سیدنا ابورزین (لقیط بن عامر) رضی اللہ عنہ نے بیان کیا کہ میں نے کہا: ”اے اللہ کے رسول! کیا ہم سب اپنے رب کو دیکھیں گے؟“ عبیداللہ بن معاذ کے الفاظ ہیں: ”کیا ہم سب قیامت کے روز اسے الگ الگ دیکھیں گے، تو مخلوق میں اس کی کیا علامت ہے؟“ آپ صلی اللہ علیہ وسلم نے فرمایا: ”اے ابورزین! کیا تم میں سے ہر کوئی چاند کو نہیں دیکھتا ہے؟“ ابن معاذ کے الفاظ ہیں: ”کیا چودھویں کی رات کو ہر کوئی اسے اکیلے اکیلے نہیں دیکھتا ہے؟“ پھر دونوں راویوں کا اتفاق ہے، میں نے کہا: ”کیوں نہیں (اس کو دیکھنے میں دقت یا ازدحام نہیں ہوتا)۔“ آپ صلی اللہ علیہ وسلم نے فرمایا: ”یہ تو اللہ کی شان بہت بلند ہے۔“ ابن معاذ کے الفاظ ہیں، آپ صلی اللہ علیہ وسلم نے فرمایا: ”یہ تو اللہ کی ایک مخلوق کا حال ہے اور اللہ کی شان بے انتہا بلند ہے۔“ [سنن ابي داود/كتاب السنة /حدیث: 4731]