سیدنا ابوبکر بن محمد بن عمرو بن حزم رضی اللہ عنہ اپنے والد سے وہ ان کے دادا سے روایت کرتے ہیں: نبی اکرم صلی اللہ علیہ وسلم نے اہل یمن کی طرف ایک مکتوب لکھا جس میں فرائض سنتیں اور دیت کے مسائل تھے۔ یہ مکتوب آپ صلی اللہ علیہ وسلم نے سیدنا عمرو بن حزم کے ہاتھ بھیجا (عمرو کہتے ہیں) میں نے یہ مکتوب اہل یمن کو جا کر سنایا، اس کا مضمون یہ تھا محمد نبی صلی اللہ علیہ وسلم کی جانب سے شرحبیل بن عبدکلال اور حارث بن عبدکلال اور نعیم بن کلال اور یہ بھی کہا گیا ہے کہ ذی رعین، معافر اور ہمدان کی طرف (اللہ تعالیٰ کی حمد و ثنا کے) بعد تمہارا سفیر لوٹ کر آ گیا ہے اور تم نے مالِ غنیمت میں سے اللہ کا پانچواں حصہ دیا ہے اور اللہ تعالیٰ کی جانب سے مومنوں پر ان زمینوں میں جو بارشوں سے سیراب ہوتی ہیں یا جو میدانی ہیں یا جو بلندی والی ہیں، ان میں عشر فرض کیا ہے۔ چنانچہ جب ان کی پیداوار پانچ وسق تک پہنچ جائے تو اس کا دسواں حصہ لازم ہے۔ جس زمین کو ڈولوں یا رہٹ سے سینچا جائے، ان میں اس سے آدھا۔ خودرو گھاس چرنے والے اونٹوں میں ہر پانچ میں ایک بکری ہے یہاں تک کہ 24 تک پہنچ جائیں۔ جب 24 سے ایک بھی زیادہ ہو گئی تو ان میں اونٹنی کی ایک سالہ بچی ہے، اگر یہ موجود نہ ہو تو پھر اونٹنی کا دو سالہ بچہ 35 تک۔ 35 سے ایک بھی زیادہ ہو جائے تو اس میں دو سالہ اونٹنی 54 تک۔ جب 45 سے ایک بھی زیادہ ہو جائے تو اس میں تین سالہ جوان اونٹنی 60 تک۔ جب 60 سے ایک بھی زیادہ ہو جائے تو اس میں چار سالہ اونٹنی 75 تک۔ جب 75 سے ایک بھی زیادہ ہو جائے تو اس میں دو سالہ دو اونٹنیاں 90 تک۔ جب 90 سے ایک بھی زیادہ ہو جائے تو تین سالہ دو اونٹنیاں 120 تک۔ جب 120 سے زیادہ تعداد ہو تو ہر چالیس میں دو سالہ ایک اونٹنی۔ اور ہر 50 میں 3 سالہ ایک اونٹنی۔ ہر 30 گائیوں میں ایک بچھڑا ہے۔ ہر 40 گائیوں میں ایک گائے ہے۔ ہر 40 بکریوں میں ایک بکری ہے یہاں تک کہ ان کی تعداد 120 ہو جائے۔ جب 120 سے ایک بھی زیادہ ہو تو ان میں 2 بکریاں ہیں 200 تک۔ جب 200 سے ایک بھی زیادہ ہو جائے تو تین بکریاں ہیں 300 تک۔ اس سے بھی اگر زیادہ ہوں تو ہر 100 میں ایک بکری۔ اور صدقہ میں بوڑھا، لاغر اور کانا جانور نہ دیا جائے۔ اور پورے ریوڑ کو بکرے قرار نہ دیا جائے اِلّا یہ کہ دینے والا خود چاہے۔ اور صدقہ کے خوف سے متفرق کو مجتمع اور مجتمع کو متفرق نہ کیا جائے اور دو شریکوں سے جو کچھ لیا جائے گا وہ دونوں آپس میں برابری کے ساتھ رجوع کر لیں گے۔ اور ہر 5 اوقیہ چاندی میں پانچ درہم ہیں اور اس سے زیادہ ہو تو ہر چالیس درہموں میں ایک درہم ہے۔ پانچ اوقیہ سے کم میں زکوۃ نہیں ہے۔ ہر چالیس دیناروں میں ایک دینار ہے۔ بے شک ” صدقہ “ محمد اور محمد کے اہل بیت کے لیے حلال نہیں ہے۔ یہ تو زکوۃ ہے جس کے ذریعے تم اپنے آپ کو پاک کرتے ہو، یہ مومن فقراء کے لیے ہے اور مجاہدوں کے لیے ہے اور مسافروں کے لیے ہے۔ اور غلاموں میں زکوۃ نہیں ہے اور کھیتی میں اور کھیت میں کام کرنے والوں میں زکوۃ نہیں ہے جبکہ وہ اس کا عُشر ادا کرتے ہوں نیز مسلمان غلام میں اور نہ ہی اس کے گھوڑے میں زکوۃ ہے، اس تحریر میں یہ بھی تھا: اللہ کے نزدیک قیامت کے دن سب سے بڑا گناہ اللہ کے ساتھ کسی کو شریک ٹھہرانا ہے اور مومن کو ناحق قتل کرنا ہے اور جہاد سے بھاگنا ہے، ماں باپ کی نافرمانی کرنا، پاک دامنہ خاتون پر زنا کی تہمت لگانا، جادو سیکھنا، سود کھانا اور یتیم کا مال کھانا ہے۔ اور بے شک عمرہ چھوٹا حج ہے اور قرآن کو بغیر طہارت کے ہاتھ نہ لگائیں اور نکاح سے پہلے طلاق نہیں دی جا سکتی اور خریدنے سے پہلے آزاد نہیں کیا جا سکتا۔ اور کوئی شخص ایک کپڑے میں اس طرح نماز نہ پڑھے کہ اس کا پہلو ننگا ہو اور کوئی شخص اپنے بالوں کو گوندھے ہوئے نماز نہ پڑھے اور کوئی شخص ایک کپڑے میں یوں نماز نہ پڑھے کہ اس کے کندھے پر کچھ نہ ہو۔ اس تحریر میں یہ بھی تھا کہ: جس شخص کے لیے کسی مومن کا قتل گواہی سے ثابت ہو جائے تو اس کے لیے قصاص ہو گا، سوائے اس کے کہ مقتول کے ورثاء راضی ہوں۔ اور یہ بھی تھا کہ: جان کی دیت ایک سو اونٹ ہے اور ناک کاٹنے کی بھی دیت ہے اور زبان کی بھی دیت ہے اور ہونٹوں میں دیت ہے اور دونوں پستانوں میں دیت ہے اور ذکر (آلہ تناسل) میں دیت ہے اور پشت میں دیت اور دونوں آنکھوں میں دیت ہے اور ایک پاؤں کی آدھی دیت ہے۔ اور سر کی چوٹ میں دیت کا ایک تہائی اور پیٹ کے اندر تک گہرے زخم میں دیت کا ثلث۔ اور جس زخم میں ہڈی ٹوٹ جائے اس میں بھی دیت کا ایک تہائی ہے۔ اور ہاتھ اور پاؤں کی انگلیوں میں سے ہر انگلی کی 10 اونٹ دیت ہے اور دانت کی 5 اونٹ اور جس زخم سے ہڈی ظاہر ہو جائے، اس میں 5 اونٹ ہیں۔ اور عورت کے بدلے مرد کو قتل کیا جا سکتا ہے اور سونا رکھنے والوں پر ایک ہزار دینار ہیں۔ ٭٭ اس باب میں یہ حدیث کبیر ہے، مفسر ہے، اس کے لیے امیرالمومنین سیدنا عمر بن عبدالعزیز رضی اللہ عنہ نے گواہی دی ہے۔ اور ان کے معاصر علماء کرام (مثلاً) محمد بن مسلم الزہری نے اس کی صحت کو ثابت رکھا ہے۔ جیسا کہ پہلے بھی اس کا ذکر گزرا ہے۔ اور سلیمان بن داؤد الدمشقی الخولانی زہری کے (لقب کے) ساتھ معروف ہیں۔ اگر یحیی بن معین نے ان کو ضعیف قرار دیا ہے (تو کوئی بات نہیں) کیونکہ ان کے علاوہ دیگر محدثین رحمۃ اللہ علیہم نے ان کو عادل قرار دیا ہے جیسا کہ مجھے ابواحمد حسین بن علی نے عبدالرحمن بن ابی حاتم کا یہ بیان سنایا ہے کہ میں نے اپنے والد کو سنا ہے جبکہ ان سے عمرو بن حزم کی اس حدیث کے متعلق پوچھا گیا، جس میں رسول اللہ صلی اللہ علیہ وسلم کے ان کی طرف لکھے ہوئے صدقات کے متعلق خط کا ذکر تھا تو انہوں نے سلیمان بن داؤد خولانی کے متعلق کہا: ہمارے نزدیک ان کی روایت نقل کرنے میں کوئی حرج نہیں ہے اور ابومحمد بن ابوحاتم کہتے ہیں: میں نے ابوذرعہ کو بھی یہی کہتے سنا ہے۔ امام حاکم کہتے ہیں: زکوۃ کے موضوع پر یہ تفصیلی احادیث لکھنے کے حوالے سے میں نے اپنی ہر ممکن کوشش کی ہے اور یہ کتاب ان کی شرح سے بے نیاز نہیں ہے اور میں نے اس کی صحت پر ان سندوں کے ساتھ استدلال کیا ہے۔ جو خلفاء اور تابعین سے مروی ہیں کہ انہوں نے ان کو قبول بھی کیا ہے۔ اور ان کو استعمال کیا ہے باوجودیکہ اس سلسلہ میں اس شخص کو ضرورت نہیں جس نے اسے معلق رکھا ہے۔ اور اس سے پہلے وضو کے باب میں عقبہ بن عامر جہنی کی حدیث کے متعلق شعبہ کا یہ کہنا گزر چکا ہے کہ میرے لیے اس طرح کی حدیث کا رسول اللہ صلی اللہ علیہ وسلم کے حوالے سے صحیح ثابت ہو جانا میرے لیے میرے مال، میری جان اور تمام اہل و عیال سے بہتر ہے۔ حالانکہ وہ حدیث نفلی نماز کے متعلق تھی تو اس حدیث کی کیا شان ہو گی جو کہ اسلام کے بنیادی اصولوں میں سے ہے اور اللہ ہی توفیق دینے والا ہے۔ اور وہی کافی ہے اور بہت ہی بہتر کارساز ہے۔ [المستدرك على الصحيحين/كتاب الزكاة/حدیث: 1463]

عبدالرحمن بن ابی حاتم بیان کرتے ہیں کہ: میں نے اپنے والد سے عمرو بن حزم کی اس حدیث کے بارے میں پوچھا جو رسول اللہ صلی اللہ علیہ وسلم نے انہیں صدقات (زکوٰۃ) کے متعلق لکھ کر دی تھی، تو انہوں نے فرمایا: "سلیمان بن داؤد الخولانی ہمارے نزدیک ان لوگوں میں سے ہیں جن میں کوئی حرج نہیں (یعنی وہ معتبر ہیں)"۔ ابو محمد بن ابی حاتم کہتے ہیں کہ میں نے ابو زرعہ کو بھی یہی کہتے ہوئے سنا۔ امام حاکم فرماتے ہیں: "زکوٰۃ کے متعلق ان تفصیلی اور خلاصہ شدہ احادیث کی تخریج میں، میں نے اپنی پوری علمی کوشش صرف کر دی ہے، اور یہ کتاب (المستدرک) ان کی تشریح سے بے نیاز نہیں ہو سکتی۔ میں نے خلفاء اور تابعین سے مروی صحیح اسانید کے ذریعے ان احادیث کے قبول کیے جانے اور ان پر عمل کیے جانے سے ان کی صحت پر استدلال کیا ہے، جو کسی بھی تحقیق کرنے والے کے لیے کافی ہے۔ ہمارے امام شعبہ، عقبہ بن عامر جہنی کی وضو سے متعلق حدیث کے بارے میں فرمایا کرتے تھے کہ: 'اگر میرے نزدیک رسول اللہ صلی اللہ علیہ وسلم سے اس جیسی کوئی حدیث ثابت ہو جائے تو وہ مجھے میری جان، مال اور اہل و عیال سے زیادہ محبوب ہوگی'۔ جب ایک نفلی نماز سے متعلق حدیث کا یہ مقام ہے تو ان سنن کا کیا مرتبہ ہوگا جو اسلام کے بنیادی قواعد (زکوٰۃ) میں سے ہیں۔ اللہ ہی توفیق دینے والا ہے، وہی مجھے کافی ہے اور بہترین کارساز ہے"۔ [المستدرك على الصحيحين/كتاب الزكاة/حدیث: 1463M]