سیدنا ابن عمر رضی اللہ عنہما کہتے ہیں: رسول اللہ صلی اللہ علیہ وسلم نے اس عورت کے متعلق جس کا خاوند ہو اور اس کا مال بھی، مگر اس کا خاوند اس کو حج کی اجازت نہ دے، فرمایا: ”اس عورت کو اپنے خاوند کی اجازت کے بغیر حج کے لیے نہیں جانا چاہیے۔“ [معجم صغير للطبراني/كتاب الحج و العمرة/حدیث: 444]

سیدنا ابن عباس رضی اللہ عنہما کہتے ہیں: رسول اللہ صلی اللہ علیہ وسلم نے مروہ کے متعلق فرمایا: ”یہ قربانی کرنے کی جگہ ہے اور مکہ کے تمام راستے اور گلیاں قربانی ذبح کرنے کی جگہ ہیں۔“ [معجم صغير للطبراني/كتاب الحج و العمرة/حدیث: 445]

سیدنا یزید بن الاسود رضی اللہ عنہ کہتے ہیں: میں نے رسول اللہ صلی اللہ علیہ وسلم کے ساتھ حج کیا تو صبح کی نماز منیٰ میں ادا کی، جب نماز سے فارغ ہوئے تو دیکھا کہ دو آدمی پیچھے بیٹھے تھے، انہوں نے جماعت سے نماز نہیں پڑھی تھی، تو آپ صلی اللہ علیہ وسلم نے فرمایا: ”ان کو میرے پاس لاؤ۔“ جب انہیں لایا گیا تو ان کی بغل کے گوشت کانپ رہے تھے، آپ صلی اللہ علیہ وسلم نے پوچھا: ”کیا تم نے ہمارے ساتھ نماز نہیں پڑھی؟“ وہ کہنے لگے: یا رسول اللہ! ہم نے گھر میں نماز پڑھ لی تھی کیونکہ ہم نے خیال کیا کہ شاید ہم نماز کو نہ پا سکیں گے۔ آپ صلی اللہ علیہ وسلم نے فرمایا: ”آئندہ ایسے نہ کرنا، جب گھر میں پڑھ لو پھر جماعت سے نماز پا لو تو پڑھ لیا کرو، وہ تمہارے لیے نفل ہو جائے گی۔“ ایک نے کہا: یا رسول اللہ! ہمارے لیے استغفار کریں، تو آپ صلی اللہ علیہ وسلم نے ان کے لیے مغفرت کی دعا فرمائی، لوگ آپ صلی اللہ علیہ وسلم کے پاس بھیڑ کی طرح اکٹھے ہو گئے، میں اس وقت نوجوان آدمی اور طاقتور تھا، تو بھیڑ سے گزر کر آپ صلی اللہ علیہ وسلم کے پاس چلا گیا اور آپ صلی اللہ علیہ وسلم کا ہاتھ پکڑ کر سینے پر رکھ لیا، تو میں نے آپ صلی اللہ علیہ وسلم جیسا عمدہ اور ٹھنڈا ہاتھ کبھی نہیں دیکھا۔ [معجم صغير للطبراني/كتاب الحج و العمرة/حدیث: 446]

سیدنا عبداللہ بن عمر رضی اللہ عنہما کہتے ہیں: رسول اللہ صلی اللہ علیہ وسلم تشریف لائے تو بیت اللہ کا طواف کیا، مقام ابراہیم کے پیچھے نماز پڑھی، اور صفا و مروہ کے درمیان سعی کی، اور تمہارے لیے رسول اللہ صلی اللہ علیہ وسلم کی زندگی بہترین نمونہ ہے۔ [معجم صغير للطبراني/كتاب الحج و العمرة/حدیث: 447]

سیدنا ابن عباس رضی اللہ عنہما کہتے ہیں: نبی صلی اللہ علیہ وسلم نے ایک آدمی کو یوں کہتے ہوئے سنا: ” ﴿لَبَّيْكَ عَنْ شُبْرُمَةَ﴾ “ میں شبرمہ کی طرف سے حاضر ہوں، تو آپ صلی اللہ علیہ وسلم نے پوچھا: ”کیا تو نے اپنا حج کر لیا ہے؟“ اس نے کہا: نہیں! آپ صلی اللہ علیہ وسلم نے فرمایا: ”پہلے اپنی طرف سے حج کر پھر شبرمہ کی طرف سے حج کرنا۔“ [معجم صغير للطبراني/كتاب الحج و العمرة/حدیث: 448]

سیدنا فضل بن عباس رضی اللہ عنہما سے روایت ہے، رسول اللہ صلی اللہ علیہ وسلم جمرہ عقبہ کو رمی کرنے تک لبیک کہتے رہے۔ [معجم صغير للطبراني/كتاب الحج و العمرة/حدیث: 449]

سیدنا عبدالرحمٰن بن عوف رضی اللہ عنہ کہتے ہیں: جب ہم بیت اللہ شریف کے طواف سے فارغ ہوئے تو نبی صلی اللہ علیہ وسلم نے مجھ سے فرمایا: ”اے ابومحمد! رکن کو بوسہ دینے میں تو نے کیا کیا؟“ میں نے عرض کیا: میں نے بوسہ دیا اور چھوڑ دیا، آپ صلی اللہ علیہ وسلم نے فرمایا: ”تو نے اچھا کیا۔“ [معجم صغير للطبراني/كتاب الحج و العمرة/حدیث: 450]

ہشام بن عروہ اپنے باپ سے روایت کرتے ہیں: میں نے سیدنا اسامہ بن زید رضی اللہ عنہ سے پوچھا: نبی صلی اللہ علیہ وسلم عرفات سے واپس آئے تو کس طرح چلے؟ انہوں نے کہا: آپ عنق چال چلتے، جب بھی کھلی جگہ ملتی تو تیز ہو جاتے۔ [معجم صغير للطبراني/كتاب الحج و العمرة/حدیث: 451]

سیدنا ابوجحیفہ رضی اللہ عنہ کہتے ہیں: ہم نے رسول اللہ صلی اللہ علیہ وسلم کے ساتھ حجة الوداع میں حج کیا، تو ہم مسلسل دو دو رکعت ہی بطور قصر پڑھتے رہے یہاں تک کہ ہم واپس آگئے۔ [معجم صغير للطبراني/كتاب الحج و العمرة/حدیث: 452]

سیدنا ابن عباس رضی اللہ عنہما کہتے ہیں: ایک آدمی نبی صلی اللہ علیہ وسلم کے پاس آیا تو کہنے لگا: میرا باپ بوڑھا ہے، حج نہیں کر سکتا، کیا میں اس کی طرف سے حج کر سکتا ہوں؟ آپ صلی اللہ علیہ وسلم نے فرمایا: ”ہاں! اپنے باپ کی طرف سے حج کرو۔“ [معجم صغير للطبراني/كتاب الحج و العمرة/حدیث: 453]