سیدنا عمیر بن سعید نخعی رضی اللہ عنہ فرماتے ہیں کہ میں نے سیدنا علی رضی اللہ عنہ کو سنا ہے، وہ قوم کو بتا رہے تھے کہ یہ ستارہ جس کو اہل عرب زہرہ اور عجمی لوگ اس کو ” اناھید “ کہتے ہیں (اس کا قصہ یہ ہے کہ) دو فرشتے لوگوں کے درمیان فیصلے کیا کرتے تھے۔ ان کے پاس ایک خاتون آئی دونوں نے ایک دوسرے سے پوشیدہ اس کا ارادہ کر لیا، پھر ان میں سے ایک نے اپنے ساتھی سے کہا: میرے دل میں ایک بات ہے جو میں آپ کے ساتھ کرنا چاہ رہا ہوں، اس نے کہا، جی میرے بھائی! بولو! ہو سکتا ہے میں بھی وہی بات تیرے ساتھ کرنا چاہ رہا ہوں۔ پھر وہ دونوں ایک معاملے پر متفق ہو گئے (اور دونوں نے اس عورت کا ارادہ کر لیا) عورت نے ان سے کہا: کیا تم مجھے وہ عمل نہیں بتاؤ گے جس کے ذریعے تم آسمان پر جاتے اور واپس زمین پر آتے ہو؟ انہوں نے کہا: ہم اللہ تعالیٰ کے اسم اعظم کے ساتھ آسمان پر جاتے ہیں اور اسی کے ساتھ ہم زمین پر آتے ہیں۔ اس نے کہا: تم دونوں جو ارادہ رکھتے ہو میں اس وقت تک اس کو عملی جامہ نہیں پہناؤں گی جب تک تم مجھے وہ (اسمِ اعظم) سکھا نہیں دیتے۔ ان میں سے ایک نے اپنے ساتھی سے کہا: تو اس کو اسمِ اعظم سکھا دے۔ اس نے کہا: ہم اللہ تعالیٰ کے عذاب کی شدت برداشت نہیں کر پائیں گے۔ دوسرے نے کہا: مجھے اللہ تعالیٰ کی وسیع رحمت سے بہت امید ہے۔ چنانچہ اس نے اس عورت کو اسمِ اعظم سکھا دیا۔ اس نے وہ اسم اعظم پڑھا اور آسمان کی طرف اُڑ گئی۔ اس کے آسمان کی طرف چڑھنے پر ایک فرشتہ زور سے چلایا اس کا سر جھک گیا، پھر اس کے بعد وہ بیٹھا نہیں اور اس عورت کو اللہ تعالیٰ نے مسخ فرما دیا تو وہ ستارہ یہی تھا۔ [المستدرك على الصحيحين/كتاب التفسير/حدیث: 3088]