حدیث حاشیہ:
اگلی حدیث اوراس حدیث سے امام بخاری یہ نکالا کہ ہمارے منہ سے جو قرآن کے الفاظ نکلتے ہیں وہ الفاظ قرآن غیر مخلوق ہیں مگرہمارا فعل مخلوق ہے۔
امام بخاری نےفرمایا کہ جومجھ سے یوں نقل کرتا ہے کہ لفظي بالقرآن مخلوق وہ جھوٹا ہے میں نے یہ نہیں کہا بلکہ صرف یہ کہا تھا کہ ہمارے افعال مخلوق ہیں اور بس۔
قرآن مجید اس کا کلام غیرمخلوق ہے یہی سلف صالحین اہل حدیث کاعقیدہ ہے اور یہی امام بخاری کا۔

حدیث حاشیہ:
1۔
مذکورہ احادیث مختلف الفاظ سے بیان ہوئی ہے۔
روایت کے آخر میں باآواز بلند تلاوت کرنے کا اضافہ راوی حدیث محمد بن ابراہیم التیمی کا بیان کردہ ہے۔
(فتح الباري: 625/13)
حدیث میں بیان کی گئی وعید کا مطلب یہ نہیں کہ ایسا انسان دین سے خارج ہے بلکہ قرآن مجید کو خوبصورت آواز سے نہ پڑھنے والارسول اللہ صلی اللہ علیہ وسلم کے طریقے پر نہیں ہے کیونکہ رسول اللہ صلی اللہ علیہ وسلم خوش الحانی اور باآواز بلند قرآن کی تلاوت کیاکرتے تھے۔
2۔
امام بخاری رحمۃ اللہ علیہ نے اس حدیث سے ثابت کیا ہے کہ ہمارے منہ سے جو قرآن کے الفاظ نکلتے ہیں وہ غیر مخلوق مگر ہماری زبان کا حرکت کرنا اور ان الفاظ کا ادا کرنا ہمارا فعل ہے اور یہ فعل مخلوق ہے۔
گویا امام بخاری رحمۃ اللہ علیہ نے تلاوت اور متلو میں فرق کو واضح کیا ہے کہ قرآنی الفاظ کو خوبصورت انداز سے پڑھنا اورباآواز بلند ادا کرنا یہ ہمارا فعل ہے جو اللہ تعالیٰ کا پیدا کیا ہوا ہے، ہم اس کے خالق نہیں ہیں۔