اردو حاشہ:
فوائد و مسائل:
(1)
سفید لباس بہترین لباس ہے۔
یہ نبی صلی اللہ علیہ وسلم کو زیادہ پسند تھا۔

(2)
پہلی روایت (3557)
کو امام ابن حبان امام بو صیری حافظ ابن حجر اور شیخ البانی نے شواہد کی بنا پر حسن قرار دیا ہے جبکہ ہمارے فاضل محقق نے اسے ضعیف قرار دیا ہے اور انھی کے رائے اقرب الی الصواب معلوم ہوتی ہے۔
مسند احمد کے محققین نے بھی طویل بحث کے بعد اسے منکر قرار دیا ہے اور دکتور بشار عواد نے بھی اس حدیث پر یہی حکم لگایا ہے لہٰذا ہمارے فہم کے مطابق اس موقع پر دوسری صحیح احادیث میں وارد دعائیں پڑھنا زیادہ بہتر معلوم ہوتا ہے۔
واللہ اءعلم۔
مزید تفصیل کے لئے دیکھیے: (الموسوعة الحدیثية مسند الإمام أحمد: 441، 442 و سنن ابن ماجة بتحقیق الدکتور بشار عواد رقم: 3558)

(3)
حضرت ابو سعید خدری ؓ سے روایت کہ رسول اللہ صلی اللہ علیہ وسلم جب نیا لباس پہنتے تو یہ دیا پڑھتے:
(اللهم لَكَ الْحَمْدُ أَنْتَ كَسَوْتَنِيهِ أَسْأَلُكَ خَيرَهُ وَخَيْرَ مَا صُنِعَ لَهُ وَأَعُوْذُ بِكَ مِنْ شَرِّهِ وَشَرِّ مَا صُنِعَ لُه)
”اے اللہ! تیری ہی تعریف ہے۔
تو نے ہی مجھے یہ پہنایا ہے۔
میں تجھ سے اس کی خیر اور بھلائی کا سوال کرتا ہوں اور اس بھلائی کا سوال کرتا ہوں جس کے لئے اسے بنایا گیا ہے۔
اور میں اس کے شر سے تیری پناہ چاہتا ہوں اور اس شر سے جس کے لئے اسے بنایا گیا ہے۔ (سنن أبي داؤد، اللباس، باب ما يقول إذا لبس ثوباً جديداً، حديث: 4020)
اور جب عام لباس پہنتے تو یہ دعا پڑھتے تھے:
(الْحَمْدُ لِلَّهِ الَّذِي كَسَانِي هَذَا الثَّوْبَ وَرَزَقَنِيهِ مِنْ غَيْرِ حَوْلٍ مِنِّي وَلَا قُوَّةٍ» ”ہر قسم کی تعریف اللہ ہی کے لئے ہے جس نے مجھےیہ لباس پہنایا اور میری ذاتی قوت اور طاقت کے بغیر مجھے عطا کیا۔“
 (سنن أبي داؤد، اللباس، باب ما يقول إذا لبس ثوباً جديداً حديث: 4023)
ابوداؤد میں ہی ابو نصرہ سے مروی ہے کہ نبی صلی اللہ علیہ وسلم کے صحابہ میں سے جب کوئی نیا کپڑا پہنتا تو اسے یوں دعا دی جاتی:
(تبلى ويخلف الله تعالىٰ)
 ”اللہ کرے تم اسے خوب (استعمال کرکے)
پرانا کرو۔
اور اللہ تعالیٰ تمہیں اس کے بعد اور بھی عنایت فرمائے۔“ (حوالہ مذکورہ)
مذکورہ دعائیں رسول اللہ صلی اللہ علیہ وسلم سے صحیح سند سے ثابت ہیں لہذا ہمیں مسنون دعاؤں ہی کا اہتمام کرنا چاہیے۔