہہ دیتے تو مجھے اتنا مال ملنے سے بھی زیادہ خوشی ہوتی۔“ حضرت ابن عمر رضی اللہ عنہما نے کہا: ”مجھے صرف اس امر نے منع کیا کہ آپ اور حضرت ابوبکر صدیق رضی اللہ عنہ خاموش ہیں تو میں نے آپ (بزرگوں) کے سامنے بات کرنا برا خیال کیا۔“ [صحيح البخاري/كتاب الأدب/حدیث: 6144]

حضرت ابی بن کعب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: «إِنَّ مِنَ الشِّعْرِ لَحِكْمَةً» ”کچھ اشعار بہت حکمت بھرے ہوتے ہیں۔“ [صحيح البخاري/كتاب الأدب/حدیث: 6145]

حضرت اسود بن قیس رحمہ اللہ سے روایت ہے کہ میں نے حضرت جندب رضی اللہ عنہ کو یہ کہتے ہوئے سنا: ”ایک مرتبہ نبی صلی اللہ علیہ وسلم چل رہے تھے کہ اچانک آپ کو پتھر سے ٹھوکر لگی، آپ گر پڑے اور آپ کی انگلی سے خون بہنے لگا تو آپ صلی اللہ علیہ وسلم نے فرمایا: «هَلْ أَنْتِ إِلَّا إِصْبَعٌ دَمِيتِ، وَفِي سَبِيلِ اللهِ مَا لَقِيتِ» ”تو تو اک انگلی ہے اور کیا ہے جو زخمی ہو گئی، کیا ہوا اگر راہِ مولیٰ میں تو زخمی ہو گئی۔““ [صحيح البخاري/كتاب الأدب/حدیث: 6146]

حضرت ابوہریرہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”شاعر نے جو سچی بات کہی ہے وہ لبید کا یہ قول ہے: «أَلَا كُلُّ شَيْءٍ مَا خَلَا اللَّهَ بَاطِلٌ» ”آگاہ رہو! اللہ کے سوا ہر چیز باطل (فنا ہونے والی) ہے“ اور قریب تھا کہ امیہ بن ابی صلت مسلمان ہو جاتا۔“ [صحيح البخاري/كتاب الأدب/حدیث: 6147]