1045۔ اردو حاشیہ:
➊ اسلام میں احکام کا نسخ ثابت ہے اور جب تک اس کا علم نہ ہو جائے کوئی اس کا مکلف نہیں ہوا کرتا۔
➋ کسی قابل اعتماد فرد واحد کی خبر بھی قابل قبول ہوتی ہے، جسے اصطلاحاً خبر واحد کہتے ہیں۔
➌ لاعلمی میں اگر قبلہ کی طرف نماز پڑھ لی گئی ہو تو وہ صحیح ہے۔
➍ ضرورت کے پیش نظر نمازی کو حالت نماز میں وہ شخص تعلیم دے سکتا ہے، جو نماز نہ پڑھ رہا ہو۔
➎ ایسی تعلیم سے نمازی کی نماز خراب نہیں ہوتی۔ «والله اعلم»

حدیث حاشیہ:
فوائد ومسائل:
نبی اکرم صلی اللہ علیہ وسلم ہجرت سے پہلے مکہ مکرمہ میں نماز اس طرح پڑھا کرتے تھے کہ آپ صلی اللہ علیہ وسلم کا رخ بیت اللہ اور بیت المقدس دونوں کی طرف ہوتا تھا ہجرت کے بعد یہ صورت ممکن نہ رہی کیونکہ مدینہ منورہ سے بیت المقدس شمال کی طرف ہے اور مکہ مکرمہ جنوب کی طرف اس لیے اگر بیت المقدس کی طرف رخ کریں تو بیت اللہ کی طرف پشت ہو گی یہود کو مانوس اور قریب کرنے کے لیے رخ بیت المقدس کی طرف رکھا گیا لیکن انھوں نے اس کو قریب آنے کے بجائے الٹا مخالفت کا ذریعہ بنا لیا کہ محمد صلی اللہ علیہ وسلم ہماری مخالفت کرتا ہے لیکن نماز میں رخ ہمارے قبلہ کی طرف کرتا ہے اور مشرکین مکہ بھی اعتراض کرتے تھے کہ محمد صلی اللہ علیہ وسلم ملت ابراہیمی کا دعویدار ہے لیکن نماز میں رخ ان کے تعمیر کردہ گھر اور قبلہ کی طرف نہیں کرتا اس لیے آپ صلی اللہ علیہ وسلم کی دلی آرزو اور خواہش یہی تھی کہ آپ صلی اللہ علیہ وسلم بیت اللہ کی طرف رخ کر کے نماز پڑھیں ہجرت کے سولہ یا سترہ ماہ بعد 15 رجب 2 ہجری کو آپ صلی اللہ علیہ وسلم کو بیت اللہ کی طرف رخ کرنے کا حکم دیا گیا ربیع الاول اور رجب 2 ہجری کو ایک شمار کر لیں تو مدت سولہ ماہ ہو گی مگر الگ الگ شمار کر لیں تو مدت سترہ ماہ ہو گی (2)
آپ صلی اللہ علیہ وسلم بشربن براء بن معرور رضی اللہ تعالیٰ عنہ کی وفات کے موقع پر ان کی والدہ کے پاس تعزیت کے لیے تشریف لائے تھے ان کا گھر بنو سلمہ میں تھا ظہر کا وقت وہیں ہو گیا تو آپ صلی اللہ علیہ وسلم نے بنو سلمہ کی مسجد میں ظہر کی نماز ادا کی جب آپ صلی اللہ علیہ وسلم دو رکعتیں ادا کر چکے تو قبلہ نماز ہی میں تبدیل ہو گیا اور آپ صلی اللہ علیہ وسلم آگے سے صفوں کے پیچھے آ گئے اور نماز مکمل کی اس لیے بنو سلمہ کی مسجد کو مسجد (ذِی الْقِبْلَتَیْنِ)
کا نام دیا جاتا ہے کیونکہ اس میں ایک ہی نماز دو قبلوں کی طرف رخ کر کے پڑھی گئی ہے اور سب سے پہلے مکمل نماز بیت اللہ کی طرف رخ کر کے مسجد نبوی میں عصر کی نماز پڑھی گئی۔
(3)
حضرت عباد بن بشر رضی اللہ تعالیٰ عنہ عصر کی نماز آپ صلی اللہ علیہ وسلم کے ساتھ بیت اللہ کی طرف رخ کر کے پڑھ کر گئے تو راستہ میں بنو حارثہ کی مسجد سے گزرے وہ بیت المقدس کی طرف رخ کر کے نماز پڑھ رہے تھے حضرت عباد رضی اللہ تعالیٰ عنہ کے بتانے پر وہ نماز ہی میں بیت اللہ کی طرف پھر گئے اور حضرت عباد رضی اللہ تعالیٰ عنہ یا کوئی اور صحابی قباء میں عمرو بن عوف کی مسجد میں صبح کی نماز میں ایک رکعت ہو جانے کے بعد پہنچے اور ان کو قبلہ کی تبدیلی سے آگاہ کیا تو انھوں نے بھی نماز ہی میں اپنا رخ تبدیل کر لیا۔
(4)
جب تک انسان کو کسی شرعی حکم کا علم نہ ہو وہ اس کا مکلف نہیں ہو گا اہل قباء کو قبلہ کی تبدیلی کا علم صبح کی نماز میں ہوا اس لیے عصر،
مغرب اور عشاء کی نماز انھوں نے بیت المقدس کی طرف رخ کر کے پڑھی اور آپ صلی اللہ علیہ وسلم نے ان کو کچھ نہیں کہا۔
(5)
ایک آدمی اگر قابل اعتماد ہو تو اس کی بات پر عمل کیا جائے گا بنو حارثہ اور بنو عمرو بن عوف نے صرف ایک آدمی کی خبر پر قطعی اور یقینی قبلہ کی طرف سے رخ دوسرے قبلہ کی طرف کر لیا،
کیونکہ قبلہ کی تبدیلی کی آپ صلی اللہ علیہ وسلم کی خواہش سے وہ آگاہ تھے اس لیے اس قرینہ کی بنا پر ایک آدمی کی خبر نے یقین کا فائدہ دیا۔