ابوعمرو شیبانی سے روایت ہے وہ کہتے ہیں کہ ہمیں اس گھر کے مالک نے حدیث بیان کی اور اپنے ہاتھ کے ساتھ سیدنا عبداللہ (بن مسعود) رضی اللہ عنہ کے گھر کی طرف اشارہ کیا کہ انہوں نے کہا کہ میں نے نبی صلی اللہ علیہ وسلم سے سوال کیا کہ اللہ عزوجل کے نزدیک کون سا عمل سب سے زیادہ محبوب ہے؟ فرمایا: ”نماز کو اس کے اول وقت پر ادا کرنا“، میں نے کہا: پھر کون سا؟ فرمایا: ”پھر والدین کے ساتھ حسن سلوک سے پیش آنا۔“ میں نے کہا: پھر کون سا؟ فرمایا: ”پھر اللہ کی راہ میں جہاد کرنا۔“ (ابن مسعود) نے کہا: آپ صلی اللہ علیہ وسلم نے مجھے یہ اعمال بتائے اور اگر میں زیادہ طلب کرتا تو آپ صلی اللہ علیہ وسلم مجھے زیادہ بتاتے۔ [صحيح الادب المفرد/حدیث: 1]

سیدنا عبداﷲ بن عمر رضی اللہ عنہما سے روایت ہے انہوں نے کہا: رب کی خوشنودی باپ کی خوشنودی میں اور رب کی ناراضگی باپ کی ناراضگی میں ہے۔ [صحيح الادب المفرد/حدیث: 2]

بہز بن حکیم سے مروی ہے وہ اپنے باپ سے اور وہ اپنے دادا سے روایت کرتے ہیں، میں نے عرض کیا، یا رسول اﷲ! میں کس کے ساتھ حسن سلوک سے پیش آؤں؟ فرمایا: ”اپنی ماں کے ساتھ“، میں نے کہا: اس کے بعد کس کے ساتھ حسن سلوک کروں؟ فرمایا: ”اپنی ماں کے ساتھ“، میں نے کہا: اس کے بعد کس کے ساتھ حسن سلوک کروں؟ فرمایا: ”اپنی ماں کے ساتھ“، میں نے کہا: اس کے بعد کس کے ساتھ نیک سلوک کروں؟ فرمایا: ”اپنے باپ کے ساتھ پھر اس کے بعد جو زیادہ قریبی ہو، پھر اس کے بعد جو زیادہ قریبی ہو۔“ [صحيح الادب المفرد/حدیث: 3]

سیدنا عبداﷲ بن عباس رضی اللہ عنہما سے مروی ہے کہ ایک شخص ان کے پاس آیا اور اس نے کہا: میں نے ایک عورت کو نکاح کا پیغام دیا، اس نے مجھ سے شادی سے انکار کر دیا اور ایک دوسرے آدمی نے نکاح کا پیغام دیا عورت نے اس سے نکاح کرنا پسند کر لیا۔ مجھے بڑی غیرت آئی اور میں نے اس عورت کو قتل کر دیا۔ کیا میرے لیے کوئی توبہ ہے؟ پوچھا: کیا تیری ماں زندہ ہے؟ اس شخص نے کہا: نہیں، فرمایا: اللہ کی بارگاہ میں توبہ کرو اور جتنی تم طاقت رکھو اس کا قرب حاصل کرو، عطاء بن یسار کہتے ہیں: میں گیا اور سیدنا عبداﷲ بن عباس رضی اللہ عنہما سے پوچھا: آپ نے اس سے یہ کیوں پوچھا تھا کہ اس کی ماں زندہ ہے؟ تو انہوں نے کہا: میں نہیں جانتا کہ ماں کے ساتھ نیک سلوک سے زیادہ اللہ کے قریب کوئی دوسرا عمل ہو سکتا ہے۔ [صحيح الادب المفرد/حدیث: 4]

سیدنا ابوہریرہ رضی اللہ عنہ سے روایت ہے انہوں نے کہا کہ رسول اﷲ صلی اللہ علیہ وسلم سے پوچھا گیا: کس کے ساتھ نیک سلوک کروں؟ فرمایا: ”اپنی ماں کے ساتھ“، پوچھا: پھر کس کے ساتھ؟ فرمایا: ”اپنی ماں کے ساتھ“، پوچھا گیا: پھر کس کے ساتھ؟ فرمایا: ”اپنی ماں کے ساتھ“، پوچھا گیا: پھر کس کے ساتھ؟ (پھر آپ چوتھی مرتبہ لوٹے اور) فرمایا: ”اپنے باپ کے ساتھ۔“ [صحيح الادب المفرد/حدیث: 5]

طیسلہ بن میاس سے روایت ہے وہ کہتے ہیں: میں نجدہ بن عامر خارجی کے پیروکار کے ساتھ تھا، (یہ خارجیوں کی ایک جماعت ہے) میں نے ایسے گناہوں کا ارتکاب کیا جن کو میں کبائر ہی خیال کرتا ہوں، تو میں نے اس کا تذکرہ سیدنا ابن عمر رضی اللہ عنہما سے کیا تو انہوں نے پوچھا: وہ کون کون سے گناہ ہیں؟ میں نے کہا: ایسے ایسے، انہوں نے کہا: یہ کبائر نہیں ہیں۔ وہ تو نو ہیں: اللہ کے ساتھ شریک کرنا، کسی جان کو قتل کرنا، جنگ سے فرار ہونا، پاکدامن عورت پر بدکاری کی تہمت لگانا، سود کھانا، یتیم کا مال کھانا، مسجد میں کفر (بےدینی) کا ارتکاب کرنا، وہ آدمی جو (دین کا) مذاق اڑاتا ہے، والدین کا (بیٹے کی) نافرمانی کی وجہ سے رونا۔ سیدنا ابن عمر رضی اللہ عنہما نے مجھ سے کہا: کیا تم جہنم سے ڈرتے ہو اور چاہتے ہو جنت میں داخل ہو جاؤ؟ میں نے کہا: ہاں اللہ کی قسم۔ پوچھا: کیا تمہارے والدین زندہ ہیں؟ میں نے کہا: میرے پاس میری والدہ ہیں۔ انہوں نے کہا: اللہ کی قسم! اگر تو اس کے ساتھ نرمی کے ساتھ بولے: اور اس کو کھانا کھلائے تو تم جنت میں داخل ہو جاؤ گے جب تک کبیرہ گناہوں سے بچو گے۔ [صحيح الادب المفرد/حدیث: 6]

عروہ سے مروی ہے، انہوں نے فرمایا: ‏ «‏وَاخْفِضْ لَهُمَا جَنَاحَ الذُّلِّ مِنَ الرَّحْمَةِ‏» ”رحمت سے اپنے عاجزی کے بازو ان کے سامنے جھکا دو۔“ اور کہا: ایسی چیز سے انکار نہ کرنا جس کو تیرے والدین پسند کریں۔ [صحيح الادب المفرد/حدیث: 7]

سیدنا ابوہریرہ رضی اﷲعنہ سے مروی ہے، انہوں نے نبی صلی اللہ علیہ وسلم سے روایت کی ہے کہ آپ صلی اللہ علیہ وسلم نے فرمایا: ”کوئی بچہ اپنے والد کو بدلہ نہیں دے سکتا مگر یہ کہ اس کو غلام پائے تو وہ اس کو خرید لے اور اس کو آزاد کر دے۔“ [صحيح الادب المفرد/حدیث: 8]

ابوبردہ سے مروی ہے کہ وہ سیدنا ابن عمر رضی اللہ عنہما کے پاس موجود تھے اور ایک یمنی آدمی بیت اللہ کا طواف کر رہا تھا اس نے اپنی ماں کو اپنی پشت کے پیچھے اٹھایا ہوا تھا، (اور) یہ کہہ رہا تھا: میں اس کا مطیع اونٹ ہوں اگر اس کی سواریاں خوفزدہ کر دی جائیں تو میں خوفزدہ نہیں کیا جاؤں گا۔ پھر اس آدمی نے کہا: اے ابن عمر! کیا تمہارا خیال ہے کہ میں نے اپنی ماں کا بدلہ چکا دیا ہے؟ کہا: نہیں، اس کی ایک آہ کا بدلہ بھی نہ چکایا۔ پھر سیدنا ابن عمر رضی اللہ عنہما نے طواف کیا، تو وہ مقام ابرہیم کے پاس آئے دو رکعتیں پڑھیں پھر کہا: اے ابوموسیٰ کے بیٹے! ہر دو رکعتیں ان گناہوں کو ساکت کر دیتی ہیں جو پہلے کیے گئے۔ [صحيح الادب المفرد/حدیث: 9]

سیدنا عبداللہ بن عمرو رضی اللہ عنہ سے مروی ہے کہ ایک شخص نبی صلی اللہ علیہ وسلم کی خدمت میں آیا وہ آپ کے ہاتھ پر ہجرت کے لیے بیعت کر رہا تھا اور اس نے اپنے والدین کو اس حال میں چھوڑ دیا کہ وہ رو رہے تھے۔ فرمایا: ”ان کے پاس واپس جاؤ، اب انہیں ہنساؤ جیسے تم نے انہیں رلایا ہے۔“ [صحيح الادب المفرد/حدیث: 10]