سیدنا عبداللہ بن عمرو رضی اللہ عنہ بیان کرتے ہیں: ایک شخص نبی کریم صلی اللہ علیہ وسلم کی خدمت میں حاضر ہوا اس نے عرض کی: یا رسول اللہ! مجھے قرآن پڑھنا سکھائیے۔ نبی اکرم صلی اللہ علیہ وسلم نے فرمایا: تم ”الر“ سے شروع ہونے والی تین سورتوں کی تلاوت سیکھ لو اس شخص نے عرض کی: میری عمر زیادہ ہو گئی ہے۔ زبان وزنی ہو گئی ہے دل سخت ہو گیا ہے (یعنی حافظہ کمزور ہے) نبی اکرم صلی اللہ علیہ وسلم نے فرمایا: تم ”حم“ سے شروع ہونے والی تین سورتیں سیکھ لو اس شخص نے اس کی مانند کلمات کہے اس نے عرض کی: یا رسول اللہ! آپ مجھے ایک جامع سورۃ پڑھنا سکھا دیں، تو نبی اکرم صلی اللہ علیہ وسلم نے اسے سورہ زلزال پڑھنا سکھا دی، یہاں تک کہ جب آپ اس آیت پر پہنچے: ”جو شخص ذرے کے وزن جتنی بھلائی کرے گا وہ اسے دیکھ لے گا اور جو شخص ذرے کے وزن جتنی برائی کرے گا وہ اسے دیکھ لے گا۔“ اس شخص نے عرض کی: اس ذات کی قسم! جس نے آپ کو حق کے ہمراہ مبعوث کیا ہے۔ میں اس بات کی پروا نہیں کروں گا کہ میں اس کے علاوہ مزید بھی کچھ سیکھوں، یہاں تک کہ میںاللہ تعالیٰ کی بارگاہ میں حاضر ہو جاؤں۔ آپ مجھے یہ بتا دیجئے مجھ پر کون سا عمل کرنا لازم ہے میں وہ عمل کروں گا، جس کی میں طاقت رکھتا ہوں، تو نبی اکرم صلی اللہ علیہ وسلم نے ارشاد فرمایا: پانچ نمازیں پڑھنا، رمضان کے روزے رکھنا بیت اللہ کا حج کرنا اور تم اپنے مال کی زکوۃ ادا کرو، نیکی کا حکم دو اور برائی سے روکو۔“ [صحیح ابن حبان/كتاب الرقائق/حدیث: 773]