سیدنا ابوایوب انصاری رضی اللہ عنہ فرماتے ہیں کہ رسول اللہ صلی اللہ علیہ وسلم نے ان کی جانب کچھ سبزیات بھیجیں، ان میں پیاز یا کراث (ایک بدبودار قسم کی ترکاری، جس کی بعض قسمیں پیاز اور بعض لہسن کے مشابہ ہوتی ہیں اور بعض کے سرے نہیں ہوتے، المنجد) موجود تھے۔ ان کو ان سبزیات میں رسول اللہ صلی اللہ علیہ وسلم کی کوئی نشانی نظر نہیں آئی، اس لئے انہوں نے اس کے کھانے سے انکار کر دیا، دینے والے نے پوچھا کہ آپ نے اس کو کھایا کیوں نہیں؟ سیدنا ابوایوب رضی اللہ عنہ نے فرمایا: اس لئے کہ مجھے اس میں رسول اللہ صلی اللہ علیہ وسلم (کے دست مبارک) کی خوشبو نہیں آئی، رسول اللہ صلی اللہ علیہ وسلم نے فرمایا: میں نے تو فرشتوں سے حیاء کی وجہ سے نہیں کھایا، تاہم یہ حرام نہیں ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7372]