´نبی اکرم صلی الله علیہ وسلم کی فضیلت کا بیان`
ابوہریرہ رضی الله عنہ کہتے ہیں کہ رسول اللہ صلی اللہ علیہ وسلم نے فرمایا: ”اللہ سے میرے لیے وسیلہ کا سوال کرو، لوگوں نے عرض کیا: اللہ کے رسول! وسیلہ کیا ہے؟ آپ نے فرمایا: ”یہ جنت کا سب سے اونچا درجہ ہے جسے صرف ایک ہی شخص پا سکتا ہے اور مجھے امید ہے کہ وہ میں ہوں گا“ ۱؎۔ [سنن ترمذي/كتاب المناقب/حدیث: 3612]

اردو حاشہ:
وضاحت:
1؎:
اس حدیث میں مذکورہ ”وسیلہ“ سے وہی وسیلہ مراد ہے،
جس کی دعا ایک امتی نبی کریم ﷺکے لیے ہر اذان کے بعد کرتاہے،
(اللهم آتِ مُحَمَّدًا الْوَسِیْلَةَ) (اے اللہ! محمد ﷺکو وسیلہ عطا فرما) اس حدیث میں آپﷺ نے جو امت کو اپنے لیے وسیلہ طلب کرنے کے لیے فرمایا خود ہی اس طلب کو اذان کی بعد والی دعا میں کر دیا،
اذان سے باہر بھی آدمی نہ دعا کر سکتا ہے،
یہ دعا کرنے سے خود آدمی کو دعا کا ثواب ملا کرے گا،
آپﷺ کو تو وسیلہ عطا کیا جانے والا ہی ہے،
اسی لیے آپﷺ نے فرمایا کہ مجھے امید ہے کہ اس سے سرفراز ہونے والا میں ہی ہوں گا تو یقیناً آپﷺ ہی ہوں گے،
اس حدیث سے آپﷺ کی فضیلت واضح طور پر ظاہر ہو رہی ہے۔

نوٹ:
(سندمیں لیث بن ابی سلیم ضعیف،
اور کعب مدنی مجہول راوی ہیں،
لیکن حدیث نمبر:3614 سے تقویت پا کر یہ حدیث صحیح لغیرہ ہے)