ابن تعلی (عبید ابن تعلی) کی روایت ہے کہ ہم نے عبدالرحمٰن بن خالد بن ولید کی معیت میں جہاد کیا۔ ان کے سامنے دشمن کافر کے چار افراد لائے گئے جو عجمی تھے اور بڑے طاقتور تھے۔ پس انہوں نے حکم دیا اور انہیں بندھے بندھے قتل کر دیا گیا۔ امام ابوداؤد رحمہ اللہ فرماتے ہیں کہ اس حدیث میں ابن وہب کے شاگرد سعید کے علاوہ دوسروں نے ہمیں یوں بیان کیا کہ ”ان کو تیر سے مارا گیا جبکہ وہ بندھے ہوئے تھے۔“ سیدنا ابو ایوب انصاری رضی اللہ عنہ کو یہ خبر پہنچی تو انہوں نے کہا: ”میں نے رسول اللہ صلی اللہ علیہ وسلم کو سنا ہے، آپ صلی اللہ علیہ وسلم اس طرح قتل کرنے سے منع فرماتے تھے۔“ (ابو ایوب رضی اللہ عنہ نے کہا:) ”قسم اس ذات کی جس کے ہاتھ میں میری جان ہے! اگر ایک مرغی بھی ہو تو اس کو باندھ کر نہ ماروں۔“ جناب عبدالرحمٰن بن خالد کو یہ خبر پہنچی تو انہوں نے چار گردنیں آزاد کیں۔ [سنن ابي داود/كتاب الجهاد /حدیث: 2687]