حضرت عبدالرحمٰن بن ثعلبہ انصاری رحمہ اللہ اپنے والد (حضرت ثعلبہ بن عمرو بن عبید رضی اللہ عنہ) سے روایت کرتے ہیں کہ حضرت عمرو بن سمرہ بن حبیب بن عبد شمس رضی اللہ عنہ نے رسول اللہ صلی اللہ علیہ وسلم کی خدمت میں حاضر ہو کر عرض کیا: ”اے اللہ کے رسول صلی اللہ علیہ وسلم ! میں نے بنو فلاں کا ایک اونٹ چوری کیا ہے، مجھے (سزا دے کر گناہ سے) پاک کر دیجیے۔“ نبی صلی اللہ علیہ وسلم نے ان لوگوں کو پیغام بھیجا (اور دریافت کیا) تو انہوں نے کہا: ”ہمارا ایک اونٹ گم ہو گیا ہے،“ چنانچہ نبی صلی اللہ علیہ وسلم نے اس کی بابت حکم دیا تو اس کا ہاتھ کاٹ دیا گیا۔ حضرت ثعلبہ رضی اللہ عنہ نے فرمایا: جب اس کا ہاتھ (کٹ کر) گرا تو میں دیکھ رہا تھا، جبکہ (اس وقت) وہ (اپنے ہاتھ کو مخاطب کر کے) کہہ رہا تھا: ”اللہ کا شکر ہے جس نے مجھے تجھ سے پاک کر دیا۔ (اے ہاتھ!) تو چاہتا تھا کہ میرے جسم کو جہنم میں لے جائے۔“ [سنن ابن ماجه/كتاب الحدود/حدیث: 2588]