´سبزیوں میں زکاۃ نہیں`
«. . . عَنْ مُعَاذٍ أَنَّهُ كَتَبَ إِلَى النَّبِيِّ صَلَّى اللَّهُ عَلَيْهِ وَسَلَّمَ يَسْأَلُهُ عَنْ الْخَضْرَاوَاتِ وَهِيَ الْبُقُولُ، فَقَالَ: لَيْسَ فِيهَا شَيْءٌ . . .»
”. . . معاذ رضی الله عنہ کہتے ہیں کہ انہوں نے نبی اکرم صلی اللہ علیہ وسلم کو لکھا، وہ آپ سے سبزیوں کی زکاۃ کے بارے میں پوچھ رہے تھے تو آپ نے فرمایا: ان میں کوئی زکاۃ نہیں ہے . . .“ [سنن ترمذي/كتاب الزكاة عن رسول الله صلى الله عليه وسلم/باب مَا جَاءَ فِي زَكَاةِ الْخُضْرَوَاتِ: 638]

فوائد و مسائل:
SR سوال: کیا سبزیوں پر زکوۃ (عشر) ہے؟ ER
جواب: سبزیوں پر زکوۃ (عشر) واجب نہیں ہوتی۔
اس پر دلائل ملاحظہ فرمائیں:
اجماع امت:
اہل علم کا اس بات پر اجماع ہے کہ سبزیوں پر زکوٰۃ (عشر) واجب نہیں، جیسا کہ:
◈ امام ابوعبید قاسم بن سلام فرماتے ہیں:
«فالعلماء اليوم مجمعون من أهل العراق، والحجاز، والشام على أن لا صدقة فى قليل الخضر ولا فى كثيرها، إذا كانت فى أرض العشر»
”عراق، حجاز اور شام کے اہلِ علم آج اس بات پر متفق ہیں کہ سبزیاں کم ہوں یا زیادہ، اگر وہ عشر والی زمین میں ہوں، تو ان پر کوئی زکوٰۃ نہیں۔“ [كتاب الأموال: 502]
◈ نیز اس سلسلے میں امام مالک رحمہ اللہ کا قول ذکر کرنے کے بعد لکھتے ہیں:
«وكذٰلك قول سفيان، وأهل العراق جميعا، غير أبى حنيفة، فانه قال: فى قليل ما تخرج الارض وكثيره الصدقة۔۔۔ وخالفه اصحابه، فقالوا كقول الاخرين، وعليه الآثار كلها، وبه تعمل الامة اليوم»
”امام سفیان ثوری رحمہ اللہ اور تمام اہل عراق کا یہی موقف ہے، سوائے امام ابو حنیفہ کے کہ ان کے بقول زمین کی پیداوار کم ہو یا زیادہ، اس میں زکوٰۃ ہو گی... امام صاحب کے شاگردوں نے بھی اس سلسلے میں ان کی مخالفت کی ہے اور باقی تمام اہل علم کے موافق فتویٰ دیا ہے۔ تمام آثار بھی یہی بتاتے ہیں۔ اور آج تمام اُمت کا عمل بھی اسی پر ہے (کہ سبزیوں پر زکوٰۃ نہیں)۔“ [كتاب الأموال: 501]
◈ امام ترمذی رحمہ اللہ فرماتے ہیں:
«والعمل على هذا عند اهل العلم انه ليس في الخضراوات صدقة»
”اہل علم کے ہاں عمل اسی بات پر ہے کہ سبزیوں پر کوئی زکاۃ نہیں ہے۔“ [سنن الترمذي: 638]
اس کے خلاف کچھ بھی ثابت نہیں۔

حدیث نبوی:
❀ سیدنا ابوسعید خدری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا:
«ليس فيما اقل من خمسة اوسق صدقة»
”پانچ وسق سے کم میں زکوٰۃ نہیں ہوتی۔“ [صحيح بخاري: 1484، صحيح مسلم: 2266]
◈ حافظ خطابی رحمہ اللہ (319۔ 388ھ) اس حدیث کے فوائد میں لکھتے ہیں:
”اس حدیث سے ان اہلِ علم نے استدلال کیا ہے جن کے نزدیک کسی بھی سبزی پر زکوٰۃ واجب نہیں، کیونکہ ان کے بقول سبزی کو ماپا نہیں جاتا، جبکہ حدیث میں زکوٰۃ اسی چیز کے لیے مقرر کی گئی ہے، جس کو ماپا جا سکے، جیسا کہ دانے اور غلہ ہوتا ہے۔ جن چیزوں کو ماپا نہیں جاتا، وہ زکوٰۃ سے مستثنیٰ ہیں، جیسا کہ پھل اور سبزیاں وغیرہ۔ اکثر اہلِ علم یہی بات کہتے ہیں، سوائے امام ابوحنیفہ کے۔ وہ سبزیوں میں بھی زکوٰۃ کو واجب سمجھتے ہیں۔“ [معالم السنن: 2؍14]
◈ حافظ ابن حجر رحمہ اللہ لکھتے ہیں:
”امام ابن منذر رحمہ اللہ نے اس بات پر اجماع نقل کیا ہے کہ پانچ وسق سے کم زمینی پیداوار پر عشر نہیں ہوتا، سوائے امام ابوحنیفہ کے۔ وہ کہتے ہیں کہ ہر اس چیز پر عشر ہو گا، جس کی کاشت کا مقصد زمین کی نمو ہو، سوائے لکڑی، بانس، بھنگ اور اس درخت کے جس پر پھل نہ لگتا ہو۔“ [فتح الباري: 3؍350]

اسلافِ امت کا تعامل:
◈ عظیم تابعی میمون بن مہران رحمہ اللہ سے سبزیوں پر زکوٰۃ کے بارے میں پوچھا گیا، تو انہوں نے فرمایا:
«ليس فيها زكاة، حتٰى تباع، فإذا بيعت وبلغت مأتي درهم، فإن فيها خمسة دراهم.»
”سبزیوں پر کوئی زکوٰۃ نہیں، حتی کہ ان کو بیچ دیا جائے۔ جب بیچا جائے اور ان کی قیمت دو سو درہم (نصاب) تک پہنچ جائے، تو اس میں پانچ درہم زکوٰۃ ہو گی۔“ [كتاب الأموال: 502، وسنده حسن]
◈ امام محمد بن مسلم، ابن شہاب زہری رحمہ اللہ کا بھی یہی موقف ہے۔ [أيضا، وسنده حسن]
◈ عالم اہل کوفہ، امام حکیم بن عتیبہ رحمہ اللہ فرماتے ہیں:
«ليس في الخضراوات صدقة.» ”سبزیوں پر کوئی زکٰوۃ نہیں۔“ [مصنف ابن ابي شيبة: 139/3، و سنده حسن]
◈ مفتی مکہ، عظیم تابعی، امام عطا بن ابورباح رحمہ اللہ بھی یہی فرماتے ہیں۔ [مصنف ابن ابي شيبة: 139/3، و سنده صحيح]
◈ امام اہل شام، مکحول تابعی رحمہ اللہ فرماتے ہیں:
«ليس فى الخضر زكاة؛ الا ان يصير مالا، فيكون فيه زكاة»
”سبزیوں پر کوئی زکوٰۃ نہیں، ہاں اگر ان کو بیچ کر مال بنا لیا جائے، تو اس میں زکوٰۃ ہو گی۔“ [مصنف ابن ابي شيبة: 139/3، و سنده حسن]

دلیل احناف:
تبصرہ:
یہ جھوٹی روایت ہے، کیونکہ:
➊ ابومطیع بلخی راوی سخت ترین”ضعیف“ ہے۔ اس کے بارے میں توثیق کا ادنیٰ کلمہ بھی ثابت نہیں۔
➋ اس کا استاذ بھی باتفاق محدثین ”ضعیف“ ہے۔
➌ ابان بن عیاش کے ”ضعیف“ اور ”متروک“ ہونے پر محدثین کرام کا اتفاق ہے۔
◈ امام شعبہ رحمہ اللہ فرماتے ہیں:
«لأن أزني احب إلي من أن أحدث عن أبان بن أبي عياش.» [المجروحين لابن حبان: 97/1، وسنده صحيح]
◈ علامہ زیلعی حنفی لکھتے ہیں:
«فضعيف جدا» ”یہ راوی سخت ضعیف ہے۔“ [نصب الراية:385/2]
◈ اس روایت کے بارے میں: حافظ ابن الجوزی فرماتے ہیں:
«وهٰذا إسناد لا يساوي شيئا.» ”یہ سند کسی کام کی نہیں۔“ [التحقيق فى مسائل الخلاف: 962]
↰ لیکن حقیقت میں ایسی کوئی متابعت موجود نہیں۔ یہ کم علمی ہے یا غلط بیانی، اللہ تعالیٰ ہی بہتر جانتا ہے۔
➍ اس میں ”رجل“ کا واسطہ ہے اور یہ ”مبہم و مجہول“ ہے۔
↰ ثابت ہوا کہ زمین کی ہر پیداوار، وہ کم ہو یا زیادہ، اس پر زکوٰۃ کو واجب کہنا بے دلیل اور بے ثبوت بات ہے۔
◈ عالم اہل کوفہ، امام حکم بن عتیبہ رحمہ اللہ فرماتے ہیں:
«فيما حفظناعن اصحابنا انهم كانو يقولون: وليس فى شيء من هذا شيء؛ الا فى الحنطة والشعير والتمر والزبيب.»
”ہم نے اپنے احباب سے یہ یاد کیا ہے کہ وہ زمین کی پیداوار میں سے کسی پر زکوٰۃ کو واجب نہیں کہتے تھے، سوائے گندم، جو، کھجور اور منقے کے۔ [مصنف ابن أبى شيبة: 139/3، وسنده صحيح]
اجماعِ امت، حدیثِ رسول اور تصریحاتِ اہل علم کے برعکس بعض لوگ کچھ عمومی دلائل ذکر کر کے سبزیوں پر زکوٰۃ کے وجوب کی رٹ لگاتے ہیں، علمی دنیا میں اس طرز عمل کو کوئی حیثیت نہیں دی جاتی۔

´پانچ اوقیوں سے کم چاندی پر زکوٰۃ نہیں ہے`
«. . . ان رسول الله صلى الله عليه وسلم قال: ”ليس فيما دون خمسة اوسق من التمر صدقة، وليس فيما دون خمس اواق من الورق صدقة، وليس فيما دون خمس ذود من الإبل صدقة . . .»
”. . . ‏‏‏‏ رسول اللہ صلی اللہ علیہ وسلم نے فرمایا: ”پانچ وسق سے کم کھجوروں میں کوئی صدقہ (عشر) نہیں ہے اور پانچ اوقیوں سے کم چاندی میں کوئی صدقہ (زکوٰة) نہیں ہے اور پانچ اونٹوں سے کم میں کوئی صدقہ (زکوة) نہیں ہے . . .“ [موطا امام مالك رواية ابن القاسم: 273]

تخریج الحدیث:
[وأخرجه البخاري 1459، من حديث مالك به]

تفقه
➊ رسول اللہ صلی اللہ علیہ وسلم نے فرمایا: «لَا صَدَقَةَ فِيْ شَيْءٍ مِنَ الزَّرْعِ أَوِ الْكَرْمِ حَتَّى يَكُوْنَ خَمْسَةُ أَوْسُقٍ وَلَا فِي الرَّقَّةِ حَتَّى تَبْلُغَ مِئَتَيْ دِرْهَمٍ» کسی کھیتی (غلے) یا کھجور میں کوئی عشر نہیں ہے إلا یہ کہ پانچ وسق ہوجائے اور چاندی میں کوئی زکواۃ نہیں ہے إلا یہ کہ دوسو درہم تک پہنچ جائے (3078: شرح معانی الآثار للطحاوی 35/2 و سندہ حسن)
حافظ ابن عبدالبر نے فرمایا کہ یہ جلیل القدر سنت ہے جسے سب کی طرف سے تلقی بالقبول حاصل ہے۔ [التمهيد 20/136]
➋ ایک وسق ساٹھ صاع کا ہوتا ہے اور ایک حجازی صاع 5 رطل اور ثلث = دو سیر چار چھٹانک یعنی 2 کلوگرام 99 گرام 520 ملی گرام، دیکھئے مولانا فاروق اصغر صارم رحمہ اللہ کی کتاب ”اسلامی اوزان“ [ص59] صاع کے صحیح وزن کے بارے میں علمائے حق کا باہم اختلاف ہے لہٰذا بہتر یہی ہے کہ ڈھائی کلو (2 کلو 500 گرام) قرار دے کر صدقہ نکالا جائے تاکہ آدمی شک وشبہ سے بچا رہے۔ واللہ اعلم
➌ ایک اوقیہ میں چالیس درہم ہوتے ہیں جو دو چھٹانک چھ ماشہ اور 472۔ 1220 گرام ہوتا ہے۔ دیکھئے: [اسلامي اوزان ص21]
➍ پورا سال گزرنے کے بعد ہی زکوٰۃ فرض ہوتی ہے۔
➎ تفقہ نمبر 2 سے ثابت ہوتا ہے کہ جس کا غلہ فصل وغیرہ 750 کلوگرام یا دوسرے قول میں 630 کلوگرام سے کم ہو تو اس میں عشر ضروری نہیں ہے۔ مذکورہ حد تک پہنچنے کے بعد ہی عشر فرض ہوتا ہے۔ نیز دیکھئے: [ح 402]

´پانچ اوقیوں سے کم چاندی پر زکوٰۃ نہیں ہے`
«. . . 402- وبه: عن أبيه قال: سمعت أبا سعيد الخدري يقول: قال رسول الله صلى الله عليه وسلم: ”ليس فيما دون خمس ذود صدقة، وليس فيما دون خمس أواق صدقة، وليس فيما دون خمسة أوسق صدقة.“ . . .»
”. . . سیدنا ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”پانچ اونٹوں سے کم پر کوئی صدقہ (زکوٰة) نہیں ہے اور پانچ اوقیہ چاندی سے کم پر کوئی صدقہ نہیں ہے اور پانچ وسق (غلے) سے کم پر کوئی صدقہ (عشر) نہیں ہے۔“ . . .“ [موطا امام مالك رواية ابن القاسم: 274]

تخریج الحدیث:
[وأخرجه البخاري 1447، من حديث مالك به، ورواه مسلم 979، من حديث عمرو بن يحييٰ بن عمارة به]

تفقه:
➊ سیدنا جابر بن عبداللہ الانصاری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: «لا صدقة فى شئي من الزرع او الكرم حتيٰ يكون خمسة أوسق ولا فى الرقة حتيٰ تبلغ مئتي درهم۔» کھیتی یا انگور میں پانچ وسق سے کم میں کوئی صدقہ (ضروری) نہیں ہے اور دو سو درہم سے کم چاندی میں کوئی صدقہ نہیں ہے۔ [شرح معاني الآثار للطحاوي 2/35 وسنده حسن، وأصله عند ابن ماجه: 1794]
➋ مزید فقہ الحدیث کے لئے دیکھئے الموطأ حدیث: 92

´جن چیزوں میں زکاۃ واجب ہے ان کا بیان۔`
ابو سعید خدری رضی اللہ عنہ سے روایت ہے کہ انہوں نے نبی اکرم صلی اللہ علیہ وسلم کو فرماتے سنا: ”پانچ وسق سے کم کھجور میں زکاۃ نہیں ہے، اور پانچ اوقیہ سے کم چاندی میں زکاۃ نہیں ہے، اور پانچ اونٹوں سے کم میں زکاۃ نہیں ہے۔‏‏‏‏“ [سنن ابن ماجه/كتاب الزكاة/حدیث: 1793]

اردو حاشہ:
فوائد و مسائل:
(1)
کھجوریں جب خشک کر کے ذخیرہ کرنے کے قابل ہو جائیں، اس وقت اگر ان کا وزن پانچ وسق کے برابر ہو تو ان پر زکاۃ واجب ہوگی۔
ایک وسق سات صاع کے برابر ہوتا ہے اور صاع ایک پیمانہ ہے جس کا وزن تقریباً ڈھائی کلو بنتا ہے۔
اس حساب سے پانچ وسق کا وزن تقریباً بیس (20)
من بنتا ہے جس میں سے ایک من زکاۃ ادا کی جائے گی۔

(2)
پانچ اوقیہ دو سو درہم کے برابر ہے یعنی چاندی کا نصاب دو سو درہم تقریباً ساڑھے باون تولے ہے۔

(3)
اگر کسی کے پاس پانچ سے کم اونٹ ہوں تو ان میں زکاۃ فرض نہیں۔
پانچ اونٹ ہوں تو ایک بکری زکاۃ کے طور پر ادا کی جائے گی۔
اونٹوں کی زکاۃ کی مزید تفصیل باب 9 میں آئے گی۔

´کھیتی، پھل اور غلے کی زکاۃ کا بیان۔`
ابو سعید خدری رضی الله عنہ کہتے ہیں کہ نبی اکرم صلی اللہ علیہ وسلم نے فرمایا: ”پانچ اونٹوں ۱؎ سے کم میں زکاۃ نہیں ہے، اور پانچ اوقیہ ۲؎ چاندنی سے کم میں زکاۃ نہیں ہے اور پانچ وسق ۳؎ غلے سے کم میں زکاۃ نہیں ہے۔ [سنن ترمذي/كتاب الزكاة/حدیث: 626]

اردو حاشہ:
1؎:
یہ اونٹوں کا نصاب ہے اس سے کم میں زکاۃ نہیں۔

2؎:
اوقیہ چالیس درہم ہوتا ہے،
اس حساب سے 5اوقیہ دو سو درہم کے ہوئے،
موجودہ وزن کے حساب سے دو سو درہم 595 گرام کے برابر ہے۔

3؎:
ایک وسق ساٹھ صاع کا ہوتا ہے پانچ وسق کے تین سو صاع ہوئے موجودہ وزن کے حساب سے تین سو صاع کا وزن تقریباً (750) کلو گرام یعنی ساڑھے سات کوئنٹل بنتا ہے۔

´کن چیزوں میں زکوٰۃ واجب ہے؟`
ابو سعید خدری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”پانچ اونٹوں سے کم میں زکاۃ نہیں ہے ۱؎، پانچ اوقیہ ۲؎ سے کم (چاندی) میں زکاۃ نہیں ہے اور نہ پانچ وسق ۳؎ سے کم (غلے اور پھلوں) میں زکاۃ ہے۔‏‏‏‏“ [سنن ابي داود/كتاب الزكاة /حدیث: 1558]

1558. اردو حاشیہ:
➊ سونے چاندی، مال مویشی اور دیگر اجناس کے لیے مقررہ نصاب سے کم میں زکوۃ فرض نہیں ہے۔ ویسے کوئی دینا چاہے تو صدقہ ہے اور محبوب عمل ہے۔
➋ ایک اوقیہ میں چالیس درہم اور ایک درہم تقریباً 2.975 گرام چاندی کا ہوتا ہے۔ اسی طرح ایک اوقیہ کا وزن ایک سو انیس گرام، اور پانچ اوقیہ چاندی کا وزن پانچ سو پچانوے گرام ہوا۔ جس کا وزن تولہ کے حساب سے 51 تولہ (اور سابقہ علماء کے حساب سے 52 ½ تولہ) ہوتا ہے۔
➌ ایک وسق میں ساٹھ صاع ہوتے ہیں جیسا کہ اگلی روایات میں آرہا ہے، اور ایک صاع میں چار مد۔ ایک صاع کا وزن تقریباً ڈھائی کلو ہوتا ہے۔ اس حساب سے پانچ وسق کا کل سات سو پچاس کلو ہو جائے گا۔ یعنی تقریباً 19من۔ زکوۃ کی ادائیگی میں بنیادی اہمیت کا سوال یہ ہے کہ زکوۃ کس کس مال پر فرض ہے؟ سنن ابوداؤد میں جو احادیث بیان کی گئی ہیں ان میں سے سونا‘ چاندی‘ چرنے والے اونٹ گائیں بھیڑ اور بکریوں کا تفصیل سے ذکر ہے۔ زرعی اجناس میں جو زکوۃ ادا کی جاتی ہے‘ اسے عشر کہا جاتا ہے۔ اس حوالے سے وہ حدیثیں ذکر کی گئی ہیں جن میں قابل زکوۃ (عشر) اجناس کا تفصیل سے ذکر نہیں۔ البتہ یہ وضاحت ہے کہ جو کھیتیاں بارش‘ دریاؤں‘ چشموں یا زمین کی رطوبت سے سیراب ہوتی ہیں ان کی زکوۃ عشر یعنی دسواں حصہ ہے اور جن کو اونٹوں کے ذریعے سے (رہٹ چلا کر یا اونٹوں پر پانی لاد کر)سیراب کیا جاتا ہے ان کی زکوۃ (نصف عشر) یعنی بیسواں حصہ ہے۔ اس پر تمام علماء کا اتفاق ہے کہ زرعی اجناس پر زکوۃ‘ عشر یا نصف عشر ہے۔ اختلاف اجناس کے حوالے سے امام ابوحنیفہ گھاس‘ ایندھن اور بے ثمر درختوں کو چھوڑ کر زمین سے اگائی جانے والی ہر چیز پر عشر کے قائل ہیں۔ انہوں نے حضرت جابر ؓ کی روایت ”جو کھیتوں بارش، دریاؤں اور چشموں سے سیراب ہوں ان میں عشر اور جن کی آبپاشی اونٹوں کے ذریعے سے کی جائے ان میں نصف عشر ہے۔“ کے الفاظ میں پائے جانے والے عموم سے استدلال کیا ہے۔ علاوہ ازیں وہ قرآنی آیت: ﴿وَمِمّا أَخرَ‌جنا لَكُم مِنَ الأَر‌ضِ﴾ [البقرة:267 ]
کےعموم سے استدلال کرتے ہوئے یہ بھی کہتے ہیں کہہ زمیں کی پیدا وار تھوڑی ہو یا زیادہ، اس میں عشر یا نصف عشر ہوگا۔ حالانکہ اس عموم کی تخصیص حدیث رسول ﷺ سے ثابت ہے کہ 19 من سےکم پیداوار عشر سے مستثنی ہے۔ ان کے شاگرد امام ابویوسف اور امام محمد صرف ان اجناس پر زکوۃ ضروری سمجھتے ہیں جو آسمانی سال تک باقی رہ سکتی ہیں اوران کا لین دین ناپ سے ہوتا ہو یا وزن سے، ان کے مطابق ہر قسم کے غلے، شکر، کپاس وغیرہ پر عشر دینا ہو گا۔ امام مالک انسان کی اگائی ہوئی تمام ایسی رزعی اجناس پر عشر ضروری سمجھتے تھے جو خشک کرکے محفوظ کی جا سکتی ہیں۔ امام احمد خشک ہونے والے پھل اور ہر قسم کے بیجوں پر زکوۃ کے قائل تھے۔ جلیل القدر فقہائے تابعین امام حسن بصری، امام شعبی، موسیٰ بن طلحہ اور مجاہد صرف گندم، جو، کھجور اور کشمش میں عشر کے قائل ہیں جن کا نام رسول اللہ ﷺ نے خوج لیا ہے۔ امام بیہقی نے ان تابعین کے حوالے سے وہ ساری روایات ذکر کی ہین جن میں رسول اللہ ﷺ نے صرف ان اشیاء میں عشر لینے کا حکم دیا ہے۔ یہ روایات مرسل ہیں۔ لیکن حضرت موسیٰ بن طلحہ نے وضاحت کی ہے کہ ہمارے پاس رسول اللہ کی وہ تحریر موجود ہے جو آپ نے لکھوا کر حضرت معاذ بن جبلؓ کوعطا فرمائی تھی۔ اس میں یہ لکھا ہوا ہے کہ عشر ان چار چیزوں میں ہے۔ ان سار ی روایات کو ذکر کر کے امام بیہقی کہتے ہیں: ”یہ تمام روایات مرسل ہیں لیکن متعدد اسانید سے ایک دوسرے کی تائید کرتی ہیں۔ ان کے ساتھ حضرت ابو بردہ ؓ کے طریق سے حضرت موسیٰ اشعری کی روایت ہے جو انہی چار چیزوں کے عشر کے بارے میں ہے۔ [السنن الکبری للبیھقي‘ باب الصدقة فیما یزرعه الآدمیون ....]
ابو بردہ ؓ والی روایت کی صحت کے بارے میں امام بیہقی کا فیصلہ ہے: «رواته ثقات وهو متصل» ”یعنی اس کے راوی ثقہ ہیں اور اس کی سند متصل ہے۔“ [نيل الأوطار:الزکوة‘ باب زکوة الزرع والثمار) امام شافعی نے انہی چار چیزوں پر قیاس کر کے یہ کہا ہے: «عشر ما یقات و یدخر» ”عشر ان بنیادی غذائی اجناس پر ہے جو بطور خوراک استعمال ہوتی ہوں اور جن کا ذخیرہ کیا جاسکتا ہے۔“ گندم، جو، کھجور، کشمش کی طرح جن علاقوں میں چاول وغیرہ بنیادی غذائی جنس ہیں وہاں ان پر عشر ہو گا۔ کپاس اور دیگر بہت سی قیمتی اشیاء(cash crops) اور تازه سبزياں پر اگرچہ براہ راست عشر نہیں لیکن ان کی آمدنی کے حوالے سے اگر نصاب اور مدت نصاب مکمل ہو جائے تو زکوۃ کی ادائیگی ضرور ہو گی۔ اسی طرح چرنے والے (سائمہ) جانوروں میں شمار نہیں کیا جا سکتا، بنا بریں ان کی زکوۃ آمدنی پر ہوگی۔ پہلے سونا اور چاندی نقدی کے طور پر استعمال ہوتے تھے۔ آج کل کرنسی نوٹ استعمال ہوتے ہیں۔ علمائے امت کا اجماع ہے کہ کرنسی کو انہی پر قیاس کیا جائے گا۔ سعودی علماء اور پاک و ہند کےعلماء نے کرنسی توٹوں کے لیے چاندی کو نصاب بنایا ہے۔ ان کی دلیل یہ ہے کہ اس طرح زکوۃ دینے والوں کی تعداد زیادہ ہو گی جس میں غرباء ومساکین کا فائدہ زیادہ ہے۔ اگر سونے کو نصاب بنایا جائے گا تو بہت سے اصحاب حیثیت بھی زکوۃ دینے والوں میں سے نکل جائیں گے۔ مثال کے طور پر جس کے پاس 75ہزار سے کم فاضل بچت کے طور پر ایک سال پڑے رہے ہوں گے، وہ بھی صاحب نصاب متصور نہیں ہو گا، کیونکہ ساڑھے سات تولہ سونے کی قیمت (10ہزار روپے فی تولہ کے حساب سے) 75ہزار ہو گی۔ یوں لاکھوں افراد اصحاب حیثیت کے دائرے سے نکل جائیں گے جس کا سارانقصان غرباء مساکین اور مدارس دینیہ کو ہو گا۔ اس پہلو سے دیکھا جائے تو یہ مؤقف راجح لگتا ہے۔ بہر حال یہ اجتہادی مسئلہ ہے، اور دونوں میں سے کسی کو بھی اپنایا جا سکتا ہے۔ چاندی کا نصاب بنیاد ماننے کی صورت میں ساڑھے باون تولہ چاندی کی قیمت جتنی فاضل رقم رکھنے والا صاحب نصاب ہوگا اور سونے کو کرنسی کی بنیاد ماننے کی صورت میں 75 ہزار روپے فاضل رقم رکھنے والا صاحب نصاب متصور ہو گا اور اس سے کم رقم رکھنے والا شخص زکوۃ سےمستثنی ہوگا۔ رسول اللہﷺ کے دور میں اور صدیوں بعد تک قیمتی پتھروں، جواہرات اور موتیوں کا استعمال دنیا کے بہت سے حصوں میں زینت اور تفاخر کے لیے تو تھا، قدر یا مالیت کو محفوظ کرنے کا ذریعہ سونا چاندی ہی تھے۔ جواہرات کے کھرے کھوٹے ہونے کی پہچان چونکہ عام تاجر کے بس میں نہ تھی اور ان کی قیمتی کے تعین کا کوئی ایک باقاعدہ معیار بھی موجود نہ تھا۔ مختلف ماہرین کی رائے قیمتوں کےبارے میں ایک دوسرے سے بہت زیادہ مختلف ہوتی تھی۔ سونے چاندی کی طرح معیاری ٹیکسالوں میں ڈھال کر ان کو درہم و دینار کی شکل بھی نہ دی جا سکتی تھی اس لیے یہ کرنسی یا مالیت کے تحفظ کے لیے مناسب نہ تھے۔ مال تجارت کے طور پر ان کی زکوۃ تھی البتہ براہ راست ان پر زکوۃ کی وصولی ممکن نہ تھی۔ لیکن آج کل سائنسی بنیادوں پر ان کی پہچان، قیمت کا تعین اور اس کے لیے قابل قبول معیار سب کچھ آسان ہو گیا ہے۔ ان کی باقاعدہ منڈیاں قائم ہو گئی ہیں اور ان خوبیوں کی وجہ سے یہ زیب و زینت کے علاوہ بڑے پیمانے پر مالیت قدر کے تحفظ، ذخائر اور بنکوں میں نوٹ جاری کرنے کی غرض سے محفوظ ضمانتوں کے طور پر استعمال ہوتے ہیں۔ اس بات کا امکان موجود ہے کہ وقت کے ساتھ ساتھ زیادہ سے زیادہ لوگ زکوۃ سے بچنے کے لیے اپنے مالیاتی اثاثے جواہرات کی صورت میں محفوظ کرنے شروع کر دیں۔ امیر خواتین تو اب سونے چاندی کے بجائے ان سے کئی گنا زیادہ قیمتی جواہر کو زیب وزینت اور اثاثوں سے تحفظ کے لیے استعمال کرنے لگی ہیں ان پر زکوۃ بھی نہیں دینی پڑتی۔ یہ صورت حال فقراء اور مستحقین زکوۃ کے مفاد کے خلاف ہے۔ جس طرح حضرت عمر ؓ نے عنبر کے بارے میں، اس بنیاد پر کہ رسول اللہ ﷺ سے اس بارے میں کوئی ہدایت موجود نہ تھی، صحابہ ؓ سے مشورہ کیا تھا اور اس کی روشنی میں خمس کی وصولی کا فیصلہ فرمایا تھا۔ [الموسوعة الفقهية، كويت، زكوة باب زكوة المستخرج من البحار) مزید یہ کہ حضرت عمر ؓ کے پاس شام سے کچھ لوگ آئے کہ ہمیں گھوڑوں اور غلاموں کی صورت میں کچھ مال ملا ہے، ہم ان کی زکوۃ ادا کر کے اسے پاک کرنا چاہتے ہیں تو حضرت عمر ؓ نے صحابہ کرام سے مشورہ کرکے جن میں حضرت علی بھی شامل تھے، زکوۃ لینے کا فیصلہ کیا۔ [مستدرك حاکم، الزکوة‘ حدیث:1456) اسی طرح اب علماء اگر قیمتی پتھروں کے حوالے سے غور کریں اور متفقہ طور پر ان کی زکوۃ کے بارے میں فیصلہ کریں تو یہ عین مصلحت اسلامی کا تقاضا ہو گا۔ یاد رہے کہ پتھروں پر زکوۃ نہ ہونے کی جو مرفوع روایت عمرو بن شعیب عن أبیه عن جدہ کے حوالے سے منقول ہے وہ ضعیف ہے، اس لیے قابل اعتبار نہیں۔ [السنن الکبری للبیھقي، الزکوة‘ ما لا زکوة فیه من الجوهر غير الذهب والفضة]

1484. حضرت ابوسعیدخدری ؓ سے روایت ہے، وہ نبی کریم ﷺ سے بیان کرتے ہیں کہ آپ نےفرمایا:”پانچ وسق سے کم پیداوار میں زکوٰۃ نہیں اور نہ پانچ اونٹوں سے کم میں زکوٰۃ ہے اور نہ پانچ اوقیہ سے کم چاندی میں صدقہ ہے۔“ [صحيح بخاري، حديث نمبر:1484]

حدیث حاشیہ:
اہلحدیث کا مذہب یہ ہے کہ گیہوں اور جو اورجواراور کھجور اور انگور میں جب ان کی مقدار پانچ وسق یا زیادہ ہوتو زکوٰۃ واجب ہے۔
اور ان کے سوا دوسری چیزوں میں جیسے اور ترکاریاں اور میوے وغیرہ میں مطلقاً زکوٰۃ نہیں خواہ وہ کتنے ہی ہوں۔
قسطلانی نے کہا میووں میں سے صرف کھجور اور انگور میں اور اناجوں میں سے ہر ایک اناج میں جو ذخیرہ رکھے جاتے ہیں جیسے گیہوں‘ جو‘جوار‘ مسور‘ باجرہ‘ چنا‘ لوبیا وغیرہ ان سب میں زکوٰۃ ہے۔
اور حنفیہ کے نزدیک پانچ وسق کی قید بھی نہیں ہے، قلیل ہو یا کثیر سب میں زکوٰۃ واجب ہے۔
اور امام بخاری ؒ نے یہ حدیث لاکر ان کا رد کیا۔
(وحیدی)

1484. حضرت ابوسعیدخدری ؓ سے روایت ہے، وہ نبی کریم ﷺ سے بیان کرتے ہیں کہ آپ نےفرمایا:”پانچ وسق سے کم پیداوار میں زکوٰۃ نہیں اور نہ پانچ اونٹوں سے کم میں زکوٰۃ ہے اور نہ پانچ اوقیہ سے کم چاندی میں صدقہ ہے۔“ [صحيح بخاري، حديث نمبر:1484]

حدیث حاشیہ:
(1)
اس حدیث میں پیداوار کی اس مقدار کا بیان ہے جس میں عشر واجب ہوتا ہے اور وہ پانچ وسق ہے۔
اس سے کم میں نہیں ہوتا ایک وسق ساٹھ صاع کا ہوتا ہے، گویا نصاب جنس 5×60=300 صاع ہیں۔
جدید اعشاری نظام کے مطابق ایک صاع دو کلو اور سو گرام کا ہوتا ہے۔
اس حساب سے پانچ وسق جنس کے 630 کلوگرام بنتے ہیں، یعنی اگر اتنی مقدار میں جنس موجود ہو تو اس پر بیسواں حصہ دینا ہو گا، بعض اہل علم کے نزدیک ایک صاع اڑھائی کلوگرام کے مساوی ہے، لہذا ان کے ہاں پیداوار کا نصاب 750 کلوگرام ہے۔
غرباء اور مساکین کی ضروریات کے پیش نظر پیداوار کا 630 کلوگرام وزن مقرر کیا جانا زیادہ مناسب معلوم ہوتا ہے۔
(2)
اگر کسی نے زمین ٹھیکے پر حاصل کی ہے تو زمیندار چونکہ اس کا اصل مالک ہوتا ہے، اس لیے وہ ٹھیکے کی اس رقم کو اپنی مجموعی آمدنی میں شامل کرے اور اگر وہ نصاب کو پہنچ جائے تو اس سے زکاۃ ادا کرے۔
اور زمین ٹھیکے پر لینے والا کاشت کرنے میں صاحب اختیار ہوتا ہے اور پیداوار کا مالک بھی وہی ہوتا ہے تو وہ مختار ہونے کی حیثیت سے پیداوار کا عشر ادا کرے گا اور ٹھیکے کی رقم اس سے منہا (نکالی)
نہیں کی جائے گی۔
اسی طرح وہ اپنی سہولت کے لیے یا اپنی پیداوار بڑھانے کے لیے جو رقم خرچ کرتا ہے یہ بھی پیداوار سے منہا (نکالی)
نہیں کیا جائے گی، البتہ محنت و مشقت یا مالی اخراجات جو زمین کی سیرابی پر آتے ہیں ان کے پیش نظر شریعت نے اسے یہ رعایت دی ہے کہ وہ اپنی پیداوار سے دسواں حصہ دینے کے بجائے بیسواں حصہ ادا کرے، اگر اس رعایت کے باوجود ٹھیکے کی رقم، کھاد اور سپرے کے اخراجات، کٹائی کے لیے مزدوری اور تھریشر وغیرہ کے اخراجات بھی منہا کر دیے جائیں تو باقی کیا بچے گا جو عشر کے طور پر ادا کیا جائے گا، لہذا اس سلسلے میں ہمارا رجحان یہ ہے کہ ٹھیکے کی زمین سے ٹھیکے کی رقم پیداوار سے منہا نہیں ہو گی، بلکہ وہ اپنی مجموعی پیداوار سے بیسواں حصہ بطور عشر ادا کرے بشرطیکہ اس کی پیداوار پانچ وسق (630 کلوگرام)
تک پہنچ جائے۔
اگر اس سے کم ہے تو عشر نہیں ہو گا، ہاں! اگر مالک چاہے تو دینے پر قدغن نہیں، اللہ تعالیٰ ایسا کرنے سے اس کے رزق میں مزید اضافہ اور برکت عطا فرمائے گا۔