5282. سیدنا ابن عباس ؓ سے ایک اور روایت ہے انہوں نے فرمایا: بریرہ‬ ؓ ک‬ا شوہر ایک سیاہ فام غلام تھا جسے مغیث کہا جاتا تھا وہ بنو فلاں کا غلام تھا۔ گویا میں اسے اب بھی دیکھ رہا ہوں کہ وہ مدینہ طیبہ کے راستوں میں سیدہ بریرہ‬ ؓ ک‬ے پیچھے گھومتا پھرتا ہے۔ [صحيح بخاري، حديث نمبر:5282]

حدیث حاشیہ:
(1)
ان روایات سے امام بخاری رحمہ اللہ یہ ثابت کرنا چاہتے ہیں کہ بریرہ رضی اللہ عنہا کی آزادی کے وقت ان کے شوہر حضرت مغیث رضی اللہ عنہ غلام تھے۔
اگر منکوحہ لونڈی آزاد ہو جائے اور اس کا شوہر غلام ہو تو اسے اختیار ہے کہ وہ اس کے نکاح میں رہے یا نہ رہے جیسا کہ حضرت بریرہ رضی اللہ عنہا جب آزاد ہوئیں تو رسول اللہ صلی اللہ علیہ وسلم نے انھیں اختیار دیا تو انھوں نے اپنی ذات کو اختیار کیا، اپنے شوہر کو اختیار نہیں کیا۔
(2)
دراصل نکاح رضامندی کا سودا ہے۔
لونڈی کو نکاح کے وقت اپنے شوہر کے انتخاب کا کوئی اختیار نہیں ہوتا۔
ممکن ہے کہ مالک نے جس شخص سے اس کا نکاح کر دیا ہو وہ اسے پسند نہ کرتی ہو، اس لیے آزادی کے بعد اسے اختیار دیا گیا ہے۔
جمہور اہل علم کا یہی موقف ہے کہ لونڈی کو یہ اختیار اس وقت ہوگا جب آزادی ملنے کے وقت اس کا خاوند غلام ہو، اگر وہ آزاد ہے تو پھر اسے اختیار نہیں ہے۔
واللہ اعلم