سیدنا عمار بن یاسر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”یہ چیزیں فطری امور میں شامل ہیں یعنی کلی کرنا اور ناک میں پانی چڑھانا۔“ اور مذکورہ بالا حدیث کی مانند ذکر کیا مگر اس میں ڈاڑھی چھوڑنے کا ذکر نہیں بلکہ ختنے کا ذکر مزید ہے۔ اور ان کی روایت میں «الِانْتِضَاحُ» کا لفظ بیان کیا گیا ہے، «انْتِقَاصُ الْمَاءِ» کا لفظ نہیں کہا گیا۔ «الِانْتِضَاحُ» کے معنی ہیں ”بعد از وضو شرمگاہ کے مقام پر چھینٹے مارنا“ اور «انْتِقَاصُ الْمَاءِ» کے معنی ”پانی کے ساتھ استنجاء کرنا“ کے ہیں۔ امام ابوداؤد رحمہ اللہ کہتے ہیں کہ سیدنا ابن عباس رضی اللہ عنہ سے بھی اسی طرح روایت کی گئی ہے، انہوں نے کہا کہ ”پانچ امور (فطرت) سے متعلق ہیں۔“ انہوں نے مانگ نکالنے کا ذکر کیا اور ڈاڑھی چھوڑنے کا نہیں کیا۔ امام ابوداؤد رحمہ اللہ کہتے ہیں کہ ”حماد کی مذکورہ بالا روایت کی طرح طلق بن حبیب، مجاہد اور بکر بن عبداللہ مزنی سے ان کے موقوف اقوال مروی ہیں، انہوں نے بھی ڈاڑھی بڑھانے کا ذکر نہیں کیا۔“ اور سیدنا ابوہریرہ رضی اللہ عنہ کی حدیث، جو وہ نبی کریم صلی اللہ علیہ وسلم سے روایت کرتے ہیں اس میں ڈاڑھی بڑھانے کا ذکر آیا ہے اور ابراہیم نخعی رحمہ اللہ سے اسی طرح مروی ہے اور اس میں ڈاڑھی بڑھانے اور ختنے کا ذکر ہے۔ [سنن ابي داود/كتاب الطهارة/حدیث: 54]