4403. حضرات خبردار! بےشک اللہ تعالٰی نے تم پر تمہارے خون اور تمہارے مال اس طرح حرام کر رکھے ہیں جس طرح اس دن کی حرمت اس شہر اور اس مہینے میں ہے۔ ”خبردار! کیا میں نے تمہیں احکام شریعت پہنچ دیے ہیں؟“ سب نے کہا: ہاں۔ آپ نے فرمایا: ”اے اللہ! گواہ رہنا۔“ یہ تین مرتبہ فرمایا۔ ”افسوس! دیکھنا میرے بعد پھر کافروں جیسے کام نہ شروع کر دینا کہ ایک دوسرے کی گردنیں کاٹنا شروع کر دو۔“ [صحيح بخاري، حديث نمبر:4403]

حدیث حاشیہ:
اس طور پر کہ کافروں کو چھوڑ کر آپس ہی میں لڑنے لگو۔
ظاہر حدیث سے یہ نکلتا ہے کہ مسلمان کا بلاوجہ شرعی خون کرنا کفر ہے۔
ابن عبا س ؓ کا یہی قول ہے لیکن دوسرے علماء نے تاویل کی ہے۔
مطلب یہ ہے کہ کافروں کا سا فعل نہ کرو۔
حضرت عبد اللہ بن عمر ؓ وداع کے بارے میں شک میں رہے کہ آنحضرت ﷺ کا وداع مراد ہے یا مکہ کا وداع مراد ہے۔
مگر بعد میں معلوم ہوا کہ خود آپ کاوداع مراد تھا۔
آپ ﷺ پھر چند دنوں بعد ہی انتقال فرماگئے۔
آنحضرت ﷺ کا یہ خطبہ بھی حجۃ الوداع کا خطبہ ہے۔

4403. حضرات خبردار! بےشک اللہ تعالٰی نے تم پر تمہارے خون اور تمہارے مال اس طرح حرام کر رکھے ہیں جس طرح اس دن کی حرمت اس شہر اور اس مہینے میں ہے۔ ”خبردار! کیا میں نے تمہیں احکام شریعت پہنچ دیے ہیں؟“ سب نے کہا: ہاں۔ آپ نے فرمایا: ”اے اللہ! گواہ رہنا۔“ یہ تین مرتبہ فرمایا۔ ”افسوس! دیکھنا میرے بعد پھر کافروں جیسے کام نہ شروع کر دینا کہ ایک دوسرے کی گردنیں کاٹنا شروع کر دو۔“ [صحيح بخاري، حديث نمبر:4403]

حدیث حاشیہ:
1۔
حجۃ الوداع کی وجہ تسمیہ کا علم خاص خاص حضرات کوتھا کہ اس سے مراد رسول اللہ ﷺ کا انتقال پر ملال ہے۔
عام لوگ حجۃ الوداع کا نام استعمال کرتے تھے لیکن اس کی حقیقی وجہ تسمیہ سے بے خبر تھے۔
رسول اللہ ﷺ نے فرمایا تھا کہ شاید میں اس سال کے بعد تمھیں نہ دیکھ سکوں توعام لوگوں نے یہ خیال کیا کہ اس سال کے بعد پھر ایسے اجتماع کے ساتھ آپ حج نہیں کریں گے۔
اس وجہ سے انھوں نے اس حج کو حجۃ الوداع کہا لیکن جب آپ کا چند ماہ بعد انتقال ہوا تو لوگوں کو علم ہوا کہ رسول اللہ ﷺ کی الوداعی گفتگو کسی خاص گروہ کے ساتھ مختص نہ تھی بلکہ آپ عوام وخاص سب سے رخصت ہورہے تھے۔
2۔
صحیح مسلم میں ہے کہ رسول اللہ ﷺ نے فرمایا:
”شاید میں اس حج کے بعد دوبارہ حج نہ کرسکوں،اس لیے تم مجھ سے مناسک حج سیکھ لو۔
“ (صحیح مسلم، الحج، حدیث: 3137(1297)
اسی طرح دیگر روایات سے رسول اللہ ﷺ کی قرب وفات کا علم ہوتا ہے، اس وجہ سے اسے حجۃ الوداع کہا گیا۔
بہرحال اکثر صحابہ کرام ؓ کو اس بات کا علم نہ ہوسکا کہ رسول اللہ ﷺ ہم سے جدا ہورہے ہیں یا کوئی اور ہم سے الوداع ہورہا ہے۔
جب آپ فوت ہوگئے تو معلوم ہوا کہ آپ نے لوگوں کو وصیت کرکے انھیں الوداع فرمایا اور انھیں وصیت فرمائی تھی کہ میرے بعد کافروں جیسے کام نہ کرنا، پھر اللہ کی گواہی کے ساتھ اس الوداع کومزید تقویت پہنچائی۔
(فتح الباري: 133/8)