سیدنا عمران بن حصین رضی اللہ عنہ سے مروی ہے کہ نبی کریم صلی اللہ علیہ وسلم نے ظہر کی نماز پڑھائی، ایک آدمی آیا اور اس نے آپ صلی اللہ علیہ وسلم کے پیچھے ﴿سَبِّحِ اسْمَ رَبِّكَ الْأَعْلَى﴾ [سورة الأعلى: 1] پڑھی۔ جب آپ صلی اللہ علیہ وسلم فارغ ہوئے تو فرمایا: ”تم میں سے کس نے قراءت کی ہے؟“ انہوں نے کہا: ایک آدمی نے قراءت کی ہے۔ آپ صلی اللہ علیہ وسلم نے فرمایا: ”میں جان گیا تھا کہ تم میں سے کسی نے مجھے قراءت میں الجھایا ہے۔“ امام ابوداؤد رحمہ اللہ نے بیان کیا ہے کہ ابوالولید نے اپنی روایت میں شعبہ سے نقل کیا ہے کہ میں نے قتادہ سے کہا: ”کیا سعید کا یہ قول نہیں ہے کہ ”قرآن کے لیے خاموش رہو؟“”کہا: ”یہ تب ہے جب وہ جہراً پڑھے۔“ ابن کثیر نے اپنی روایت میں کہا: میں نے قتادہ سے کہا: ”گویا آپ نے اسے (یعنی پڑھنے کو) مکروہ جانا۔“ کہا: ”اگر مکروہ جانتے تو روک دیتے۔“ [سنن ابي داود/أبواب تفريع استفتاح الصلاة /حدیث: 828]