5004. سیدنا انس ؓ سے روایت ہے۔ انہوں نے فرمایا: نبی ﷺ نے وفات پائی تو صرف چار صحابہ کرام قرآن کے حافظ تھے، ابو الدرداء، معاذ بن جبل، زید بن ثابت اور ابو زید ؓ۔ اور پھر ہم ابو زید ؓ کے وارث بنے (کیونکہ ان کی اپنی اولاد نہیں تھی جبکہ انس ؓ ان کے بھتیجے تھے) [صحيح بخاري، حديث نمبر:5004]

حدیث حاشیہ:
ان کی کوئی اولاد نہ تھی، انس ان کے بھتیجے تھے، اسی لئے انہوں نے اپنے آپ کو ان کا وارث بتلایا اس میں علمی وراثت بھی داخل ہے شارحین لکھتے ہیں۔
ونحن ورثناہ رد علی من قال ان ابا زید ھو سعد عبید الاوسی لان انسبنا ھو خزرجی فابو زید ھو احد عمو متہ الذی ورثہ کیف یکون اوسیا کما ورد فی المناقب عن روایۃ قتادۃ قلت لانس من ابی زید قال ھو احد عمومتی (حاشیہ بخاری)
خلاصہ یہ کہ ابو زید حضرت انس کے ایک چچا ہیں وہ سعد عبیداوسی نہیں ہیں اس لئے کہ انس خزرجی نہیں پس جن لوگوں نے زید سے سعد عبیداوسی کو مراد لیا ہے ان کا خیال درست نہیں ہے۔

5004. سیدنا انس ؓ سے روایت ہے۔ انہوں نے فرمایا: نبی ﷺ نے وفات پائی تو صرف چار صحابہ کرام قرآن کے حافظ تھے، ابو الدرداء، معاذ بن جبل، زید بن ثابت اور ابو زید ؓ۔ اور پھر ہم ابو زید ؓ کے وارث بنے (کیونکہ ان کی اپنی اولاد نہیں تھی جبکہ انس ؓ ان کے بھتیجے تھے) [صحيح بخاري، حديث نمبر:5004]

حدیث حاشیہ:
1۔
یہ حدیث نمبر حضرت ا نس رضی اللہ تعالیٰ عنہ سے مروی اس سے پہلے حدیث سے مختلف ہے۔
ایک تو اس میں حصر کے ساتھ بیان کیا گیا ہے کہ رسول اللہ صلی اللہ علیہ وسلم کی وفات کے وقت صرف چار حافظ قرآن تھے اور دوسرے اس روایت میں حضرت ابی بن کعب رضی اللہ تعالیٰ عنہ کے بجائے حضرت ابو درداء رضی اللہ تعالیٰ عنہ کا ذکر ہے۔
2۔
بہر حال رسول اللہ صلی اللہ علیہ وسلم کی وفات کے وقت متعدد صحابہ کرام رضوان اللہ عنھم اجمعین حافظ قرآن تھے۔
کود انصار کے متعلق تصریح ہے کہ مذکورہ حضرات کے علاوہ حضرت عبدہ بن صامت اور حضرت ابو ایوب انصاری رضی اللہ تعالیٰ عنہ بھی حافظ قرآن تھے۔
اس طرح مہاجرین میں سے متعدد حضرات حافظ قرآن تھے جن میں سے حضرت ابو بکر رضی اللہ تعالیٰ عنہ سر فہرست ہیں۔
رسول اللہ صلی اللہ علیہ وسلم نے انھیں منصب امامت پر سر فراز فرمایا اور امامت کے لیے قرآن کا زیادہ پڑھا ہوا ہونا ضروری ہے۔
واللہ اعلم۔